Make in india:இந்திய காரில் பிரிட்டன் பிரதமர்.. ஜெர்மன் காரில் மோடி.. ஒப்பிட்டு விளாசிய ஸ்ரீனிவாசன்

சென்னை: சீனாவில் இருந்து இந்தியாவின் இறக்குமதி தொடர்ந்து அதிகரித்து வருகிறது எனவும், பிரிட்டன் பிரதமர் இந்திய காரில் செல்லும் நிலையில் ஜெர்மன் காரில் பிரதமர் மோடி செல்கிறார். இதுதான் மேக் இன் இந்தியா திட்டமா? என ஆதாரத்தோடு காங்கிரஸ் கட்சியின் பொருளாதார நிபுணர் ஆனந்த் ஸ்ரீனிவாசன் விமர்சனம் செய்துள்ளார்.

மத்தியில் பிரதமர் நரேந்திர மோடி தலைமையில் பாஜக ஆட்சி அமைந்தவுடன் இந்தியாவின் உள்நாட்டு உற்பத்தியை அதிகரிக்க திட்டமிட்டு அதற்கான நடவடிக்கை மேற்கொள்ளப்பட்டு வருகிறது.

இதற்காக தற்சார்பு இந்தியா எனும் கனவை நினைவாக்கும் வகையில் ‛மேக் இன் இந்தியா' திட்டம் செயல்படுத்தப்பட்டுள்ளது.

எதிர்க்கட்சிகள் விமர்சனம்

இந்த மேக் இன் திட்டம் என்பது விண்வெளி, பாதுகாப்பு உள்பட அனைத்து துறைகளுக்கும் தேவையான பொருட்களை இந்தியாவிலேயே தயாரிக்க வேண்டும் என்பதை நோக்கமாக கொண்டது. இத்திட்டம் என்பது மத்திய அரசின் பல துறைகளிலும் தற்போது நடைமுறையில் உள்ளது. இருப்பினும் இந்த திட்டத்தை எதிர்க்கட்சிகள் விமர்சனம் செய்து வருகின்றன.

வார்த்தை அளவில் மட்டும்

ஜிஎஸ்டி உள்ளிட்ட வரி விதிப்பு முறைகளால் சிறு, குறு, நடுத்தர தொழில்கள் முடங்கி உள்ளன. இந்த தொழில்கள் முடங்கிய நிலையில் எப்படி மேக் இன் இந்தியா திட்டம் சாத்தியமாகும். இந்த திட்டம் என்பது இந்தியாவில் வெறும் வார்த்தை அளவில் மட்டுமே உள்ளது. பிற நாடுகளில் இருந்து தொடர்ந்து அதிகளவில் பொருட்கள் இறக்குமதி செய்யப்பட்டு வருகிறது என காங்கிரஸ் உள்ளிட்ட எதிர்க்கட்சிகள் குற்றம்சாட்டி வருகின்றன.

எதிர்க்கட்சிகள் விமர்சனம்

இதற்கு மத்தியில் தான் சில நாட்களுக்கு முன்பு ஒரு தகவல் வெளியானது. அதாவது அண்டை நாடான சீனா உடனான வர்த்தகம் என்பது தொடர்ந்து மேம்பட்டு வரகிறது. இந்தியா-சீனா இடையேயான ஏற்றுமதியை விட இறக்குமதி அதிகரித்துள்ளது. குறிப்பாக தொலைத்தொடர்பு மற்றும் மின் துறைகள் சார்ந்த பொருட்கள் அதிகளவில் சீனாவில் இருந்து இந்தியாவுக்கு இறக்குமதி செய்யப்பட்டுள்ளதாக தகவல்கள் வெளியாகின.

சீனாவிடம் இருந்து இறக்குமதி

மேலும் கடந்த 2014-15ல் சீனா இந்தியா இடையேயான வர்த்தக மதிப்பு சுமார் 72 பில்லியன் டாலராக இருந்த நிலையில் தற்போது இது 59 சதவீதம் வரை அதிரித்து 2021-22ல் 115.4 பில்லியன் டாலராக உயர்ந்துள்ளது. தற்போதைய சூழலில் சீனாவுடனான இந்தியாவின் வர்த்தகம் 125 பில்லியன் டாலரைத் தாண்டியுள்ளது. இதில் இறக்குமதி மட்டுமே 100 பில்லியன் டாலரை தொடும் வகையில் உள்ளது. இருப்பினும் முந்தைய ஆண்டுகளை காட்டிலும் சீனாவுக்கான இந்திய பொருட்களின் ஏற்றுமதி அதிகரித்துள்ளதாக கூறப்படுகிறது.

மேக் இன் இந்தியாவா?

இந்நிலையில் தான் காங்கிரஸ் கட்சியை சேர்ந்தவரும், பொருளாதார நிபுணருமான ஆனந்த் ஸ்ரீனிவாசன் மத்திய பாஜக அரசின் மேக் இன் இந்தியா திட்டத்தை கடுமையாக விமர்சனம் செய்துள்ளார். இதுபற்றி அவர் தனது ட்விட்டர் பக்கத்தில், ‛‛செய்தி - சீனாவிடம் இருந்து இந்தியாவின் இறக்குமதி 34,524 மில்லியன் டாலராக அதிகரிப்பு!!! இதுதான் மேக் இன் இந்தியாவா?'' என கேள்வி எழுப்பி உள்ளார்.

பிரதமர் மோடியை விமர்சனம்

மேலும் அதே ட்விட்டில் பிரதமர் நரேந்திர மோடி, பிரிட்டன் பிரதமர் பயன்படுத்தும் கார்களை குறிப்பிட்டு விமர்சனம் செய்துள்ளார். இதுபற்றி அவர், ‛‛இன்னும் புரியிற மாதிரி சொல்றேன்!!! பிரிட்டன் பிரைம் மினிஸ்டர் இந்தியன் பிராண்ட் கார்ல போராரு.. இந்தியன் பிரைம் மினிஸ்டர் ஜெர்மன் பிராண்ட் கார்ல போறாரு'' என ட்விட்டரில் குறிப்பிட்டுள்ளார்.

விமர்சனத்துக்கான காரணம் என்ன?

அதாவது மேக் இன் இந்தியா திட்டத்தை முன்னெடுத்துள்ள பிரதமர் மோடி mercedes maybach s-650 வகை காரை பயன்படுத்தி வருகிறார். இந்த கார் ஜெர்மன் பிராண்ட்டாகும். அதேபோல் பிரிட்டன் பிரதமர்கள் பொதுவாக ரேஞ்ச் ரோவர் வகை கார்களில் பயணம் செய்வார்கள். இது இந்தியாவின் டாடா மோட்டார் குழுமம் பிரிட்டனில் தயாரிக்கிறது என்பது குறிப்பிடத்தக்கது. இதனை இந்திய பிரதமர் ஜெர்மன் பிராண்ட் காரிலும், பிரிட்டன் பிரதமர் இந்திய பிராண்ட் காரிலும் செல்கிறார்கள் என ஆனந்த் ஸ்ரீனிவாசன் விமர்சனம் செய்துள்ளார்.

English summary

Anand Srinivasan says that India's imports from China are continuously increasing, and while the British Prime Minister is driving an Indian car, Prime Minister Modi is driving a German car. He criticized with evidence that this is the Make in India project.