மத்திய அரசிடம் 7 லட்சம் கேஸ் இணைப்புகள் கோரும் தமிழக அரசு!!

சென்னை:

தமிழக அரசின் இலவச காஸ் இணைப்பு மற்றும் காஸ் அடுப்புத் திட்டத்தின் கீழ் 7 லட்சம் புதிய இணைப்புகளை வழங்க உடனடி நடவடிக்கை எடுக்க வேண்டும் என மத்திய அரசுக்கு, தமிழக அரசு கோரிக்கை விடுத்துள்ளது.

இதுதொடர்பாக முதல்வர் கருணாநிதியின் உத்தரவின் பேரில், மத்திய பெட்ரோலியத் துறை அமைச்சர் முரளி தியோராவை, தமிழக உணவுத் துறை அமைச்சர் ஏ.வ.வேலு, மத்திய அமைச்சர் ராசா ஆகியோர் சந்தித்து கோரிக்கை விடுத்தனர்.

நேற்று நடந்த இந்த சந்திப்பின்போது, தமிழகத்தில் 69 இடங்களில் உள்ள தமிழக அரசின் சிவில் சப்ளைஸ் கழகம் மற்றும் கூட்டுறவு சங்கங்களை காஸ் இணைப்புகளை வழங்கும் ஏஜென்சிகளாக அறிவிக்க வேண்டும் எனவும் அமைச்சர் வேலு முரளி தியோராவிடம் கோரிக்கை விடுத்தார்.

தமிழக அரசின் இந்தக் கோரிக்கை குறித்து உரிய முறையில் பரிசீலித்து விரைவில் நடவடிக்கை எடுக்கப்படும் என முரளி தியோரா உறுதியளித்துள்ளதாக தமிழக அரசின் செய்திக்குறிப்பில் தெரிவிக்கப்பட்டுள்ளது.