முதல்வர்கள் மாநாடு: 18ம் தேதி கருணாநிதி டெல்லி பயணம்

சென்னை: டெல்லியில் மாநில முதல்வர்கள் பங்கேற்கும் தேசிய வளர்ச்சிக் கவுன்சில் கூட்டத்தில் கலந்து கொள்வதற்காக வருகிற 18ம் தேதி முதல்வர் கருணாநிதி டெல்லி செல்கிறார்.

வருகிற 19ம் தேதி டெல்லியில் பிரதமர் மன்மோகன் சிங் தலைமையில் தேசிய வளர்ச்சிக் கவுன்சில் கூட்டம் நடைபெறுகிறது. இதற்காக டெல்லி செல்லும் கருணாநிதி 20ம் தேதி சென்னை திரும்புவார்.

டெல்லி பயணத்தின்போது கேரள முதல்வருடன் முல்லைப் பெரியாறு அணை விவகாரம் தொடர்பாக கருணாநிதி பேச்சு நடத்துவார் என்று தெரிகிறது. இதற்கான ஏற்பாடுகளை பிரதமர் உத்தரவின் பேரில் மத்திய நீர்வளத்துறை செய்து வருகிறது.

மேலும் பிரதமர், காங்கிரஸ் தலைவர் சோனியா காந்தி உள்ளிட்ட தலைவர்களையும் கருணாநிதி தனியே சந்தித்துப் பேசவுள்ளார்.

தீவிரவாதம்-முதல்வர்கள் மாநாடு

இந் நிலையில் தீவிரவாதத்தை ஒழிக்க வரும் 21ம் தேதி டெல்லியில் அனைத்து மாநில முதலமைச்சர்கள் மாநாடு நடக்கிறது.

இதில் தமிழகத்தின் சார்பில் மூத்த அமைச்சர்களில் ஒருவர் பங்கேற்பார் என்று தெரிகிறது.