மீண்டும் மதமாற்ற தடை சட்டம் தேவை: பாஜக

சென்னை:

கட்டாய மதமாற்றத் தடை சட்டத்தை தமிழக அரசு மீண்டும் கொண்டு வர வேண்டும் என்று பாஜக தேசிய செயலாளர் இல.கணேசன் கூறியுள்ளார்.

பெட்ரோல், டீசல், கேஸ் விலை உயர்வைக் கண்டித்து தென் சென்னை மாவட்ட பாஜக சார்பில் மயிலாப்பூரில் பாஜகவினர் ஆர்ப்பாட்டம் நடத்தினர். ஆர்ப்பாட்டத்திற்குப் பின்னர் இல.கணேசன் செய்தியாளர்களிடம் பேசுகையில்,

கட்டாய மதமாற்றத் தடைச் சட்டம் மிகவும் நியாயமான சட்டம். இதை ரத்து செய்துள்ளதை நாங்கள் ஏற்கவில்லை. இச்சட்டத்தை மீண்டும் அமல்படுத்த வேண்டும் என்று நாங்கள் வலியுறுத்துவோம்.

தமிழகத்தில் மக்களவைத் தேர்தலில் பாஜகவுக்குக் கிடைத்த தோல்வியை நாங்கள் ஒப்புக் கொள்கிறோம். உள்ளூர்ப் பிரச்சினைக்கு வாக்காளர்கள் அதிக முக்கியத்துவம் கொடுத்து விட்டனர்.

பெட்ரோலியப் பொருட்கள், கேஸ் விலை உயர்வினால் நடுத்தர வர்க்க மக்கள் அதிகம் பாதிக்கப்படுவார்கள். எனவே இதனை வாபஸ் பெற வேண்டும் என்றார் அவர்.