இன்று அமெரிக்க தேர்தல்-ஒபாமா Vs மெக்கெய்ன்

வாஷிங்டன்: அமெரிக்க அதிபர் தேர்தல் இன்று நடக்கிறது. இந்திய நேரப்படி இன்று மாலை வாக்குப் பதிவு தொடங்கியது. நாளை மாலை முடிவுகள் வெளியாகும்.

ஜனநாயகக் கட்சியின் வேட்பாளர் பராக் ஒபாமாவும், குடியரசுக் கட்சியின் வேட்பாளர் ஜான் மெக்கெய்னும் கடைசி கட்ட வாக்கு சேகரிப்பில் தீவிரமாக ஈடுபட்டனர்.

ஒபாமா சிகாகோவிலும் மெக்கெயின் அரிசோனாவிலும் தங்களது கடைசி பிரச்சாரத்தை மேற்கொண்டனர்.

கிட்டத்தட்ட 21 மாதங்களாக நடந்து வந்த தேர்தல் பிரச்சாரம் ஓய்ந்து இன்று வாக்குப் பதிவு நடக்கிறது. வாக்குப் பதிவு முடிந்தவுடனேயே வாக்கு எண்ணிக்கை துவங்கிவிடும்.

இந்திய நேரப்படி நாளை மாலை 5 மணி முதல் முடிவுகள் வெளியாகத் துவங்கிவிடும்.

அமெரிக்க தேர்தல் முறை:

ஒவ்வொரு மாகாணத்துக்கும் ஒரு குறிப்பிட்ட புள்ளிகள் (Electoral College) உண்டு. அதிக மாகாணங்களில் வென்று அதிக புள்ளிகளை வெல்பவரே அதிபராவார்.

நாட்டிலேயே மிகப் பெரிய மாகாணமான கலிபோர்னியாவில் வென்றால் 55 புள்ளிகள் கிடைக்கும். மிகச் சிறிய மாகாணமான கொலம்பியாவில் வென்றால் 3 புள்ளிகள் தான் கிடைக்கும்.

இதனால் யார் அதிகபட்சமான பெரிய மாகாணங்களில் வெல்கிறார்களோ அவர்களுக்கே வெற்றி சாத்தியமாகும்.

மொத்தம் எல்லா மாகாணங்களையும் சேர்த்து 538 புள்ளிகள் உள்ளன. அதிபராக குறைந்தபட்சம் 270 புள்ளிகளை வெல்ல வேண்டும்.

அமெரிக்காவின் இந்த ஓட்டுமுறையால் நாடு முழுவதும் அதிகமான வாக்குகளைப் பெற்றவர் தான் அதிபராக முடியும் என்ற நிலை இல்லை. அங்கே புள்ளிக் கணக்கே முக்கியமாகும்.

உதாரணத்துக்கு, 2000ம் ஆண்டு தேர்தலில் ஜார்ஜ் புஷ் நாடு முழுவதும் வாங்கிய ஓட்டு 47.87%. அவரை எதிர்த்து நின்ற அல் கோர் வாங்கி ஓட்டு 48.38%. ஆனால், புஷ் வென்ற புள்ளிகள் (Electoral College votes) 271. கோர் வென்றது 266 தான்.

ஒரு கட்டத்தில் இருவரும் சரி சம நிலையில் இருக்க புளேரிடாவில் கிடைத்த வெற்றியால் 25 புள்ளிகளை வென்ற புஷ் ஆட்சியைப் பிடித்தார். அந்த மாநிலத்தில் இருவருக்கும் இடையே நிலவிய ஓட்டு வித்தியாசம் வெறும் 537 ஓட்டுக்கள் தான்.

இந்தப் புள்ளிக் கணக்கை அமெரிக்கா கையாளக் காரணம், எல்லா மாகாணத்துக்கும் சமமான நிர்ணய பலம் கிடைப்பது தான். மாகாணத்தின் மக்கள் தொகையையும் பிற விஷயங்களையும் கணக்கில் வைத்த இந்த புள்ளிகள் நிர்ணயிக்கப்படுவதால், மாகாணங்களின் ஓட்டுக்கு உரிய பலமும் மரியாதையும் கிடைக்கிறது.

உதாரணத்துக்கு கலிபோர்னியாவின் மக்கல் தொகை அமெரிக்க மக்கள் தொகையில் 12.03 சதவீதம். ஆனால், அந்த மாகாணத்துக்கு ஒதுக்கப்பட்டு்ள்ள புள்ளிகள் 55 தான். இது மொத்த புள்ளிகளில் 10.22% சதவீதம் தான்.

அதே நேரத்தில் மிகச் சிறிய மக்கள் தொகை கொண்ட (அமெரிக்காவின் மொத்த மக்கள் தொகையில் 0.18%) வியோமிங் மாகாணத்திற்கு தரப்படும் புள்ளிகள் 3. இது மொத்த புள்ளிகளில் 0.56% ஆகும்.

இந்த புள்ளிகளின் எண்ணிக்கையை வைத்துத் தான் அமெரிக்க நாடாளுமன்றம் (House of Representatives), செனட் சபை ஆகியவற்றுக்கு எம்பிக்கள் நியமிக்கப்படுகின்றனர். இதனால் மக்கள் தொகை குறைவாக இருந்தாலும் மாகாணத்துக்கு உரிய பலம் (புள்ளிகள்) கிடைக்க இந்த தேர்தல் முறை வழி வகுக்கிறது.

இதனால் தான் பெரும் குழப்பமாக இருந்தாலும் இந்த முறையையே அமெரிக்கா கையாளுகிறது.

ஹாம்சையரில் ஒபாமாவுக்கு வெற்றி:

இதற்கிடையே ஹாம்ப்சையர் மாகாணத்தில் டிக்ஸ்வி்ல்லே நாட்ச் பகுதியில் பதிவான 21 வாக்குகளில் 15ல் ஒபாமா வென்று முதல் வெற்றியை பதிவு செய்துவிட்டார்.

நாடு முழுவதும் ஓட்டெடுப்பு இன்று மாலை தான் நடக்கிறது என்றாலும் சில மாகாணங்களில் சில பகுதிகளில் கடந்த ஒரு வாரமாகவே வாக்கெடுப்பு நடப்பது குறிப்பிடத்தக்கது. அந்த வகையில் ஒபாமாவுக்கு முதல் வெற்றி கிடைத்துள்ளது.

ஒபாமா பாட்டி மரணம்:

இந்நிலையில் ஒபாமாவின் பாட்டி மேடலின் பெய்ன் டன்ஹம் வடக்கு கரோலினாவில் உள்ள சார்லட் என்ற இடத்தில் மரணமடைந்தார். பிரச்சாரத்திலிருந்த ஒபாமா இத்தகவலைத் தெரிவித்தார். ஒபாமாவை வளர்த்தவர் அவரது பாட்டிதான் என்பது குறிப்பிடத்தக்கது.