40 ஆண்டுகளில் இல்லாத இபிஎப் வட்டி குறைப்பு.. ஊழியர்களைப் பாதிக்கும்.. டிடிவி தினகரன் கண்டனம்..!

Updated: Tuesday, March 15, 2022, 15:50 [IST]

Subscribe to Oneindia Tamil

சென்னை : தொழிலாளர் வருங்கால வைப்பு நிதிக்கான (EPF) வட்டி வீதம் 40 ஆண்டுகளில் இல்லாத அளவுக்கு குறைக்கப்பட்டிருப்பது கண்டனத்திற்குரியது எனவும், கோடிக்கணக்கான ஊழியர்களைப் பாதிக்கும் இந்த முடிவினை இதற்கான வாரியம் திரும்பப் பெற வேண்டும் என வலியுறுத்துவதாக அமமுக பொதுச்செயலாளர் டிடிவி தினகரன் கண்டனம் தெரிவித்துள்ளார்.

பிஎப் என அழைக்கப்படும் தொழிலாளா் வருங்கால வைப்பு நிதிக்கு 2021-222 ஆம் நிதியாண்டுக்கு வழங்கப்படும் வட்டியை 8.1 சதவீதம் குறைத்து வழங்குவதற்கு தொழிலாளர் வருங்கால வைப்பு நிதி அமைப்பு முடிவு செய்துள்ளது.

அசாம் மாநிலம் கவுகாத்தியில் நடைபெற்ற இபிஎப்ஓவின் மத்திய தொழிலாளர் துறை அமைச்சர் பூபேந்தர் யாதவ் தலைமையில் நடைபெற்ற மத்திய அறங்காவலர் குழு கூட்டத்தின் போது இந்த முடிவு எடுக்கப்பட்டது.

தொழிலாளர் வருங்கால வைப்பு நிதி

கடந்த 2 ஆண்டுகளாக தொழிலாளர் வருங்கால வைப்பு நிதி மீதான வட்டி 8.50 சதவீதமாக நீடித்த நிலையில், தற்போது 8.1 சதவீதமாகக் குறைக்கப்பட்டுள்ளது. மத்திய தொழிலாளர் அமைச்சகத்தின் வட்டிக் குறைப்பு முடிவுக்கு மத்திய நிதியமைச்சகம் ஒப்புதல் அளித்ததும், இந்த வட்டி விகிதம் நடைமுறைக்கு வரும்.

வட்டி குறைப்பு

இது கடந்த 40 ஆண்டுகளுக்கு முந்தைய வட்டி விகித அளவுக்குக் குறைவாகும். 1977-78ஆம் ஆண்டில் வருங்கால வைப்பு நிதிக்கு 8 சதவீத வட்டி வழங்கப்பட்டது. அதே நிலைக்கு தற்போது வட்டி விகிதம் குறைக்கப்பட்டுள்ளது.

கடும் கண்டனம்

மத்திய அரசின் இந்த முடிவு தொழிலாளர்கள் வெகுவாக பாதிக்கும் என புகார் எழுந்துள்ள நிலையில் கடும் கண்டனங்கள் எழுந்து வருகிறது. தமிழக முதலமைச்சர் ஸ்டாலின் உள்ளிட்ட பல மாநிலங்களின் முதலமைச்சர்கள், அரசியல் கட்சிகள், தொழிலாளர் அமைப்புகள் இதற்கு எதிராக தங்களது கடும் எதிர்ப்பினை பகிர்ந்து வருகின்றனர். இந்நிலையில் வட்டி குறைப்பு அறிவிப்புக்கு அமமுக பொதுச்செயலாளர் டிடிவி தினகரன் கண்டனம் தெரிவித்துள்ளார்.

டிடிவி தினகரன் வலியுறுத்தல்

இதுதொடர்பாக வெளியிட்டுள்ள ட்விட்டர் பதிவில், " தொழிலாளர் வருங்கால வைப்பு நிதிக்கான (EPF) வட்டி வீதம் 40 ஆண்டுகளில் இல்லாத அளவுக்கு குறைக்கப்பட்டிருப்பது கண்டனத்திற்குரியது. கோடிக்கணக்கான ஊழியர்களைப் பாதிக்கும் இந்த முடிவினை இதற்கான வாரியம் திரும்பப் பெற வேண்டும் என வலியுறுத்துகிறேன்" என கூறியுள்ளார்.