ஆஸ்கரில் புது வரலாறு.. சிங்கப் பெண்ணுக்கு கிடைத்த அங்கீகாரம்.. 98 வருஷங்களில் யாரும் செய்யாத சாதனை!

சென்னை: உலக திரைப்பட உலகில் பெண்கள் சாதனை படைக்கும் தருணங்கள் எப்போதும் ரசிகர்களுக்கு பெருமையை தரக்கூடியவை. அப்படிப்பட்ட ஒரு வரலாற்று தருணம் இந்த ஆண்டின் அகாடமி விருதுகள் Academy Awards மேடையில் நடந்துள்ளது.

Autumn Durald Arkapaw என்ற ஒளிப்பதிவாளர், 'Sinners' திரைப்படத்திற்காக சிறந்த ஒளிப்பதிவாளர் விருதை வென்று, ஆஸ்கர் வரலாற்றிலேயே இரட்டை சாதனை படைத்துள்ளார்.

ஆஸ்கர் மேடையில் சிங்க பெண் சாதனை

இந்த ஆண்டின் 98வது ஆஸ்கர் விருது வழங்கும் விழாவில் 'Sinners' திரைப்படம் பல பிரிவுகளில் வெற்றி பெற்று கவனம் பெற்றது. சிறந்த நடிகர், சிறந்த திரைக்கதை, சிறந்த ஒரிஜினல் ஸ்கோர், சிறந்த ஒளிப்பதிவு உள்ளிட்ட முக்கிய விருதுகளை குவித்த இந்த படம், விழாவின் முக்கிய பேச்சு பொருளாக மாறியது.

அதில் முக்கியமாக பேசப்பட்டது Autumn Durald Arkapaw-வின் சாதனையே. அவர் சிறந்த ஒளிப்பதிவாளர் விருதை வென்றதன் மூலம், ஆஸ்கர் வரலாற்றில் இந்த பிரிவில் விருது பெறும் முதல் பெண் என்ற பெருமையை பெற்றுள்ளார்.

அதுமட்டுமல்ல, பிலிப்பைன்ஸ் மற்றும் ஆப்பிரிக்க அமெரிக்க கிரியோல் வம்சாவளியைச் சேர்ந்த அவர், இந்த பிரிவில் விருது வென்ற முதல் கறுப்பினப் பெண் என்ற இரட்டை வரலாறையும் படைத்துள்ளார்.

பெண்களுக்கு வழி காட்டிய வெற்றி

ஒளிப்பதிவு என்பது பெரும்பாலும் ஆண்கள் ஆதிக்கம் செலுத்தும் துறையாகக் கருதப்பட்டு வந்தது. ஆனால் அந்த எல்லைகளை உடைத்து Autumn Durald Arkapaw இன்று உலகம் முழுக்க பேசப்படும் பெயராக மாறியிருக்கிறார்.

இந்த வெற்றி, ஒரு தனிநபரின் சாதனை மட்டுமல்ல; திரைப்படத் துறையில் கனவு காணும் பல பெண்களுக்கு ஒரு பெரிய ஊக்கமாக பார்க்கப்படுகிறது.

இன்னொரு தொழில்நுட்ப சாதனை

'Sinners' படத்தில் பணியாற்றியபோது Arkapaw மற்றொரு தொழில்நுட்ப சாதனையையும் படைத்துள்ளார். IMAX 65mm மற்றும் Ultra Panavision போன்ற உயர் தர கேமராக்களை பயன்படுத்தி ஒரு திரைப்படத்தை படமாக்கிய முதல் பெண் ஒளிப்பதிவாளர் என்ற பெருமையும் அவருக்கு கிடைத்துள்ளது.

மேடையில் உருக்கமான நன்றி

விருதை பெற்றுக்கொண்டபோது அவர் பேசிய வார்த்தைகள் பலரையும் உருக்கின. குறிப்பாக, திரைப்பட துறையில் பணிபுரியும் பெண்களுக்கு அவர் நன்றி தெரிவித்தார். மேலும், முன்னதாக ஆஸ்கருக்கு பரிந்துரைக்கப்பட்டிருந்த ஒளிப்பதிவாளர் Rachel Morrison குறித்து குறிப்பிட்டுப் பேசிய அவர்,

"இந்த துறையில் நான் நடந்து செல்லும் பாதையை பல பெண்கள் முன்பே திறந்துவைத்துள்ளனர். அவர்களால் தான் இப்படி ஒரு தருணம் எனக்கு கிடைத்திருக்கிறது. இந்த அன்புக்கும் ஆதரவுக்கும் நான் நன்றி சொல்ல விரும்புகிறேன்" என்று கூறினார்.

உலகம் முழுக்க பாராட்டு

Autumn Durald Arkapaw-வின் இந்த வெற்றி தற்போது உலகம் முழுவதும் பாராட்டுகளை பெற்று வருகிறது. பலர் அவரை "சினிமாவின் சிங்கப் பெண்" என்று அழைத்து சமூக வலைதளங்களில் வாழ்த்துகளை தெரிவித்து வருகின்றனர்.

ஒரு காலத்தில் பெண்களுக்கு வாய்ப்பு குறைவாக இருந்த துறையில், இன்று ஒரு பெண் உலகின் மிக உயர்ந்த திரைப்பட விருதை வென்று வரலாறு படைத்திருப்பது - சினிமா உலகம் எவ்வளவு மாறி வருகிறது என்பதற்கான மிகப் பெரிய சான்றாக பார்க்கப்படுகிறது.

அதனால் தான், இந்த வெற்றி ஒரு சாதாரண விருது வெற்றி அல்ல... பெண்கள் கனவு காணும் போது உலகமே கைதட்டும் என்பதை நிரூபித்த வரலாற்று தருணம் என்று ரசிகர்களும் சினிமா உலகமும் ஒருமித்த குரலில் கூறி வருகின்றன.