புலி ஆதரவாளர்கள் காங்கிரசின் எதிரிகள்-கிருஷ்ணசாமி

சென்னை: விடுதலைப் புலிகளை எதிர்ப்பதால் மக்களிடத்தில் செல்வாக்கு குறையாது என்று தமிழக காங்கிரஸ் தலைவர் கிருஷ்ணசாமி தெரிவித்துள்ளார்.

செய்தியாளர்களிடம் அவர் பேசுகையில்,

இந்தியாவின் ஒற்றுமைக்கும், ஒருமைப்பாட்டுக்கும் பாடுபட்டு வரும் பாரம்பரியமிக்க இயக்கம் காங்கிரஸ். நாட்டு மக்களுக்காக தியாகம் செய்த கட்சி. இதன் செல்வாக்கையோ, மரியாதையோ மக்கள் மத்தியில் கடுகளவும் குறையாது. யாராலும் அதனை குறைக்க முடியாது.

தமிழர்களுக்காக குரல் கொடுக்கும் இயக்கம் காங்கிரஸ். தமிழ் மக்கள் எங்கே பாதிக்கப்பட்டாலும் அவர்களுக்காக தொடர்ந்து வாதிடுவதுடன் போராட்டம் நடத்துவோம். மலேசியாவில் பாதிக்கப்பட்டுள்ள தமிழர்களை பாதுகாக்கவும் மத்திய அரசிடம் வலியுறுத்தியுள்ளோம்.

ஈழத் தமிழர்கள் நலனில் காங்கிரஸ் கட்சிக்கு எப்போது முழு அக்கறை உண்டு. ஆனால் தடை செய்யப்பட்ட விடுதலைப் புலிகள் உள்ளிட்ட இயக்கங்களுக்கு ஆதரவாக இருப்பவர்கள் காங்கிரஸ் கட்சிக்கு எப்போதும் எதிரிகள் தான் என்றார் கிருஷ்ணசாமி.