இனி நர்ரேட்டிவ் அடியோடு மாறும்! தவெகவை வீழ்த்த திமுக கையில் எடுக்கும் மாஸ்டர் பிளான்!
சென்னை: தமிழக அரசியலின் கள நிலவரம் தற்போது ஒரு முக்கியமான கட்டத்தை எட்டியுள்ளது. ஆளும் தவெக தரப்பில் இருந்து வீசப்படும் ஒவ்வொரு அரசியல் நகர்வுக்கும், எதிர்க்கட்சியான திமுக தொடர்ந்து எதிர்வினை ஆற்றி 'டிஃபென்ஸ்' ஆட்டத்தையே ஆடிக்கொண்டிருக்கிறது.
இது அரசியல் ரீதியாக திமுக செய்யும் மிகப்பெரிய உத்தி ரீதியிலான தவறு என்று அரசியல் பார்வையாளர்கள் சுட்டிக்காட்டுகின்றனர். ஆளும் கட்சியான தவெக கட்சி அமைத்துக் கொடுக்கும் Agenda பின்னால் ஓடிக்கொண்டிருந்தால், அரசியல் ஆட்டத்தையே முழுமையாக விட்டுக்கொடுக்க வேண்டிய நிலை திமுகவிற்கு ஏற்படும். அதாவது தவெக ஏதாவது ஒன்று செய்யும், அல்லது புகார் வைக்கும்.. அதற்கு திமுக பதில் அளித்துக்கொண்டே இருக்க வேண்டிய நிலை ஏற்படும்.
திமுக உடனடியாக செய்ய வேண்டியது ஒன்றுதான்
இப்போது திமுக உடனடியாக செய்ய வேண்டியது ஒன்றுதான்.. விவாதங்களின் போக்கை தனது கைக்கு மாற்ற வேண்டும். அதாவது திமுக கேள்வி கேட்க வேண்டும்.. தவெக பதில் சொல்ல வேண்டும்.
அதற்கு, பொதுமக்கள் அன்றாடம் சந்திக்கும் மிக முக்கியமான பொருளாதார நெருக்கடி என்ற புள்ளியில் அரசியல் களத்தைக் கொண்டு வந்து நிறுத்த வேண்டும். எந்தவொரு தேர்தல் வெற்றியும், அரசியல் மாற்றமும் இறுதியில் ஒரு சாதாரண குடும்பத்தின் சமையலறை மேஜையில்தான் தீர்மானிக்கப்படுகிறது என்பதை நினைவில் கொள்ள வேண்டும்.
ஒரு சராசரி குடும்பம் மாத இறுதியில் உட்கார்ந்து தங்களது செலவுக் கணக்கை பார்க்கும் போது, ஊடகங்களில் நடக்கும் விவாதங்களோ அல்லது தேவையற்ற அரசியல் மோதல்களோ அவர்களின் வீட்டு பட்ஜெட்டை சரிசெய்யப் போவதில்லை. மாறாக, விண்ணை முட்டும் மின்சாரக் கட்டண உயர்வு, தொடர் மின் வெட்டு, மோசமான சாலைகள், கட்டுக்கடங்காமல் ஏறும் அத்தியாவசியப் பொருட்களின் விலை, குறையும் மாதாந்திர சேமிப்பு ஆகியவைதான் அவர்களின் அன்றாட நிம்மதியைப் பறிக்கின்றன.
தற்போது மக்கள் சந்திக்கும் இந்த வாழ்வாதாரப் பிரச்சனைகளை திமுக அழுத்தமாகக் கையில் எடுக்க வேண்டிய தருணம் இது. குறிப்பாக, மக்கள் பாக்கெட்டை நேரடியாகப் பாதிக்கும் மின்சாரக் கட்டண உயர்வு மற்றும் விலைவாசி உயர்வு போன்ற விவகாரங்களில் ஆளும் அரசை நோக்கி கடுமையான கேள்விகளை எழுப்ப வேண்டும்.
அரசியல் களத்தில் திசைதிருப்பும் கலாச்சார மோதல்களிலோ அல்லது ஊடகங்களின் தற்காலிக சுவாரஸ்யமான செய்திகளிலோ திமுக தொடர்ந்து சிக்கிக்கொண்டால், அது அன்றாட வாழ்க்கையை நடத்தப் போராடும் சராசரி வாக்காளர்களைக் கட்சியிடமிருந்து விலக்கிவிடக் கூடும். பொதுமக்கள் தங்களின் வாழ்வாதாரத்துக்காகவும், மாதாந்திர செலவுகளை சமாளிக்கவும் போராடிக் கொண்டிருக்கும் வேளையில், அவர்களின் உண்மையான பொருளாதார வலியைப் பேசும் கட்சியையே தங்களின் உண்மையான பிரதிநிதியாக அவர்கள் கருதுவார்கள்.
அன்றாட வாழ்க்கை பிரச்சனை
எனவே, திமுகவின் தற்போதைய வியூகம் மிகவும் எளிமையானதாகவும் தீர்க்கமானதாகவும் இருக்க வேண்டும். அரசியல் விவாதங்களின் திசையை சாதாரண மக்களின் அன்றாட வாழ்க்கைச் செலவுகள் பக்கம் திருப்ப வேண்டும். மக்களின் துயரங்களுக்குப் பதிலளிக்க வேண்டிய கட்டாயத்தை ஆளும்தரப்புக்கு உருவாக்க வேண்டும். அதேவேளையில், மக்களின் வாழ்வாதாரத்திற்காக களத்தில் நின்று உண்மையாகப் போராடுவது யார் என்பதைப் பொதுமக்களுக்கு உணர்த்த வேண்டும்.
மக்கள் நலன் சார்ந்த பொருளாதாரப் போராட்டங்களை முன்னெடுப்பதிலும், சாமானிய மக்களின் குரலாக மாறுவதிலும் திமுக வரலாற்று ரீதியாகவே பலம் படைத்தது. அந்தப் பாரம்பரியமான உத்தியை மீண்டும் அரசியல் களத்தின் மையப் புள்ளிக்குக் கொண்டுவர வேண்டிய சரியான நேரம் இதுவே!
Click it and Unblock the Notifications
Sign in with Google
