ஓபாமாவுடன் ரஷ்ய அதிபர் மெத்வதேவ் ஆலோசனை

மாஸ்கோ: ரஷ்ய அதிபர் டிமிட்ரி மெத்வதேவ், அமெரிக்க அதிபராக தேர்வு செய்யப்பட்டுள்ள பாரக் ஓபாமாவுடன் தொலைபேசியில் ஆலோசனை நடத்தினார். ரஷ்ய - அமெரிக்க உறவுகளை வலுப்படுத்துவது தொடர்பாக இரு தலைவர்களும் முக்கிய ஆலோசனை நடத்தினர்.

இதுகுறித்து கிரம்ளின் பிரஸ் சர்வீஸ் வெளியிட்டுள்ள செய்திக்குறிப்பில், அமெரிக்க அதிபர் தேர்தலில் ஓபாமா வெற்றி பெற்றதற்கு அதிபர் மெத்வதேவ் வாழ்த்துக்களைத் தெரிவித்துக் கொண்டார்.

இரு நாடுகளுக்கும் இடையிலான உறவு வலுப்பட வேண்டும் என்பதை இரு தலைவர்களும் தங்களது தொலைபேசி பேச்சின்போது வலியுறுத்தினர். அது இரு நாடுகளுக்கும் மட்டுமல்லாது, உலக சமுதாயத்தி்ற்கும் மிகவும் முக்கியமானது என்பதை இரு தலைவர்களும் தெரிவித்தனர்.

உலக சமுதாயம் தற்போது சந்தித்து வரும் பல்வேறு முக்கிய மிரட்டல்கள், பிரச்சினைகள் குறித்து இரு தலைவர்களும் விவாதித்தனர். இதை சமாளிக்க அமெரிக்காவும், ரஷ்யாவும், உலக நாடுகளுடன் இணைந்து செயல்பட வேண்டியதன் அவசியத்தையும் இரு தலைவர்களும் பகிர்ந்து கொண்டனர்.

விரைவில் நேரில் சந்தித்துப் பேச வேண்டும் என்றும் இரு தலைவர்களும் விருப்பம் தெரிவித்துள்ளனர் என்று தெரிவிக்கப்பட்டுள்ளது.