சென்னையில் சதமடித்த சின்ன வெங்காயம்! கண்ணீர் விடும் நுகர்வோர்கள்!!

சென்னை: வரத்து குறைந்ததால் சென்னை சில்லறை விற்பனைக் கடைகளில் சின்ன வெங்காயம் கிலோ ரூ.100 வரை விற்பனை செய்யப்படுவதால் நுகர்வோர்கள் கலக்கமடைந்துள்ளனர்.

வெளி மாநிலங்களில் பெரிய வெங்காயத்தின் விலை ரூ.100க்கு விற்பனையாகிறது. ஆனால் சென்னையில் பெரிய வெங்காயம் 60 ரூபாய்க்கு விற்பனை செய்யப்பட்டது. ஆனால் சின்ன வெங்காயத்தின் விலை ஏற்ற இறக்கமாகவே இருந்து வருகிறது.

சென்னையில் கடந்த 6 மாதங்களில் அதிகபட்சமாக கடந்த வாரம் ஒரு கிலோ சின்ன வெங்காயம் ரூ.60 முதல் ரூ.65 வரை விற்பனை செய்யப்பட்டது.

தற்போது மொத்த விற்பனையில் சின்ன வெங்காயத்தின் விலை உயர்ந்ததால் சென்னையில் பல்வேறு பகுதிகளில் உள்ள சில்லறை விற்பனைக் கடைகளில் கால் கிலோ சின்ன வெங்காயம் ரூ.25-க்கும், ஒரு கிலோ ரூ.100 வரையிலும் விற்பனையானது. இதற்கு வரத்து குறைவே காரணம் என்று கூறப்படுகிறது.

சென்னை கோயம்பேடு மார்க்கெட்டுக்கு தமிழகத்தில் தாராபுரம், மதுரை, திண்டுக்கல், தேனி உள்ளிட்ட மாவட்டங்களில் இருந்தும் ஆந்திரம், கர்நாடகம், மகாராஷ்டிரம் உள்ளிட்ட வெளி மாநிலங்களில் இருந்தும் தினமும் சின்ன வெங்காயம் விற்பனைக்காக கொண்டு வரப்படுகிறது.

தற்போது சின்ன வெங்காயத்தின் சீசன் செப்டம்பர் மாதத்தோடு முடிவடைந்ததால் மேற்கண்ட பகுதிகளில் வெங்காயச் சாகுபடி பரப்பளவு வழக்கத்தை விட குறைந்துவிட்டது. இதனால் மார்க்கெட்டுக்கு கொண்டுவரப்படும் வெங்காயத்தின் வரத்தும் குறைந்து விட்டது.

இந்த நிலையில் கோயம்பேடு மார்க்கெட்டில் வியாழக்கிழமை ஒரு கிலோ முதல் தர சின்ன வெங்காயம் கிலோவுக்கு ரூ.10 விலை உயர்ந்து ரூ.75-க்கு விற்பனையானது. 2-ம் தர வெங்காயம் ரூ.55 முதல் ரூ.65 வரை விற்கப்பட்டது. இன்றைய தினம் சில்லரை விலையில் சின்ன வெங்காயம் கிலோ ரூ.100க்கு விற்பனை செய்யப்படுகிறது.

கோயம்பேடு மார்க்கெட்டிற்கு தினமும் லாரி ஒன்றுக்கு 15 டன்கள் வீதம் 8 முதல் 10 லாரிகளில் 90 டன் வரை வெங்காயம் விற்பனைக்காக கொண்டுவரப்பட்டது. தற்போது 4 அல்லது 5 லாரிகளில் மட்டுமே சின்ன வெங்காயம் கொண்டுவரப்படுகிறது இதுவே விலை உயர்வுக்கு காரணம் என்கின்றனர் விற்பனையாளர்கள்.

விலை அதிகரித்ததால் வழக்கமாக அதிகளவில் வாங்கும் பொதுமக்கள் மற்றும் ஹோட்டல் உரிமையாளர்கள் தற்போது குறைந்த அளவிலான சின்ன வெங்காயத்தையே வாங்கிச்செல்கிறார்கள். சின்ன வெங்காயத்திற்குப் பதில் பெரிய வெங்காயம் கிலோ 60 ரூபாய்க்கு விற்பனையாகிறது எனவே வீட்டிற்கு வாங்குபவர்கள் பெரிய வெங்காயத்தை அதிக அளவில் வாங்கிச் செல்கின்றனர்.

தீபாவளி பண்டிகைக்கு ஒரு வாரமே உள்ளதால் சின்ன வெங்காயத்தின் விலை இதே நிலையே நீடிக்கும் என்கின்றனர் மொத்தவிலை விற்பனையாளர்கள்.

English summary

Small Onion prices touched Rs 100 per kg in Chennai.