மகளின் பேஸ்புக் போட்டோவை வெளியிட்ட எகிப்து அரசு-எல்பராடே கோபம்

கெய்ரோ: எகிப்து அதிபர் தேர்தலில் போட்டியிடுவார் என எதிர்பார்க்கப்படும் முன்னாள் சர்வதேச அணு சக்தி ஏஜென்சியின் தலைவர் முஹம்மது எல்பராடேயின் மகள் லைலா நீச்சலுடையில் இருக்கும் படத்தை எகிப்து அரசு வெளியிட்டதால் கடும் கோபமடைந்துள்ளார் எல்பராடே.

சர்வதேச அணுசக்தி ஏஜென்சியின் தலைவராக இருந்தவர் எல்பராடே. இவர் தன் மகள் நீச்சல் உடையில் இருக்கும் புகைப்படத்தையும், மதுபானங்கள் பரிமாறும் நிகழ்ச்சிகளில் இருக்கும் புகைப்படத்தையும் எகிப்து அரசு தன்னை அவமதிக்கும் வகையில் வெளியிட்டுள்ளது என்று குற்றம் சாட்டியுள்ளார்.

அதிபர் ஹோஸ்னி முபாரக் ஆட்சியில் தன் புகழைக் குறைக்கும் செயல்கள் நடைபெற்று வருவதாகவும் கூறியுள்ளார்.

எகிப்து செய்திதாள்கள் சிலவற்றில் வெளியாகியுள்ள லைலா நீச்சல் உடடையில் இருப்பது, மது பானங்கள் வழங்கும் நிகழ்ச்சியில் பங்கேற்பது ஆகியவை அவரது பேஸ்புக்கில் இருந்து எடுக்கப்பட்டவையாகும். இவற்றை எடுத்து எல்பராடேயின் குடும்ப ரகசியங்கள் என்ற தலைப்பில் வெளியிட்டுள்ளனர்.

இந்த சம்பவம் குறித்து எல்பராடே கூறுகையில்,

இந்த சம்பவம் நாங்கள் ஏன் மாற்றத்தைக் கொண்டுவர விரும்புகிறோம் என்பதை எடுத்துரைப்பதாக உள்ளது. இதற்காகத் தான் ஜனநாயக ஆட்சியைக் கொண்டு வர வேண்டும் என்கிறோம் என்றார் அவர்.