கேபிள் டிவி ஆபரேட்டர்களுக்கு கலைஞர் டிவியின் புது ஆர்டர்!

திருநெல்வேலி: கலைஞர் டிவியின் நிகழ்ச்சிகள் குறித்த விளம்பரங்களை, இலவசமாக ஒளிபரப்பு வேண்டும் என தமிழகத்தில் உள்ள கேபிள் டிவி ஆபரேட்டர்களுக்கு ரகசிய உத்தரவு ஒன்று அனுப்பப்பட்டுள்ளதாம்.

திமுகவுக்கும், சன் டிவிக்கும் நல்லுறவு நிலவிய போது, திமுக ஆட்சிக்கு வந்த பின்னர், தமிழக கேபிள் டிவி ஆபரேட்டர்ளுக்கு தினகரன் நாளிதழின் சார்பில் சிடி ஒன்று அனுப்பப்பட்டது.

அதில் உள்ள தினகரன் நாளிதழ் குறித்த விளம்பரத்தை தினசரி இலவசமாக ஒளிபரப்ப வேண்டும் என சன் டிவி கூறியிருந்தது. தற்போது அவர்களுக்குள் விரிசல் ஏற்பட்டுள்ளதால் அந்த விளம்பரம் காணாமல் போனது.

ஆனால் இப்போது கலைஞர் டிவியிலிருந்து ஒரு புது உத்தரவு வந்துள்ளதாம்.

அக்டோபர் 22ம் தேதியிட்ட, கலைஞர் தொலைக்காட்சியின் லோகோ இடம் பெற்றுள்ள லட்டர் பேடில், சேலத்திலிருந்து செயல்பட்டு வரும் Wel mediyas என்ற நிறுவனத்திற்கு ஒரு கடிதம் அனுப்பப்பட்டுள்ளது.

அந்த கடிதத்தில், இத்துடன் இணைக்கப்பட்டுள்ள கலைஞர் டிவியின் Promos DVDயை ஒளிபரப்பு செய்ய வேண்டும் என்று குறிப்பிடப்பட்டுள்ளது. அந்த டிவிடியை மேற்படி நிறுவனம் தமிழகத்தில் உள்ள கேபிள் டிவி ஒளிபரப்பாளர்களுக்கு கலைஞர் டிவி கடிதம் மற்றும் Wel mediyas கடிதத்துடன் இணைத்து அனுப்பி வைத்துள்ளது.

இதில் டிவிடியில், பிண்ணனி இசையுடன் கலைஞர் டிவியின் லோகோ முதலில் வருகிறது. அதன் பின் ரேகா ஐ.பி.எஸ், மஞ்சள் மகிமை, மானாட மயிலாட, தேன்மொழியாள், நம்ம குடும்பம் ஆகிய 5 நாடகங்களின் விளம்பரம், 1 நிமிடம் ஓடும் அளவுக்கு 3 கட்டமாக பதிவு செய்யப்பட்டு இடம் பெற்றுள்ளது.

ஒரு மணி நேரத்திற்கு ஒரு தடவை இந்த டிவிடியை ஒளிபரப்பு செய்ய வேண்டும் என்றும் குறிப்பிடப்பட்டுள்ளதாம்.

இந்த உத்தரவை நிறைவேற்றாவிட்டால் என்னென்ன பிரச்சினைகள் வருமோ என்ற பயத்தில் கேபிள் டிவி ஆபரேட்டர்கள் உள்ளனர்.