மும்பையில் திமுக அலுவலகம் மீது தாக்குதல் - 4 தொண்டர்கள் காயம்

மும்பை:

மும்பை தாராவி பகுதியில் உள்ள திமுக அலுவலகத்தை பாஜகவினர் தாக்கினர். அலுவலகத்தில் இருந்த நான்கு தொண்டர்களையும் சரமாரியாக தாக்கிக் காயப்படுத்தினர்.

சென்னையில் நேற்று பாஜக தலைமை அலுவலகம் மீது திமுகவினர் கடும் தாக்குதல் தொடுத்தனர். இதேபோல தமிழகம் முழுவதும் பாஜக, இந்து முன்னணி, வி.எச்.பி. அலுவலகங்கள் குறி வைத்துத் தாக்கப்பட்டன. இந்த அமைப்புகளின் கொடிக் கம்பங்களும் வெட்டித் தள்ளப்பட்டன.

இந்த நிலையில் நேற்று மும்பை தாராவி பகுதியில், உள்ள திமுக அலுவலகத்தை பாஜகவைச் சேர்ந்த சிலர் வந்து தாக்கினர். அலுவலகப் பொருட்களை சூறையாடினர். அப்போது அங்கு இருந்த நான்கு தமிழர்களையும் சரமாரியாக தாக்கிக் காயப்படுத்தி விட்டுச் சென்றனர்.

தமிழர்கள் அதிகம் உள்ள தாராவி பகுதியில் இந்த வெறித் தாக்குதல் நடந்திருப்பதால் அப்பகுதி தமிழர்கள் பீதியடைந்துள்ளனர்.

இதேபோல, அயோத்தியில் முதல்வர் கருணாநிதியின் உருவ பொம்மையை எரித்து இந்து அமைப்பினர் போராட்டம் நடத்தினர்.