அதிமுக - பாஜக கூட்டணி வருமா?br/வரலாம் என்கிறார் இல.கணேசன்!

திருநெல்வேலி:

எதிர் வரும் நாடாளுமன்றத் தேர்தலில் திமுக, கம்யூனிஸ்டுகள் மற்றும் காங்கிரஸ் கட்சியைத் தவிர பிற கட்சிகளுடன் பாஜக கூட்டணி அமைக்கும் வாய்ப்புகள் உள்ளன என்று தமிழக பாஜக தலைவர் இல.கணேசன் கூறியுள்ளார்.

நெல்லையில் இல.கணேசன் செய்தியாளர்களிடம் பேசுகையில், காங்கிரஸ் ஆட்சியில் கம்யூனிஸ்ட் கட்சிகள்தான் நல்ல நிலையில் உள்ளனர். லோக்சபாவுக்கு எப்போது தேர்தல் வந்தாலும் பாஜக தான் ஆட்சியை பிடிக்கும்.

லோக்சபா தேர்தல் கூட்டணி குறித்து முடிவு செய்யப்படவில்லை.
பாஜகவின் அகில இந்திய பார்வையாளர் ரவிசங்கர் பிரசாத் அதிமுக பொதுச் செயலாளர் ஜெயலலிதாவை சந்தித்தது நட்புணர்வு காரணமாக நடந்தது.

விரைவில் நாடாளுமன்றத் தேர்தல் வரும். இது தேசிய அளவில் மட்டுமின்றி மாநில அளவிலும் பல மாற்றத்தை ஏற்படுத்தலாம். திமுக, காங், கம்யூ தவிர பிற கட்சிகளுடன் பாஜக கூட்டணி வைக்க வாய்ப்புள்ளது.

வரும் 12ம் தேதி ராமர் பால பாதுகாப்பு இயக்கம் சார்பில் நாடு தழுவிய போராட்டம் நடத்தப்படுகிறது. ராமர் பாலம் இடிப்பதை தடுக்க கோரி 19ம் தேதி மாநாடும், 18ம் தேதி நெல்லையில் செயற்குழுவும், 19ம் தேதி பொதுகுழுவும் நடைபெறுகிறது. பாளை வ.உ.சி மைதானத்தில் நடைபெறும் இக்கூட்டத்தில் 19ம் தேதி அத்வானி கலந்து கொள்கிறார் என்றார்.