ஷரபோவாவிடம் சானியா மிர்ஸா தோல்வி

சாண்டியாகோ:அமெரிக்காவின் சாண்டியாகோ நகரில் நடந்து வரும் அக்யூரா கிளாசிக் டென்னிஸ் போட்டியின் காலிறுதிச் சுற்றில் உலகின் நம்பர் டூ வீராங்கனையான ரஷ்யாவின் மரியா ஷரபோவாவிடம் இந்தியாவின் சானியா மிர்ஸா தோல்வி அடைந்துவிட்டார்.

அமெரிக்க டென்னிஸ் அரங்கைக் கலக்கி வரும் சானியா அக்யூரா கிளாசிக் டென்னிஸ் போட்டியின் காலிறுதிச் சுற்றுக்குத் தகுதி பெற்றிருந்தார்.

கடந்த 15 நாட்களாக அடுத்தடுத்து வெற்றிகளைச் சுவைத்து வரும் சானியா, அக்யூரா டென்னிஸ் போட்டியின் 3வது சுற்றுப் போட்டியில், ரஷ்யாவின் டினாரா சபீனாவை 6-1, 6-2 என்ற நேர் செட்களில் வீழ்த்தி சபீனாவுக்கு அதிர்ச்சி அளித்தார். உலக அளவில் 14வது இடத்தில் இருப்பவர் சபீனா. சானியாவோ 31வது இடத்தில்தான் உள்ளார்.

இதையடுத்து காலிறுதிப் போட்டிக்கு முன்னேறிய சானியா உலகின் இரண்டாம் நிலை வீராங்கனையான ரஷ்யாவின் மரியா ஷரபோவாவை இன்று சந்தித்தார்.

ஆனால், போட்டியின் ஆரம்பத்தில் இருந்தே மரியாவின் கையே ஓங்கியிருந்தது. சானியாவை 6-2, 6-1 என்ற நேர் செட்களில் எளிதாக வென்ற ஷரபோவா அடுத்த சுற்றுக்கு முன்னேறிவிட்டார்.

இதுவரை இருவரும் 2 போட்டிகளில் தான் நேருக்கு நேராக மோதியுள்ளனர். கடந்த 2005ம் ஆண்டு இதே அக்யூரா டென்னிஸ் போட்டியின் நான்காவது சுற்றில் இருவரும் சந்தித்தனர். அந்த போட்டியிலும் ஷரபோவா தான் வெற்றி பெற்றார் என்பது குறிப்பிடத்தக்கது.

இந்த போட்டியில் சானியா வெற்றி பெற்றிருந்தால் உலகத்தர வரிசையில் பல படிகள் முன்னேறியிருப்பார்.