கர்நாடகாவில் 16 வாரிசுகள்.. பாஜகவுக்கு குடும்ப அரசியல் பற்றி பேச தகுதி இருக்கா? குமாரசாமி பதிலடி
பெங்களூரு: கர்நாடக பாஜகவில் உள்ள குடும்ப அரசியல் பிரமுகர்கள் பட்டியலை முன்னாள் முதலமைச்சர் குமாரசாமி வெளியிட்டு கடுமையாக விமர்சித்துள்ளார்.
இந்தியாவில் காங்கிரஸ், திமுக, தெலங்கானா ராஷ்டிரிய சமிதி, சிவசேனா என பல்வேறு மாநிலங்களில் ஆட்சியில் இருக்கும் கட்சிகளின் வாரிசுகளும், ஆட்சியில் இருந்த கட்சிகளின் வாரிசுகளும் தீவிர அரசியலில் ஈடுபட்டு வருகின்றனர். இதனை எதிர்ப்பதாக பாஜக தரப்பில் எப்போதும் பிரச்சாரம் மேற்கொள்ளப்படும்.
அமித் ஷா பேச்சு
முக்கியமாக வாரிசு அரசியலுக்கு எதிராக கட்சி பாஜக என்றும், பாஜகவில் குடும்ப அரசியல் இல்லை என்றும் கூறி எதிர்க்கட்சிகளை விமர்சிப்பர். அண்மையில் தெலங்கானாவில் நடைபெற்ற பாஜக செயற்குழு கூட்டத்தில் பேசிய அமித் ஷா, இந்தியாவில் குடும்ப அரசியலை முடிவுக்கு கொண்டு வர வேண்டும் என்று பேசியிருந்தார்.
கொதித்த குமாரசாமி
இதனிடையே கர்நாடகா முன்னாள் முதலமைச்சர் குமாரசாமியை, லக்கி சிஎம் என்றும், அக்கட்சியை அப்பா - மகன் கட்சி என்று பாஜகவினர் விமர்சித்து வருகின்றனர். இதற்கு பதிலடி கொடுக்கும் வகையில், ட்விட்டர் பக்கத்தில் குமாரசாமி நீண்ட பதிவு ஒன்றை பதிவிட்டுள்ளார். அதில் கர்நாடக பாஜகவில் உள்ள குடும்ப வாரிசுகளையும் பட்டியலிட்டுள்ளார். அந்தப் பதிவில், நான் அதிர்ஷ்டத்தின் மூலமாக முதலமைச்சர் ஆனேன் என்று நீங்கள் கூறுகிறீர்கள். தற்போது முதலமைச்சராக உள்ள பசவராஜ் பொம்மை மக்கள் ஆதரவுடன் தேர்ந்தெடுக்கப்பட்டாரா? என்று கேள்வி எழுப்பினார்
பட்டியல் வெளியீடு
தொடர்ந்து மதசார்பற்ற ஜனதாதளம் கட்சி குடும்ப அரசியல் செய்வதாக குற்றம்சாட்டுகின்றனர். ஏன் பாஜகவில் குடும்ப அரசியல் இல்லையா? என்று கேள்வி எழுப்பினார். இதோடு, கர்நாடக பாஜகவில் இருக்கும் குடும்ப வாரிசுகளின் பட்டியலையும் வெளியிட்டுள்ளார். அதில், எடியூரப்பா & சன்ஸ், ரவி சுப்ரமணி-தேஜஸ்வி சூர்யா, அசோக-ரவி, வி.சோமன்னா-அருண் சோமன்னா, அரவிந்த் லிம்பாவலி-ரகு, எஸ்.ஆர்.விஸ்வநாத்-வாணி விஸ்வநாத், ஜகதீஷ் ஷெட்டர்-பிரதீப் ஷெட்டர், முருகேஷ் நிராணி-ஹனுமத் நிராணி, ஜி.எஸ்.பசவராஜு-ஜோதி கணேஷ், ஜார்கிஹோலி குடும்பம், கட்டி குடும்பம், ஜோல்லே குடும்பம், அங்காடி குடும்பம், உதாசி குடும்பம், ஸ்ரீராமுலு குடும்பம், ரெட்டி சகோதரர்கள் என்று 16 பேர் பட்டியலை வெளியிட்டுள்ளார்.
குமாரசாமி கேள்வி
தொடர்ந்து, உங்கள் குடும்ப ஆட்சி பட்டியல் இன்னும் நிறைய இருக்கிறது. பாஜக என்பதே குடும்ப அரசியலின் சங்கிலித் தொடர் என்பதை நான் அறிவேன். கர்நாடகாவில் மட்டுமே இந்த பட்டியல். பாஜகவில் உள்ள நாடு தழுவிய வாரிசு அரசியலை நான் அம்பலப்படுத்தட்டுமா? என்று விமர்சித்துள்ளார்.
Click it and Unblock the Notifications
Sign in with Google