SBI, HDFC, ICICI, etc வாடிக்கையாளரா நீங்கள்? இனி டென்ஷன் இல்லை! ரிசர்வ் வங்கி அறிவித்த குட் நியூஸ்!

Updated: Tuesday, May 19, 2026, 10:56 [IST]

Subscribe to Oneindia Tamil

சென்னை: நீங்களோ அல்லது உங்களுக்குத் தெரிந்தவர்களோ ஒரு வங்கிக் கணக்கை மூடிவிட்டு வேறொரு புதிய கணக்கிற்கு மாறும்போது பட்ட அவஸ்தைகள் நினைவிருக்கிறதா? பழைய கணக்கில் கொடுத்து வைத்திருந்த மாதத் தவணை (EMI), மியூச்சுவல் ஃபண்ட் முதலீடு (SIP) போன்ற பணப் பரிவர்த்தனைகளை (Mandates) புதிய கணக்கிற்கு மாற்றுவதற்குள் போதும் போதும் என்று ஆகிவிடும். ஒருவேளை இரண்டு வங்கிகள் ஒன்றிணைக்கப்பட்டால் (Bank Mergers) கேட்கவே வேண்டாம், ஏகப்பட்ட குழப்பங்கள் வரும்.

ஆனால், இனி பொதுமக்களுக்கு அந்த கவலை இருக்காது. இதற்கெல்லாம் முற்றுப்புள்ளி வைக்கும் வகையில், இந்திய ரிசர்வ் வங்கி (RBI) தனது 'பேமெண்ட்ஸ் விஷன் 2028' (Payments Vision 2028) திட்டத்தின் ஒரு பகுதியாக, PaSS (Payments Switching Service) என்ற புதிய சேவையைக் கொண்டுவர ஆலோசித்து வருகிறது.

'PaSS' என்றால் என்ன? இது எப்படிச் செயல்படும்?

எளிமையாகச் சொன்னால், நாம் ஒரு மொபைல் நெட்வொர்க்கில் இருந்து மற்றொரு நெட்வொர்க்கிற்கு மொபைல் நம்பரை மாற்றும் 'போர்ட்டபிலிட்டி' (Portability) வசதியைப் பயன்படுத்துகிறோம் அல்லவா? அதேபோல உங்கள் வங்கிக் கணக்கையும் ஒரு வங்கியில் இருந்து மற்றொரு வங்கிக்கு மாற்றிக்கொள்ளும் வசதிதான் இது.

மத்திய அரசால் உருவாக்கப்பட உள்ள இந்த மையப்படுத்தப்பட்ட வசதி (Centralised Facility) மூலம், வாடிக்கையாளர்கள் தங்களின் பழைய வங்கிக் கணக்கில் இருக்கும் அனைத்து பணப் பரிவர்த்தனை விவரங்களையும் எவ்வித சிரமமும் இன்றி புதிய வங்கிக் கணக்கிற்குத் தானாகவே மாற்றிக்கொள்ள முடியும்.

இந்தத் திட்டத்தில் இரண்டு முக்கிய வசதிகள் இருக்கும்:

முழுமையான மாற்றம் (Full Switch): பழைய கணக்கில் இருக்கும் அத்தனை இஎம்ஐ, எஸ்ஐபி மற்றும் இதர பணப் பரிவர்த்தனை ஆணைகளையும் ஒரே நேரத்தில் புதிய கணக்கிற்கு மாற்றிவிடுவது.

பகுதி மாற்றம் (Partial Switch): குறிப்பிட்ட சில பரிவர்த்தனைகளை மட்டும் புதிய கணக்கிற்கு மாற்றிவிட்டு, சிலவற்றை பழைய கணக்கிலேயே தொடரச் செய்வது.

இதன் மூலம் எஸ்பிஐ, ஹெச்டிஎஃப்சி, ஐசிஐசிஐ என நீங்கள் எந்த வங்கி வாடிக்கையாளராக இருந்தாலும், கணக்கை மாற்றும்போது மீண்டும் புதிய படிவங்களை நிரப்பி, ஒவ்வொரு நிறுவனத்திற்கும் அலைய வேண்டிய அவசியம் இனி இருக்காது.

வாடிக்கையாளர்களுக்குக் கிடைக்கும் நன்மைகள் என்னென்ன?

ஒரே இடத்தில் கட்டுப்பாடு: உங்கள் வங்கிக் கணக்குடன் இணைக்கப்பட்டுள்ள அனைத்துப் பணப் பரிவர்த்தனைகளையும் ஒரே இடத்தில் கண்காணிக்கவும், கட்டுப்படுத்தவும் முடியும்.

வங்கிகள் இணைப்பு நேரங்களில் சுலபம்: வங்கிகள் ஒன்றிணைக்கப்படும் போது, வாடிக்கையாளர்களின் தரவுகள் எந்தவிதத் தடங்கலும் இன்றி சுமுகமாகப் புதிய வங்கிக்கு மாறிவிடும்.

அபராதங்களில் இருந்து தப்பிக்கலாம்: கணக்கு மாற்றத்தால் இஎம்ஐ அல்லது எஸ்ஐபி பணம் எடுப்பதில் தாமதம் ஏற்பட்டு, அதற்கு வங்கி விதிக்கும் அபராதக் கட்டணங்கள் (Late Payment Charges) மற்றும் சிபில் ஸ்கோர் (CIBIL Score) பாதிப்பு போன்ற ஆபத்துகள் இனி வராது.

சிறந்த சேவைக்கான சுதந்திரம்: எந்த வங்கியில் வட்டி விகிதம் அதிகமாக இருக்கிறது, எங்குச் சிறந்த சேவை கிடைக்கிறது என்பதைப் பார்த்து வாடிக்கையாளர்கள் தங்களுக்குப் பிடித்த வங்கிக்கு எளிதாக மாறலாம். இது வங்கிகளுக்கு இடையே ஆரோக்கியமான போட்டியையும் உருவாக்கும்.

டிஜிட்டல் மோசடிகளைத் தடுக்க அதிரடி திட்டங்கள்

இவை தவிர, ஆன்லைன் பணப் பரிவர்த்தனை மோசடிகளைத் தடுக்கவும், பாதுகாப்பை அதிகரிக்கவும் வேறு சில முக்கியத் திட்டங்களையும் ரிசர்வ் வங்கி கையில் எடுத்துள்ளது.

டிஜிட்டல் பரிவர்த்தனைகளை வாடிக்கையாளர்களே தற்காலிகமாக ஆன் (On) அல்லது ஆஃப் (Off) செய்துகொள்ளும் புதிய வசதி அறிமுகப்படுத்தப்பட உள்ளது. இதன் மூலம் தேவையில்லாத நேரங்களில் ஆன்லைன் பரிவர்த்தனைகளை முடக்கி வைத்து மோசடிகளில் இருந்து தப்பிக்கலாம்.

அதேபோல், ஆன்லைன் மோசடிகளில் வாடிக்கையாளர் பணத்தை இழந்தால், அதற்குப் பொறுப்பேற்கும் விதிகளிலும் மாற்றம் வரவுள்ளது. தற்போதுள்ள 'வரையறுக்கப்பட்ட பொறுப்பு' (Limiting Liability) முறைக்கு மாற்றாக, 'பகிர்ந்து கொள்ளப்பட்ட பொறுப்பு' (Shared Responsibility) என்ற புதிய கட்டமைப்பு வரவுள்ளது. இதன்படி, ஆன்லைன் மோசடி நடந்தால் பணத்தை அனுப்பிய வாடிக்கையாளரின் வங்கியும், பணத்தைப் பெற்றுக் கொண்ட மோசடி நபரின் வங்கியும் கூட்டாகச் சேர்ந்து அந்த இழப்பிற்குப் பொறுப்பேற்க வேண்டும்.

ஒட்டுமொத்தத்தில், ஆர்பிஐ-யின் இந்த புதிய திட்டங்கள் சாதாரண மக்களின் வங்கிப் பயன்பாட்டை எளிமையாக்குவதுடன், டிஜிட்டல் பணப் பரிவர்த்தனைகளை மிகவும் பாதுகாப்பானதாக மாற்றும் என்பதில் சந்தேகமில்லை.