ஷார்ஜா கிரேன் விபத்தில் 3 இந்தியர்கள் பலி

ஷார்ஜா:

ஷார்ஜாவில், ராட்சத கிரேனின் பாகம் ஒன்று உடைந்து வாகனத்தின் மீது விழுந்ததில் அதிலிருந்த 3 இந்தியர்கள்உள்ளிட்ட 9 பேர் பலியானார்கள்.

ஷார்ஜா- துபாய் எல்லைப் பகுதியான அல் நஹ்டாவில் அடுக்குமாடிக் கட்டடம் ஒன்று கட்டப்பட்டு வருகிறது.இன்று கட்டடத்தின் 16 வது மாடியில் ராட்சத கிரேன் ஒன்றின் உதவியோடு கட்டுமானப் பணிகள் நடைபெற்றுவந்தன. அப்போது கிரேனின் நீளமான இரும்பு பாகம் ஒன்று உடைந்து, அவ்வழியே தொழிலாளர்களை ஏற்றிச்சென்ற வேன் மீது விழுந்தது.

இந்த விபத்தில், 8 பேர் சம்பவ இடத்திலேயே பலியானார்கள். 3 பேர் காயங்களுடன் குவைத் மருத்துவமனையில்அனுமதிக்கப்பட்டனர். அங்கு சிகிச்சை பலனளிக்காமல் மேலும் ஒருவர் இறந்தார்.

இறந்தவர்களில் மஜூதார் உத்பால், சர்ணாவத் (22), ஜலிலா ரிஜி (28) ஆகிய 3 இந்தியர்களும் அடங்குவர்.இன்னும் இரண்டு பேரின் அடையாளம் தெரியவில்லை. இறந்தவர்களில் வேன் டிரைவரும் ஒருவர்.

ஐக்கிய அரபுக் குடியரசு நாட்டில் இந்த மாதத்தில் நடந்த இரண்டாவது கிரேன் விபத்து இதுவாகும். கடந்த 3ம் தேதிஅபுதாபியில் 130 மீட்டர் கிரேன் சாலையில் சரிந்து விழுந்ததில் ஒருவர் பலியானார்.