பல் துலக்குவதில் புதிய உலக சாதனை; 14,000 பேர் பல் துலக்கினர்!

சென்னை:

சென்னையில் 14 ஆயிரம் மாணவ, மாணவியர் ஒரே இடத்தில் கூடி பல் துலக்கி புதிய உலக சாதனை படைத்துள்ளனர்.

சென்னை நேரு ஸ்டேடியத்தில் இந்த நிகழ்ச்சிக்கு ஏற்பாடு செய்யப்பட்டிருந்தது. இந்திய பல் மருத்துவ சங்கம் இந்த நிகழ்ச்சியை ஒருங்கிணைத்து நடத்தியது.

கின்னஸ் உலக சாதனை படைப்பதற்காக நடத்தப்பட்ட இந்த நிகழ்ச்சியில் சென்னை நகரைச் சேர்ந்த 75க்கும் மேற்பட்ட பள்ளிகளைச் சேர்ந்த 14 ஆயிரத்திற்கும் மேற்பட்ட மாணவ, மாணவியர் இதில் கலந்து கொண்டு ஒரே நேரத்தில் பேஸ்ட், பிரஷ்ஷைக் கொண்டு பல் துலக்கினர்.

இதற்கு முன்பு மணிலாவில் 10 ஆயிரம் பேர் சேர்ந்து பல் துலக்கியதுதான் உலக சாதனையாக இருந்தது. தற்போது சென்னை மாணவர்கள் அந்த சாதனையை முறியடித்துள்ளனர் என்று இந்திய பல் மருத்துவ சங்கத்தின் செயலாளர் டாக்டர் ரங்கராஜன் தெரிவித்தார்.