காமராஜருக்கு நெருக்கம்! அப்பழுக்கற்ற அரசியல்வாதி.. தீவிர காங்கிரஸ்காரர்.. யார் இந்த குமரி அனந்தன்?

சென்னை: காங்கிரஸ் கட்சியின் முது பெரும் தலைவராக இருந்த குமரி அனந்தன் காலமானார். 5 முறை சட்டமன்ற உறுப்பினராகவும், ஒருமுறை நாடாளுமன்ற உறுப்பினராக இருந்துள்ளார். காமராஜருக்கு நெருக்கமாகவும், அப்பழுக்கற்ற அரசியல்வாதியாகவும், தீவிர காங்கிரஸ்காரராகவும் இருந்த குமரி அனந்தன் யார் என்பதை இங்கு பார்க்கலாம்.

தமிழிசை சவுந்தரராஜனின் தந்தையும் காங்கிரஸ் கட்சியின் முது பெரும் தலைவராக இருந்தவருமான குமரி அனந்தன் காலமானார். 93 வயதில் வயது மூப்பு மற்றும் சிறுநீரக பிரச்சினை காரணமாக மருத்துவமனையில் அனுமதிக்கப்பட்டு இருந்த குமரி ஆனந்தன் காலமானார். மிக நீண்ட அரசியல் பயணம் கொண்ட குமரி ஆனந்தன் யார் என்ற விவரங்களை பார்க்கலாம்.

குமரி அனந்தன் கன்னியாகுமரி மாவட்டத்தில் உள்ள அகத்தீஸ்வரத்தை சேர்ந்தவர். தமிழகத்தின் மிக மூத்த அரசியல்வாதியாக திகழ்ந்த இவர், பெருந்தலைவர் காமராஜருடன் இணைந்து பணியாற்றிய பெருமை கொண்டவர். முன்னாள் தமிழ்நாடு காங்கிரஸ் கட்சித் தலைவர், முன்னாள் எம்பி, எம்.ஏல்வாகவும் இருந்துள்ளார். 5 முறை சட்டமன்ற உறுப்பினராகவும், ஒருமுறை நாடாளுமன்ற உறுப்பினராகவும் தேர்ந்தெடுக்கப்பட்டவர் குமரி அனந்தன்.

2004 ஆம் ஆண்டு தமிழக அரசின் தகைசால் விருது இவருக்கு வழங்கப்பட்டது. விமானத்தில் தமிழில் அறிவிப்பு வெளியிட வேண்டும் என்று வலியுறுத்தி வந்தவர் இலக்கிய செல்வர் குமரி அனந்தன்.
தமிழ் இலக்கியங்களில் புலமை பெற்றவர். இலக்கியப் பேச்சாற்றல் மிக்க தமிழ் இலக்கியவாதி, என்று பன்முகத் திறன் கொண்டவர். மேலும் மதுவிலக்கு, பனை பாதுகாப்பு உள்ளிட்ட பல்வேறு கோரிக்கைகளை வலியுறுத்தி பாதயாத்திரை நடத்தினார்.

இவர் மறைந்த காங்கிரஸ் எம்பி வசந்தகுமாரின் சொந்த அண்ணன் என்பதும் குறிப்பிடத்தக்கது. குமரி அனந்தனின் மனைவி பெயர் கிருஷ்ணகுமாரி. இந்த தம்பதிகளுக்கு 4 மகள்களும் ஒரு மகனும் உள்ளனர். இவரது மகள் தமிழிசை சவுந்தரராஜன் பாஜக மூத்த தலைவராக உள்ளார்.

திருவொற்றியூர், ராதாபுரம் சாத்தான்குளம் ஆகிய சட்டமன்ற தொகுதிகளில் போட்டியிட்டு வெற்றி பெற்றுள்ளார் .1980 காலக் கட்டத்தில் காந்தி காமராஜ் தேசிய காங்கிரஸ் என்ற கட்சியினை தொடங்கினார். திருவொற்றியூர் தொகுதியில் 1980ல் இந்த கட்சி சார்பாக போட்டியிட்டு வென்றார். பின்னர் தனது கட்சியை காங்கிரஸ் கட்சியுடன் இணைத்தார். அதன்பிறகு கடைசி வரை காங்கிரஸ் கட்சி தொண்டராக இருந்தார்.

English summary

Kumari Ananthan, a long-time leader of the Congress party, has passed away. She was a 5-time MLA and once a Member of Parliament. Here is who Kumari Ananthan was, a close associate of Kamaraj, an impeccable politician and a staunch Congressman.