கியூப தலைவர் காஸ்ட்ரோவின் புதிய புகைப்படங்கள் வெளியீடு

ஹவானா: கியூப புரட்சித் தலைவர் பிடல் காஸ்ட்ரோவின் புன்னைக்கும் தோற்றத்திலான புதிய புகைப்படங்கள் இணையதளங்களில் வெளியாகியுள்ளன.

இரண்டு கியூப இணையதளங்கள் இந்த புதிய படங்களை வெளியிட்டுள்ளன. 83 வயதாகும் காஸ்ட்ரோ கடந்த சில ஆண்டுகளாக உடல் நலம் குன்றியுள்ளார். இதனால் பொது இடங்களுக்கு அவர்வருவதில்லை. அவரது புகைப்படங்கள் மட்டுமே அவ்வப்போது வெளியாகி வருகின்றன.

தற்போது வெளியாகியுள்ள படத்தில் புன்னகைத்த படி காணப்படுகிறார் காஸ்ட்ரோ. மேலும், தொழிலாளர்களை வாழ்த்துவது போல அந்தப் புகைப்படம் உள்ளது.

ஹவானாவில் நடந்த தொழிலாளர் நிகழ்ச்சிக்கு காஸ்ட்ரோ வந்துள்ளார். அந்தக் கூட்டத்தில்தான் காஸ்ட்ரோ தொழிலாளர்களை வாழ்த்தினார். அதை தொழிலாளர் ஒருவர் தனது செல்போன் மூலம் எடுத்துக் கொடுத்துள்ளார். அதைத்தான் கியூப இணையதளங்கள் வெளியிட்டுள்ளன.

இதுகுறித்து ரோசா பெயஸ் என்ற பத்திரிக்கையாளர் கூறுகையில், மிகவும் மெலிந்து காணப்படுகிறார் காஸ்ட்ரோ. அதேசமயம், நல்ல உடல்நலத்துடன் அவர் இருக்கிறார். மன ரீதியாகவும் அவர் சிறப்பான நிலையில்இருப்பதாகவும் டாக்டர்கள் கூறுகின்றனர் என்றார்.