6ம் தேதி முதல் 8ம் தேதி வரை திருவாரூர்-நாகையில் கருணாநிதி சுற்றுப்பயணம்

சென்னை: திமுக தலைவர் கருணாநிதி வரும் 6ம் தேதி முதல் 8ம் தேதி வரை திருவாரூர் மற்றும் நாகை மாவட்டங்களில் சுற்றுப்பயணம் மேற்கொள்கிறார். தி்ருவாரூர் கருணாநிதியின் தொகுதி என்பது குறிப்பிடத்தக்கது.

திமுக தலைவர் கருணாநிதி வரும் 5ம் தேதி இரவு 11.15 மணிக்கு சென்னையில் இருந்து காரைக்கால் செல்லும் கம்பன் எக்ஸ்பிரஸில் கிளம்புகிறார். மறுநாள் அதாவது 6ம் தேதி காலை திருவாரூரை சென்றடைகிறார். அங்கு அவருக்கு அம்மாவட்ட திமுக சார்பில் சிறப்பான வரவேற்பு அளிக்கப்படவிருக்கிறது.

திருவாரூர் சன்னதி தெருவில் உள்ள அவரது அக்கா வீட்டிற்கு சென்று அவர் ஓய்வெடுக்கிறார். அன்று மாலை 6 மணிக்கு நடக்கும் பிறந்தநாள் விழா பொதுக்கூட்டத்தில் கலந்து கொண்டு உரை நிகழ்த்துகிறார்.

அன்று இரவு திருவாரூரில் தங்கும் அவர் 7ம் தேதி காட்டூரில் உள்ள அவரது அம்மா அஞ்சுகத்தம்மாளின் நினைவிடத்திற்கு சென்று மரியாதை செலுத்துகிறார். பின்பு திருவாரூரில் உள்ள தனது அக்கா வீட்டுக்கு திரும்பிச் செல்கிறார்.

வரும் 8ம் தேதி காலை காரில் நாகை புறப்படும் அவர் அங்கு திமுக சார்பில் சேதுசமுத்திர திட்டத்தை நிறைவேற்றக் கோரி நடக்கும் ஆர்ப்பாட்டத்தில் பங்கேற்று பேசுகிறார். அதன் பிறகு திருவாரூர் திரும்புகிறார்.

அன்று இரவு காரைக்காலில் இருந்து சென்னை செல்லும் கம்பன் எக்ஸ்பிரஸ் ரயிலில் சென்னை திரும்புகிறார்.

English summary

DMK supremo Karunanidhi is touring in Thiruvarur and Nagapattinam districts from july 6 till july 8.