அமித்ஷா நாளை வருகை!தமிழக பாஜக தலைவர் அண்ணாமலை தூக்கியடிக்கப்பட்டு புதிய தலைவர் இன்று இரவு அறிவிப்பு?

சென்னை: மத்திய உள்துறை அமைச்சர் அமித்ஷா நாளை தமிழ்நாடு வருகை தருகிறார். தமிழ்நாட்டில் பாஜகவின் மூத்த தலைவர்கள் மற்றும் நிர்வாகிகளுடன் ஆலோசனை நடத்துகிறார் அமித்ஷா. முன்னதாக, தமிழக பாஜக தலைவர் அண்ணாமலை இன்று இரவுக்குள் மாற்றப்பட்டு புதிய தலைவர் அறிவிக்கப்படக் கூடும் என்கின்றன பாஜக வட்டாரங்கள்.

தமிழக பாஜக தலைவர் அண்ணாமலையை மாற்ற வேண்டும் என்பது அதிமுகவின் கூட்டணிக்கான நிபந்தனையாக கூறப்படுகிறது. டெல்லியில் அமித்ஷாவை சந்தித்த, அதிமுக பொதுச்செயலாளர் எடப்பாடி பழனிசாமி இதனை வலியுறுத்தியதாகவும் தகவல்கள் வெளியாகின.

இதனையடுத்து டெல்லி சென்று திரும்பிய அண்ணாமலை, தாம் தமிழக பாஜக தலைவர் பதவியில் நீடிக்கப் போவது இல்லை என தெளிவுபடுத்தினார். மேலும் புதிய பாஜக தலைவருக்கான போட்டியிலும் தாம் இல்லவே இல்லை எனவும் திட்டவட்டமாக தெரிவித்தார் அண்ணாமலை.

இதனால் தமிழ்நாடு பாஜகவின் புதிய தலைவராக நயினார் நாகேந்திரன், வானதி சீனிவாசன் மற்றும் தமிழிசை சவுந்தரராஜன் ஆகியோரில் ஒருவர் அறிவிக்கப்பட வாய்ப்பிருப்பதாக தகவல்கள் வெளியாகின. தமிழக பாஜகவின் புதிய தலைவர் குறித்த அறிவிப்பு ஏப்ரல் 9-ந் தேதி வெளியாகும் எனவும் கூறப்பட்டு வருகிறது.

இந்த நிலையில் மத்திய உள்துறை அமைச்சர் அமித்ஷா நாளை தமிழ்நாடு வருகை தருகிறார். தமிழ்நாட்டில் பாஜகவின் மூத்த தலைவர்கள், நிர்வாகிகளுடன் அமித்ஷா ஆலோசனை நடத்த இருக்கிறார்.

அமித்ஷாவின் தமிழகம் வருகைக்கு முன்னதாக இன்று இரவே தமிழக பாஜக தலைவர் பதவியில் இருந்து அண்ணாமலை நீக்கப்பட்டு புதிய தலைவர் யார் என்ற அறிவிப்பு வெளியாகக் கூடும் என்கின்றன பாஜக வட்டாரங்கள்.

English summary

Union Home Minister Amit Shah is visiting Tamil Nadu tomorrow. He will hold consultations with senior leaders and administrators of the BJP in the state. BJP sources suggest that Tamil Nadu BJP President Annamalai may be replaced by a new leader, with the announcement possibly happening tonight.