சென்னை விமான நிலைய தனியார்மயம்.. பிரதமருக்கு விஜய் ரகசிய கடிதம்.. இத்தனை நாள் மறைத்தது ஏன்?
சென்னை: சென்னை சர்வதேச விமான நிலையத்தை இந்திய விமான நிலையங்கள் ஆணையத்திடமிருந்து மாற்றி, புதிய நிர்வாகத்தின் கீழ் கொண்டுவர வேண்டும் என்று தமிழக முதல்வர் விஜய், பிரதமர் நரேந்திர மோடிக்குக் கடிதம் எழுதிய விவகாரம் தமிழக அரசியலில் பெரும் புயலைக் கிளப்பியுள்ளது.
விமான நிலையத்தை தனியார் வசம் ஒப்படைப்பதற்கான இந்த கோரிக்கை அடங்கிய கடிதத்தை ஆகஸ்ட் மாதத் தொடக்கத்திலேயே அனுப்பிவிட்டு, இத்தனை நாட்களாக வெளிப்படையாக அறிவிக்காமல் அரசு ரகசியமாக வைத்திருந்தது ஏன் என்ற கேள்விகள் தற்போது வலுத்து வருகின்றன. எதிர்க்கட்சிகள், இடதுசாரி அமைப்புகள் மற்றும் பொதுமக்கள் மத்தியில் இந்த நடவடிக்கை கடும் விவாதத்தை ஏற்படுத்தியுள்ளது.
கடிதத்தில் விஜய் கூறியது என்ன?
பிரதமருக்கு அனுப்பிய கடிதத்தில் முதல்வர் விஜய் குறிப்பிட்ட முக்கியக் காரணங்கள்:
பயணிகள் மற்றும் சரக்குக் கையாளுகை: சென்னை விமான நிலையத்தில் பயணிகள் வருகை, விமானங்களின் இயக்கம் மற்றும் சரக்கு ஏற்றுமதி-இறக்குமதி ஆகியவை தேவையான வேகத்தில் வளர்ச்சியடையவில்லை. தமிழ்நாடு தொழில் துறையில் தொடர்ந்து முன்னேறி வருகிறது.. பல வெளிநாட்டு முதலீடுகளை ஈர்க்க உலகத் தரம் வாய்ந்த விமான நிலையம் சென்னைக்கு மிகவும் அவசியம்.
புதிய முனையப் பணிகள் மற்றும் வாகன நிறுத்துமிடம் உள்ளிட்ட பல திட்டங்கள் சென்னை மீனம்பாக்கத்தில் தொடர்ந்து தாமதமாகி வருகின்றன. தற்போது நிர்வகித்து வரும் இந்திய விமான நிலையங்கள் ஆணையத்தை நீக்கிவிட்டு, புதிய உலகத் தரம் வாய்ந்த நிறுவனத்திடம் குறிப்பிட்ட கால அவகாசத்திற்குள் பொறுப்பை ஒப்படைக்க வேண்டும்.
இந்தக் கோரிக்கையின் முக்கிய நோக்கமே சென்னை விமான நிலையத்தை தனியார் நிறுவனங்களின் பொறுப்பில் விடுவதுதான் என்பது வெளிப்படையாகியுள்ளது.
இத்தனை நாட்களாக மறைக்கப்பட்டது ஏன்?
இந்தக் கடிதம் எழுதப்பட்டது ஆகஸ்ட் மாதம் .. கடிதம் எழுதி பல வாரங்கள் ஆகியும், தமிழக அரசு இதைப்பற்றி எந்தவொரு அதிகாரப்பூர்வ அறிவிப்பையும் பொதுவெளியில் வெளியிடவில்லை. தற்போதுதான் ஊடகங்கள் மூலம் இக்கடித விவரங்கள் கசிந்து வெளிச்சத்துக்கு வந்துள்ளன.
இதற்குப் பின்னால் சில முக்கியக் காரணங்கள் இருப்பதாக அரசியல் வட்டாரங்கள் சுட்டிக்காட்டுகின்றன:
காஞ்சிபுரம் மாவட்டம் பரந்தூரில் புதிய விமான நிலையம் அமைக்கும் திட்டத்தை, விவசாயிகளின் எதிர்ப்பைக் காரணம் காட்டி விஜய் அரசு சமீபத்தில் கைவிட்டது. அப்போது மீனம்பாக்கம் விமான நிலையத்தையே விரிவுபடுத்துவோம் என்று அரசு அறிவித்தது. ஆனால், மீனம்பாக்கத்தை விரிவுபடுத்துகிறோம் என்ற பெயரில் அதைத் தனியாருக்குத் தாரைவார்க்க முயற்சிப்பதை மக்கள் அறிந்துகொண்டால் கடுமையான எதிர்ப்பு எழும் என்ற தயக்கமே இந்த ரகசியப் போக்குக்குக் காரணம் எனக் கூறப்படுகிறது.
தமிழக வெற்றிக் கழகம் மக்கள் நலன், விவசாயிகள் நலன் மற்றும் எளியோருக்கான அரசியல் எனப் பேசி வந்த நிலையில், ஆட்சிக்கு வந்த சில மாதங்களிலேயே விமான நிலையத்தை அதானி போன்ற பெருநிறுவனங்களின் வசம் ஒப்படைக்கக் கோருவது கட்சிக்கு மக்கள் மத்தியில் சலசலப்பை உருவாக்கும் என அஞ்சப்பட்டது.
ஆகஸ்ட் மாத சட்டமன்றக் கூட்டத்தொடரின் போது இந்த முடிவு விவாதத்திற்கு வராமல் தடுத்து, எந்தவிதக் கேள்விகளுக்கும் பதிலளிக்காமல் நழுவவே கடித விவரங்கள் மறைக்கப்பட்டதாக எதிர்க்கட்சிகள் குற்றம் சாட்டுகின்றன.
எதிர்க்கட்சிகளின் காரசார தாக்குதல்
விஜய் கடிதம் எழுதிய செய்தி வெளியானதும் எதிர்க்கட்சிகள் கடும் கண்டனங்களை முன்வைத்துள்ளன. பரந்தூர் திட்டத்தை ரத்து செய்ததன் உண்மையான சதித் திட்டம் இப்போதுதான் வெளிச்சத்துக்கு வந்துள்ளது என்று முன்னாள் அமைச்சர் டி.ஆர்.பி. ராஜா கடுமையாகச் சாடியுள்ளார். மக்கள் சொத்தை கார்ப்பரேட் நிறுவனங்களுக்கு விற்கவே திட்டமிட்டுக் கடிதத்தை அரசு மறைத்து வைத்திருந்தது என்றும், பல ஆண்டுகள் திட்டமிடப்பட்ட பரந்தூர் திட்டத்தை கைவிட்டுவிட்டு இப்போது தனியார்மயத்துக்குத் துடிக்கிறார்கள் என்றும் திமுக விமர்சித்துள்ளது.
இந்திய கம்யூனிஸ்ட் கட்சி மற்றும் மார்க்சிஸ்ட் கம்யூனிஸ்ட் கட்சி ஆகியவை முதல்வர் விஜய்யின் இந்த நடவடிக்கைக்குக் கடும் எதிர்ப்பு தெரிவித்துள்ளன. இந்திய விமான நிலையங்கள் ஆணையம் கடந்த ஆண்டில் மட்டும் ரூ.6,500 கோடிக்கு மேல் லாபம் ஈட்டிய பொதுத்துறை நிறுவனமாகும். சென்னை விமான நிலையமும் லாபத்தில் இயங்கும் போது, ஏதோ சேவை சரியில்லை என்பதற்காக அதைத் தனியார் வசம் தாரைவார்ப்பது தமிழக மக்களின் பொதுச்சொத்தை விற்பதற்குச் சமம் என்று இடதுசாரிகள் கண்டனம் தெரிவித்துள்ளனர்.
அம்மா மக்கள் முன்னேற்றக் கழகத் தலைவர் டி.டி.வி. தினகரன், சென்னை விமான நிலையத்தைத் தனியார்மயமாக்கும் இந்த ஆபத்தான முடிவை அரசு உடனே திரும்பப் பெற வேண்டும் என்று வலியுறுத்தியுள்ளார்.
விமான நிலையம் போன்ற ஒரு நாட்டின் அடிப்படைப் பொது உள்கட்டமைப்பு பொதுத்துறை வசம் இருக்கும்போதுதான் கட்டணங்கள் நியாயமான அளவில் இருக்கும், அரசுக்கு வருமானம் நேரடியாகக் கிடைக்கும், சாதாரணப் பணியாளர்களின் வேலைவாய்ப்பும் பாதுகாப்பாக இருக்கும்.
மாறாக, டெல்லி, மும்பை, அகமதாபாத் போன்ற நகரங்களைப் போலத் தனியாரிடம் கொடுத்தால் விமான நிலையக் கட்டணங்கள், பார்க்கிங் கட்டணம், உணவுப் பொருட்களின் விலை அனைத்தும் விண்ணைத் தொடும் நிலை வரும் எனப் பயணிகள் கவலைப்படுகின்றனர். நிர்வாகக் குறைபாடுகள் இருந்தால் அதை அரசு நிதியுதவி செய்து, ஊழியர்களைக் கொண்டு சரிசெய்ய வேண்டுமே தவிர, மொத்த விமான நிலையத்தையும் தனியாருக்கு எழுதிக் கொடுப்பது தீர்வாகாது என்பது பலரின் கருத்தாக உள்ளது.
அடுத்தது என்ன?
ஒப்பந்த முறையில் சென்னை விமான நிலையத்தை மாற்றுவது குறித்து ஒன்றிய அரசுதான் இறுதி முடிவெடுக்க வேண்டும். ஆனால், மக்களுக்கான அரசு என்று வாக்குறுதி தந்துவிட்டு, மாநிலத்தின் முக்கிய நுழைவு வாயிலாகத் திகழும் சென்னை விமான நிலையத்தைத் தனியார் வசம் ஒப்படைக்க முதல்வர் விஜய் ஏன் ரகசியமாகக் கடிதம் எழுதினார், அதை ஏன் இத்தனை நாட்களாக மூடி மறைத்தார் என்ற கேள்விக்குத் தமிழக அரசு உரிய வெளிப்படையான பதிலை அளிக்க வேண்டிய கட்டாயத்தில் உள்ளது.
Click it and Unblock the Notifications
Sign in with Google
