“அதிகப் பிரசங்கித்தனம்”.. காங்கிரஸ் பிரவீன் சக்கரவர்த்தி பதிவால் டென்ஷன் ஆன சிபிஐஎம்!

Updated: Friday, June 5, 2026, 11:29 [IST]

Subscribe to Oneindia Tamil

சென்னை: காங்கிரஸ் சார்பில் ராஜ்யசபா வேட்பாளராக அறிவிக்கப்பட்டுள்ள பிரவீன் சக்கரவர்த்தி, புதிய கூட்டணி குறித்து வெளியிட்ட பதிவை மார்க்சிஸ்ட் கம்யூனிஸ்ட் கட்சி கண்டித்துள்ளது. பிரவீன் சக்கரவர்த்தி வெளியிட்டுள்ள பதிவு "அதிக பிரசங்கித்தனம்" என சிபிஐஎம் மாநில செயலாளர் பெ.சண்முகம் தெரிவித்துள்ளார்.

இந்நிலையில், சிபிஐஎம் மாநில செயலாளர் பெ.சண்முகம் வெளியிட்டுள்ள பதிவில், "புதிய கூட்டணியின் சார்பில் தான் மாநிலங்களவை வேட்பாளராக நிறுத்தப்பட்டு இருப்பதாகவும், அதில் சிபிஐ(எம்) பெயரையும் பிரவீன் சக்கரவர்த்தி குறிப்பிட்டு இருப்பது தவறானது.

கூட்டணி அமைப்பது குறித்தோ, இந்த வேட்பாளருக்கு ஆதரவு கேட்டோ யாரும் எங்களை அணுகவோ, ஆலோசிக்கவோ இல்லை. தவெக ஆட்சி அமைக்க மார்க்சிஸ்ட் கம்யூனிஸ்ட் கட்சி எதன் அடிப்படையில் ஆதரவு தெரிவித்துள்ளோம் என்பது ஏற்கனவே தெளிவாக கூறப்பட்டுள்ளது.
பிரவீன் சக்கரவர்த்தி வெளியிட்டுள்ள பதிவை "அதிக பிரசங்கித்தனம்" என்று தான் சொல்ல வேண்டும்." எனக் குறிப்பிட்டுள்ளார்.

முன்னதாக பிரவீன் சக்கரவர்த்தி எக்ஸ் தளத்தில் வெளியிட்ட பதிவில், "தமிழ்நாடு சமூக நீதி முற்போக்குக் (TVK+INC+VCK+IUML+CPI+CPM) கூட்டணியின் முதல் எம்.பி வேட்பாளராகத் தேர்ந்தெடுக்கப்பட்டதை பெருமையாகவும் பெரும் பொறுப்பாகவும் கருதுகிறேன்.

என் மீது நம்பிக்கை வைத்த ராகுல் காந்தி, தமிழக முதலமைச்சர் விஜய் ஆகியோருக்கு மனமார்ந்த நன்றி. தேர்ந்தெடுக்கப்பட்ட பிறகு, இந்திய நாடாளுமன்றத்தில் தமிழ் மக்களின் துணிச்சலான, விசுவாசமான மற்றும் நேர்மையான குரலாக ஒலிப்பேன் என்று லட்சக்கணக்கான கூட்டணித் தொண்டர்களுக்கு உறுதியளிக்கிறேன்" எனத் தெரிவித்திருந்தார்.

தமிழகத்தில் ஒரு ராஜ்யசபா இடத்திற்கான இடைத்தேர்தல் நடைபெற உள்ளது. இந்த ராஜ்யசபா இடத்தை கூட்டணி கட்சியான காங்கிரஸுக்கு விட்டுக் கொடுத்தது விஜய் தலைமையிலான தவெக. இந்த ராஜ்யசபா இடத்திற்கு வேட்பாளராக பிரவீன் சக்கரவர்த்தி அறிவிக்கப்பட்டுள்ளார்.

தவெக - காங்கிரஸ் கூட்டணி அமைவதற்கு முக்கிய புள்ளியாகச் செயல்பட்ட பிரவீன் சக்கரவர்த்திக்காக, ராஜ்யசபா எம்.பி சீட்டை விட்டுக் கொடுத்துள்ளது தவெக. இந்நிலையில் தான் இந்தக் கூட்டணிக்கு ஒரு பெயரை சூட்டியதோடு, அதில், விசிக, கம்யூனிஸ்ட், மார்க்சிஸ்ட் உள்ளிட்ட கட்சிகளும் இடம்பெற்றுள்ளதாக பதிவிட்டிருந்தார் பிரவீன் சக்கரவர்த்தி. அவரது இந்தப் பதிவு கூட்டணி கட்சிகளுக்குள்ளேயே எதிர்வினையைக் கிளப்பிவிட்டுள்ளது.