அதிமுக வேட்பாளர் செல்லூர் ராஜூ பயோ-டேட்டா

மதுரை:மதுரை மேற்கு தொகுதி இடைத் தேர்தலில் அதிமுக வேட்பாளராக அறிவிக்கப்பட்டுள்ள செல்லூர் கே.ராஜூவின் பயோ-டேட்டா.

ராஜூவின் தந்தை பெயர் காமாட்சி தேவர், தாயார் ஒச்சம்மாள், மனைவி ஜெயந்தி. இவருக்கு ரம்யா, செளமியா என்ற இரண்டு மகள்களும், தமிழ்மணி என்ற மகனும் உள்ளனர்.

பிஎஸ்சி பட்டதாரியான ராஜு முக்குலத்தோர் பிரிவில் பிரமலைக்கள்ளர் வகுப்பைச் சேர்ந்தவர். (சசிகலாவும் இந்த வகுப்பை சேர்ந்தவரே). இளம் வயதிலிருந்தே தீவிர எம்ஜிஆர் விசிறி. அதிமுக தொண்டர்.

முதலில் மதுரை 16வது வட்ட அதிமுக செயலாளரானார். 1996-2001ம் ஆண்டில் மதுரை மாநகராட்சி கவுன்சிலராகி எதிர்க்கட்சித் தலைவராகவும் இருந்தார்.

2001ம் ஆண்டு நடைபெற்ற மேயர் தேர்தலில் செ.ராமச்சந்திரனை (திமுக) எதிர்த்து போட்டியிட்டு தோல்வி அடைந்தார். அதிமுக நகர் மாவட்டச் செயலாளராக இருமுறை பதவி வகித்துள்ளார்.

அதிமுக மற்றும் அதன் கூட்டணி சார்பில் நடைபெற்ற அனைத்து போராட்டங்களிலும் பங்கேற்றவர். கடந்த சட்டசபை தேர்தலின் போதும் மதுரை மேற்குத் தொகுதியில் போட்டியிட வாய்ப்பு கேட்டிருந்தார்.

ஆனால் எஸ்வி சண்முகத்திற்கு வாய்ப்பளிக்கப்பட்டது. தேர்தலில் வெற்றி பெற்ற சண்முகம் மதுரையில் நடந்த அரசு விழாவில் பங்கேற்று திமுக அரசுக்கு ஆதரவாக மாறினார். இதனால் அவர் மீது கட்சி நடவடிக்கை எடுத்து கட்சி பதவிகளில் இருந்து நீக்கப்பட்டார்.

பின்னர் உடல் நலக் குறைவால் திடீரொன கடந்த பிப்ரவரி மாதம் மரணமடைந்தார். இதையடுத்து இப்பகுதியில் இடைத்தேர்தல் அறிவிக்கப்பட்டு மனுதாக்கல் நடைபெற்று வருகிறது.

இப்போது வேட்பாளராக ராஜூ அறிவிக்கப்பட்டுள்ளார். மேற்கு தொகுதி மக்களுக்கு நன்கு அறிமுகமானவர். தொகுதி சார்பான பல்வேறு பொதுப் பிரச்சனைகளுக்கு தீர்வு காண பல போராட்டங்களில் பங்கேற்றவர்.

வேட்பாளராக அறிவிக்கப்பட்ட பின் செய்தியாளர்களிடம் பேசிய ராஜூ,

மதுரை மேற்குத் தொகுதியில் அடிப்படை வசதிகளை மேம்படுத்தவும், நெசவாளர்கள் பிரச்சனை, போக்குவரத்துப் பிரச்சனைக்கு தீர்வு காணவும் தொடந்து முயற்சிகள் மேற்கொள்வேன். இப்பகுதியில் இனி வெள்ள நீர் பாதிப்பு ஏற்படாமல் இருக்க அனைத்து நடவடிக்கைகளையும் மேற்கொள்வேன் என்றார்.

பின்னர் ஜெயலலிதாவையும் சந்தித்து தனது நன்றியைத் தெரிவித்துக் கொண்டார்.