ஏர்ஏசியாவின் எக்கானமி கட்டணத்தில் பிசினஸ் வகுப்பு
டெல்லி:
மலேசியாவைச் சேர்ந்த ஏர்ஏசியா-10 விமான நிறுவனம் எக்கானமி கட்டணத்தில் பிசினஸ் வகுப்பில், இந்தியாவுக்குப் பயணம் செய்யும் புதிய சேவையை அறிமுகப்படுத்தியுள்ளது.
நவம்பர் மாதம் முதல் இந்த சேவை அமலுக்கு வருகிறது. முதலில் சீனாவின் டியான்ஜின் மற்றும் செங்க்டு நகரங்களுக்கு வாரம் ஐந்து விமான சேவையை இந்த நிறுவனம் அறிமுகப்படுத்துகிறது.
அதன் பின்னர் ஆஸ்திரேலியாவின் அவலோன், கோல்டு கோஸ்ட் மற்றும் நியூகேஸில் நகரங்களுக்கு வாரம் நான்கு விமானங்களை அறிமுகப்படுத்தவுள்ளது.
தென் கிழக்கு ஆசியாவின் மிகப் பெரும் பட்ஜெட் விமான நிறுவனத்தின் பிரிவுதான் ஏர் ஏசியா-10.
இந்த நிறுவனம் பிசினஸ் வகுப்புகளில் மட்டுமே இருக்கும் வகையிலான இருக்கை வசதிகளை, எக்கானமி வகுப்புகளுக்கு வழங்கவுள்ளதுதான் இந்த விமான சேவையின் விசேஷம்.
வழக்கமான விமானங்களில் உள்ள பிசினஸ் வகுப்புகளுக்கான வசதியை, ஏர் ஏசியாவின் எக்கானமி வகுப்பில் பயணிகள் அனுபவிக்க முடியும். இதற்காக சற்றே கூடுதலாக தர வேண்டியிருக்கும்.
மலேசியாவிலிருந்து ஆஸ்திரேலியாவுக்கு செல்வதற்கு கட்டணம் 99 டாலர்கள் என்பது குறிப்பிடத்தக்கது.