சித்தராமையாவை தாக்க முயற்சி? திடீரென ஆக்ரோஷமாக மேடையேறிய இளைஞரால் பரபரப்பு! என்ன நடந்தது?

Updated: Sunday, September 15, 2024, 12:46 [IST]

Subscribe to Oneindia Tamil

பெங்களூர்: பெங்களூர் விதான சவுதாவின் முன்பு நடந்த நிகழ்ச்சியின் மேடையில் முதல்வர் சித்தராமையா அமர்ந்து இருந்தார். அப்போது திடீரென்று ஆக்ரோஷமாக பார்வையாளர் பகுதியில் இருந்து ஜம்ப் செய்து மேடையில் ஏறிய இளைஞரை அங்கிருந்த பாதுகாவலர்கள் தடுத்து இழுத்து சென்ற சம்பவம் பெரும் பரபரப்பை ஏற்படுத்தியது.

கர்நாடகாவில் காங்கிரஸ் கட்சியின் ஆட்சி நடக்கிறது. முதல்வராக சித்தராமையா உள்ளார். இந்நிலையில் தான் பெங்களூர் விதான சவுதா (கர்நாடகா சட்டசபை கட்டடம்) முன்பு இன்று ஜனநாயக நாள் கொண்டாட்டம் நடந்தது. இதற்கான நிகழ்ச்சியில் முதல்வர் சித்தராமையா, அமைச்சர்கள் பங்கேற்றனர்.

இந்த நிகழ்ச்சியில் அமைச்சர் மகாதேவப்பா மேடையில் பேசி கொண்டிருந்தார். அப்போது சித்தராமையா மேடையில் போடப்பட்டு இருந்த இருக்கையில் அமர்ந்து இருந்தார். இந்த வேளையில் திடீரென்று மேடை முன்பு அமர்ந்திருந்த பார்வையாளர்கள் கூட்டத்தில் இருந்து இளைஞர் ஒருவர் ஆக்ரோஷமாக மேடையை நோக்கி ஓடினார்.

மேடை அருகே சென்றதும் ஜம்ப் செய்து சித்தராமையாவை நோக்கி ஓட முயன்றார். இதை கவனித்த பாதுகாவலர்கள் உடனடியாக அந்த இளைஞரை தடுத்தனர். இதனால் அவர் மேடையில் விழுந்தார். அதன்பிறகு அங்கிருந்த பாதுகாவலர்கள் அவரை குண்டுகட்டாக இழுத்து சென்று போலீஸ் வாகனத்தில் ஏற்றிச் சென்றனர். இந்த இளைஞர் யார்? அவரது பின்னணி என்ன? என்பது உடனடியாக தெரியவில்லை.

மேலும் அவர் மேடை ஏறியபோது பாதுகாவலர்கள் தடுத்தபோது காவி நிற ஷாலை கையில் இருந்து தூக்கி வீசினார். இதனால் அவர் பாஜக அல்லது இந்து அமைப்பை சேர்ந்தவரா? சித்தராமையாவை தாக்க மேடை ஏறினாரா? என்ற சந்தேகம் எழுந்துள்ளது.

இது ஒருபுறம் இருந்தாலும் கூட அந்த காவி ஷால் என்பது பிரமுகர்களுக்கு போர்த்தப்படும் பொன்னாடை போன்று உள்ளது. இதனால் சித்தராமையாவின் தீவிர ஆதரவாளரா அவர்? போலீசுக்கு பயந்து வேகமாக மேடைேயேறி ஷாலை சித்தராமையாவுக்கு அணிவிக்க முயன்றாரா? என்ற கோணத்திலும் இந்த விசாரணை நடத்தப்பட்டு வருகிறது.

இந்த சம்பவம் அங்கு பெரும் பரபரப்பை ஏற்படுத்தியது. இருப்பினும் கூட நிகழ்ச்சி தடைப்படவில்லை. நிகழ்ச்சி தொடர்ந்து நடந்து வந்தது. போலீசாரின் முழு விசாரணைக்கு பிறகே அந்த இளைஞர் யார்? பின்னணி என்ன? என்பது பற்றிய அனைத்து விபரங்களும் தெரியவரும் என்பது குறிப்பிடத்தக்கது.