ரஷ்ய நாடாளுமன்றத் தேர்தல்: புதின் கட்சி வெற்றி

மாஸ்கோ: ரஷ்ய நாடாளுமன்றத் தேர்தலில் அதிபர் விலாடிமிர் புதினின் ஐக்கிய ரஷ்ய கட்சி பெரும் வெற்றி பெற்றுள்ளது.

ரஷ்ய நாடாளுமன்றத்திற்குப் (டூமா) பொதுத் தேர்தல் நடந்தது. இதில் புதின் கட்சியே மிகப் பெரிய வெற்றியைப் பெறும் என்று ஏற்கனவே கருத்துக் கணிப்புகள் தெரிவித்திருந்தன. இந்த நிலையில் தேர்தலில் பதிவான வாக்குகளை எண்ணும் பணி நேற்று தொடங்கியது.

இதில் புதினின் ஐக்கிய ரஷ்ய கட்சி பெரும் வெற்றி பெற்றுள்ளது. நேற்று இரவு வரை எண்ணப்பட்ட 40 சதவீத வாக்குகளில் 63.6 சதவீத வாக்குகளை புதின் கட்சி பெற்றுள்ளது.

இதுகுறித்து ரஷ்ய தலைமைத் தேர்தல் ஆணையர் விலாடிமிர் சுரோவ் கூறுகையில், ஆரம்ப கட்ட வாக்கு எண்ணிக்கை நிலவரப்படி கம்யூனிஸ்ட் கட்சிக்கு 11.3 சதவீத வாக்குகளும், லிபரல் ஜனநாயகக் கட்சிக்கு 9.6 சதவீத வாக்குகளும், ஜஸ்ட் ரஷ்யா கட்சிக்கு 7.2 சதவீத வாக்குகளும் கிடைத்துள்ளன.

நாடாளுமன்றத்திற்குள் நுழையத் தேவையான குறைந்தபட்ச வாக்குகளான 7 சதவீதத்தை மற்ற கட்சிகள் எதுவும் தொடவில்லை.

தேர்தலில் மொத்தம் 60 சதவீத வாக்குகள் பதிவாகின. கடந்த 2003ல் நடந்த தேர்தலின்போது 55.75 சதவீத வாக்குகள் பதிவாகியிருந்தன என்றார் சுரோவ்.

தேர்தல் வெற்றி குறித்து ஐக்கிய ரஷ்ய கட்சித் தலைவரும், நாடாளுமன்ற சபாநாயகருமான போரிஸ் கிரைஸ்லோவ் கூறுகையில், இது புதினுக்குக் கிடைத்த வெற்றி. எங்களுக்குக் கிடைத்துள்ள மிகப் பெரிய பெரும்பான்மை பலத்தை வைத்து அரசியல் சட்டத்தை மாற்றும் நடவடிக்கையில் ஈடுபட மாட்டோம் என்றார்.

கம்யூனிஸ்ட் கட்சித் தலைவர் ஜென்னடி யுகனோவ் கூறுகையில், தேர்தலில் நிறைய குளறுபடிகள், மோசடிகள் நடந்துள்ளன. இதை எதிர்த்து வழக்குப் போடுவோம் என்றார்.