அமெரிக்க குடியரசுக் கட்சி: துணை அதிபர் வேட்பாளர் பாபி ஜிண்டால்?

நியூயார்க்: குடியரசுக் கட்சியின் துணை அதிபர் வேட்பாளராக இந்திய வம்சாவளியைச் சேர்ந்த பாபி ஜிண்டால் அறிவிக்கப்படக் கூடும் என்று எதிர்பார்க்கப்படுகிறது.

ஜனநாயகக் கட்சி சார்பில் அதிபர் வேட்பாளராக தேர்வாகியுள்ள பாரக் ஓபாமா, தனது கட்சியின் துணை அதிபர் வேட்பாளராக ஜோசப் பிடனை அறிவித்துள்ளார்.

இதையடுத்து குடியரசுக் கட்சியின் துணை அதிபர் வேட்பாளர் யார் என்ற எதிர்பார்ப்பு எழுந்துள்ளது. இந்தப் பதவிக்கு லூசியானா மாகாண ஆளுநர் பாபி ஜிண்டால் அறிவிக்கப்படலாம் என்ற எதிர்பார்ப்பு எழுந்துள்ளது.

குடியரசுக் கட்சியின் அதிபர் பதவி வேட்பாளராக ஏற்கனவே ஜான் மெக்கெய்ன் தேர்வாகியுள்ளார் என்பது குறிப்பிடத்தக்கது.

செப்டம்பர் 1ம் தேதி முதல் மின்னசோட்டாவின் செயின்ட் பால் நகரில் நடைபெறவுள்ள குடியரசுக் கட்சியின் தேசிய மாநாட்டில், இடம் பெற்றுள்ள முக்கிய பேச்சாளர்களில் ஜிண்டாலும் ஒருவர்.

நான்கு நாள் நடைபெறும் இந்த மாநாட்டில் அவரது உரை முக்கியத்துவம் பெறுகிறது. அன்றைய கூட்டத்தில் அவர் துணை அதிபர் வேட்பாளராக அறிவிக்கப்படலாம் என எதிர்பார்க்கப்படுகிறது. மேலும் அன்றைய கூட்டத்தில் ஜான் மெக்கெய்ன் முறைப்படி வேட்பாளராக அறிவிக்கப்படுகிறார்.

செப்டம்பர் 3ம் தேதி இரவு 10 மணி முதல் 11 மணிக்குள் ஜிண்டால் உரை நிகழ்த்துவார் என அறிவிக்கப்பட்டுள்ளது. அவருக்கு அடுத்து துணை அதிபர் வேட்பாளர் யார் என்பது அறிவிக்கப்படவுள்ளதால், ஜிண்டால் மீதான எதிர்பார்ப்பு அதிகரித்துள்ளது.