Draupathi 2 box office: மோகன்ஜியின் திரௌபதி 2 இரண்டு நாள் வசூல் இவ்வளவா? மங்காத்தா போட்டி, நிலைக்குமா?

Updated: Sunday, January 25, 2026, 14:44 [IST]

Subscribe to Oneindia Tamil

சென்னை: தமிழ் சினிமாவில் வரலாற்று பின்னணியை மையமாக வைத்து உருவாகும் படங்களுக்கு எப்போதும் தனி ரசிகர்கள் உண்டு. அந்த வரிசையில், இயக்குநர் மோகன் ஜி இயக்கத்தில் உருவான திரௌபதி 2 திரைப்படம் கடந்த ஜனவரி 23ஆம் தேதி திரையரங்குகளில் வெளியாகியது.

இந்திய வரலாற்றின் ஒரு முக்கிய காலகட்டத்தை அடிப்படையாகக் கொண்டு, அரசியல் மற்றும் பாரம்பரிய கூறுகளை இணைத்து இந்த படம் உருவாக்கப்பட்டுள்ளதாக படக்குழு முன்பே தெரிவித்திருந்தது. இந்த படத்தின் இரண்டு நாள் வசூல் நிலவரம் பற்றிய தகவல் வெளியாகி இருக்கிறது.

ரிச்சர்ட் ரிஷி

இப்படத்தில் இளம் நடிகர் ரிச்சர்ட் ரிஷி முக்கிய கதாபாத்திரத்தில் நடித்துள்ளார். வரலாற்று சூழலில் அமைந்த கதைக்கு ஏற்றமாதிரி, கதாபாத்திரத்தின் உணர்ச்சிகளையும், காலகட்டத்தின் மனநிலையையும் வெளிப்படுத்த அவர் முயற்சி செய்துள்ளார். இருப்பினும், அவரது நடிப்பு பெரிய அளவில் ரசிகர்களை ஈர்க்கவில்லை என்பதே விமர்சகர்களின் கருத்தாக உள்ளது.

விமர்சன வரவேற்பு

திரௌபதி 2 வெளியானதும் விமர்சன ரீதியாக கலவையான கருத்துகளே கிடைத்தன. காட்சியமைப்பு, கருத்து முன்வைக்கும் விதம், வரலாற்று விளக்கம் ஆகியவற்றில் படம் முழுமையாக தாக்கத்தை ஏற்படுத்தவில்லை என சிலர் விமர்சித்துள்ளனர். குறிப்பாக, வரலாற்று சம்பவங்களை இயக்குநர் தனது பார்வையில் மாற்றி அமைத்ததாகும் குற்றச்சாட்டு படத்திற்கு எதிராக முன்வைக்கப்படுகிறது.
அரசியல் சர்ச்சைகள்

இந்த படத்தில், இந்தியாவுக்கு வரும் ஒரு சுல்தான் மன்னன், இங்குள்ள இந்துக்களை மதமாற்றம் செய்ய முயற்சிப்பது, பெண்களை பாலியல் வன்கொடுமைக்கு உட்படுத்துவது போன்ற காட்சிகள் இடம்பெற்றுள்ளன. இதற்கு சில முஸ்லிம் அமைப்புகள் கடும் எதிர்ப்பு தெரிவித்துள்ளன.

"இது தவறான வரலாற்றுப் பதிவு. இந்தியாவில் அந்த காலத்தில் இவ்வாறான நிகழ்வுகள் நடந்ததாக ஆதாரம் இல்லை" என்று அவர்கள் குற்றம் சாட்டினர். இதனால், படம் வெளியான உடனேயே சர்ச்சை வட்டத்துக்குள் சிக்கியது.

மோகன் ஜி

பழைய வண்ணாரப்பேட்டை, திரௌபதி, பகாசுரன் போன்ற படங்களை இயக்கியவர் மோகன் ஜி. ஒரு குறிப்பிட்ட சாதியை உயர்த்தியும், மற்றொரு சாதியை தாழ்த்தியும் காட்சிகளை அமைப்பதாக தொடர்ந்து விமர்சனம் எழுந்தாலும், "நான் அப்படிப்பட்ட நோக்கத்துடன் படம் எடுக்கவில்லை" என்று மோகன் ஜி மறுத்து வருகிறார்.

அதிக பட்ஜெட்டில் உருவாக்கப்பட்ட திரௌபதி 2 படமும், அந்த விமர்சனங்களிலிருந்து தப்பவில்லை.

ரிலீஸ் சிக்கல்கள்

இந்த படம் முதலில் பொங்கல் வெளியீடாக திட்டமிடப்பட்டது. ஆனால் ஜனநாயகன், பராசக்தி, வா வாத்தியார் போன்ற பெரிய படங்கள் வரிசையாக ரிலீஸ் ஆகும் சூழ்நிலையில், திரௌபதி 2 வெளியீடு தள்ளிப்போனது. ஒருவழியாக ஜனவரி 23ஆம் தேதி படம் திரையரங்குகளை அடைந்தது.

ஆனால் அதே நாளில், அஜித் குமாரின் மங்காத்தா திரைப்படம் ரீ-ரிலீஸ் செய்யப்பட்டதும், திரௌபதி 2 முழுமையாக பின்னணிக்கு தள்ளப்பட்டது. திரையரங்குகள், ரசிகர்கள், சமூக வலைதளங்கள் என அனைத்திலும் மங்காத்தா பற்றிய பேச்சே மேலோங்கி இருந்தது.

வசூல் நிலவரம்

வெளியான முதல் இரண்டு நாட்களில், திரௌபதி 2 உலகளவில் சுமார் ரூ.20 லட்சம் மட்டுமே வசூல் செய்துள்ளதாக தகவல்கள் வெளியாகியுள்ளன. முதல் நாளில் வசூல் 20 லட்சத்திற்கும் குறைவாக இருந்ததாகவும், இரண்டாம் நாளில் மேலும் சில லட்சங்கள் மட்டுமே சேர்ந்திருக்கலாம் என்றும் கூறப்படுகிறது.

இந்த வசூல், படத்தின் பட்ஜெட்டுடன் ஒப்பிடும் போது பெரும் பின்னடைவு என்றே பார்க்கப்படுகிறது.

மோகன் ஜியின் கோரிக்கை

படம் எதிர்பார்த்த வரவேற்பை பெறாத நிலையில், இயக்குநர் மோகன் ஜி நேற்று ஒரு வீடியோ வெளியிட்டு, "தயவு செய்து தியேட்டருக்கு சென்று படம் பாருங்கள். பார்த்தவர்கள் மற்றவர்களிடம் சொல்லுங்கள். சமூக வலைதளங்களில் வீடியோக்கள் பதிவிடுங்கள்"
என்று ரசிகர்களிடம் நேரடியாக கோரிக்கை வைத்துள்ளார்.

வரலாற்று படம் என்ற பெயரில் வெளியான திரௌபதி 2, சர்ச்சை, விமர்சனம், வசூல் பின்னடைவு ஆகிய மூன்றிலும் சிக்கியுள்ளது. ஒருபுறம் வரலாற்று திரிபு குறித்த குற்றச்சாட்டுகள், மறுபுறம் மங்காத்தா ரீ-ரிலீஸ் ஏற்படுத்திய பெரும் தாக்கம் - இவை அனைத்தும் சேர்ந்து, திரௌபதி 2 படத்தை திரையரங்குகளில் தடுமாறச் செய்துள்ளதாக சினிமா வட்டாரங்கள் கூறுகின்றன.