ஜேஇஇ பெயில்.. பாஸ்போர்ட் இல்லை.. இந்திய தேர்வு முறையையே சீரமைக்க போகும் யார் இந்த காமகோடி

சென்னை: மெட்ராஸ் ஐஐடி இயக்குநர் காமாகோடி ஒன்றும் வழக்கமான ஐஐடி பட்டதாரி அல்ல. பாஸ்போர்ட் கிடையாது, ஜே.இ.இ (JEE) தேர்வில் தோல்வி... ஆனால், அவர்தான் இப்போது தேசியத் தேர்வு முகமையை (NTA) சீரமைக்கத் தயாராகி வருகிறார். இவரை கோமிய நிபுணர் என்று காங்கிரஸ் பொதுச் செயலர் பிரி​யங்கா காந்தி வதேரா​ கூறியதற்கு கடும் எதிர்ப்பு எழுந்துள்ளது. நாட்டிலுள்ள 215 கல்​வி​யாளர்​கள் கடிதம் எழுதி உள்ளார்கள்.

நாடாளுமன்றத்தில் கடந்த 29ம் தேதி 'பொதுத் தேர்​வு​கள் (முறைகேடு​கள் தடுப்​பு) திருத்த மசோ​தா- 2026' மீதான விவாதம் நடந்தது. விவாதத்​தில் கலந்​து​கொண்டு பிரி​யங்கா காந்தி பேசும்​போது, "வினாத்​தாள் கசிவு தொடர்​பான பிற குற்றங்களுக்கான தண்​டனையை அதி​கரிப்​பது​தான் மசோதாவின் முக்​கிய நோக்​கமாக இருக்கிறது. வினாத்​தாள் கசிவை தடுக்க அமைக்​கப்​பட்​டுள்ள புதிய நிபுணர்​கள் குழு​வில் பல உறுப்பினர்கள் இடம்​பெற்​றுள்​ளனர். பிரதமர் மோடி தனது ஆலோசகர்களை மாற்​றிக்​கொள்ள வேண்​டும் என நினைக்கிறேன்.

இந்​தப் புதிய நிபுணர்​கள் குழு​வில் முன்னாள் புல​னாய்​வுப் பிரிவுத் தலை​வர் (தபன் தேகா), ஒரு தகவல் தொழில்​நுட்ப நிறுவன உரிமை​யாளர் (நந்​தன் நிலேக​னி), ஒரு 'மாட்​டுக் கோமிய நிபுணர்' (காமகோடி) ஆகியோர் உள்​ளனர். இவர்​களுக்கு கல்​வியைப் பற்றி என்ன தெரி​யும்?" என்று கேள்வி எழுப்​பி​ இருந்தார். பிரி​யங்கா காந்​தி, சென்னை ஐஐடி உயர்​கல்வி நிறுவன இயக்​குநர் காமகோடியைத்​தான் 'கோமிய நிபுணர்' என்று தனது பேச்​சில் கூறியதை கல்வியாளர்கள் பலர் எதிர்க்கிறார்கள். 215 கல்வியாளர்​கள் பிரி​யங்கா காந்​தி​யின் பேச்​சுக்கு அதிருப்தி தெரிவித்து கடிதம் எழுதியுள்ளார்கள்.

அந்த கடிதத்தில் பேராசிரியர் காமகோடி இந்​தி​யா​வின் முன்​னணி அறி​வியல் மற்றும் தொழில்​நுட்ப நிறு​வனங்​களில் ஒன்​றின் தலை​வராக உள்ளார். ஒவ்​வொரு கல்​வி​யாளரைப் போல​வே, கருத்​துக்​களை முன்வைக்கவும், பாரம்​பரிய அறிவைப் பற்றி விவா​திக்​க​வும், அறிவியல் உரை​யாடல்​களில் பங்​கேற்​க​வும் அவருக்கு உரிமை இருக்கிறது. ஓர் அறிஞரின் கருத்​துகளின் சாராம்​சத்​துடன் விவாதத்தில் ஈடு​படு​வதற்​குப் பதிலாக, அவரை ஒரு முத்திரையின் மூலம் நிராகரிப்​பது கூடாது. காமகோடியை கோமிய நிபுணர் என்று தெரி​வித்து வெளி​யிட்ட கருத்து ஏமாற்​றம் அளிக்​கிறது என்று குறிப்பிட்டுள்ளார்.

இதனிடையே ஏபி இருங்கோவேல் என்பவர் வெளியிட்ட சமூக வலைதள பதிவினை காமகோடியின் ஆதரவாளர்கள் பலர் பகிர்ந்து வருகிறார்கள். அந்த பதிவில் அவர் கூறுகையில், "பேராசிரியர் காமகோடி மற்றும் அவரது தந்தை பேராசிரியர் வீழிநாதன் இருவருக்குமே நான் நன்கு அறிமுகமானவன். காமகோடி பற்றி எனக்கு வந்த ஒரு கருத்தைப் பகிர்கிறேன்.

பாராளுமன்றத்தில் பிரியங்கா வாத்ரா காமகோடி குறித்து கூறிய "கோமூத்ரா" கருத்தைப் பற்றிய என் பதிவுக்குக் கிடைத்த பதில் இது. 1980-ஆம் ஆண்டு கோடைக்காலம். மயிலாப்பூரில் உள்ள ஒரு எளிய வீட்டின் முற்றத்தில் ஏழாம் வகுப்பு படிக்கும் ஒரு சிறுவன் மனவேதனையுடன் நின்று கொண்டிருந்தான். உள்ளூர் கிரிக்கெட் போட்டியில் வேகப்பந்து (Fast Bouncer) அவன் அணிந்திருந்த கண்ணாடியை உடைத்துவிட்டது. அதனால் அவனது பார்வைக்கு ஏதாவது ஆகிவிடுமோ என்று பயந்த அவனது தந்தை, புகழ்பெற்ற சமஸ்கிருத தர்க்கவியலாளர், அந்தச் சிறுவனின் கிரிக்கெட் மட்டையை ஆழமான கிணற்றுக்குள் எறிந்தார்.

"உன் கிரிக்கெட் வாழ்க்கை இத்துடன் முடிந்தது," என்று கூறிவிட்டு, ஒரு வயலினை அவன் கையில் கொடுத்தார். "துல்லியத்தை (Precision) கற்றுக்கொள்ள விரும்பினால், இதில்தான் தேர்ச்சி பெறு." அந்தச் சிறுவன் கோபப்படவில்லை. தனது முழு கவனத்தையும் வயலின் இசையில் செலுத்தினான். கடுமையாகப் பயிற்சி பெற்று, பின்னர் இசை உலகின் ஜாம்பவான்களுடன் மேடையேறி வாசிக்கும் அளவிற்கு உயர்ந்தான். பாரத ரத்னா எம். எஸ். சுப்புலட்சுமி அவர்களிடமிருந்தே நேரடியாக ஆலோசனைகளையும் திருத்தங்களையும் பெற்றான்.

ஐந்து ஆண்டுகள் கழித்து, அவனுக்கு மீண்டும் ஒரு பெரிய ஏமாற்றம் ஏற்பட்டது. IIT-JEE தேர்வில் தேர்ச்சி பெற முடியவில்லை. ஆனால் அவன் மனம் தளரவில்லை. ஒரு பிராந்திய பொறியியல் கல்லூரியில் சேர்ந்தான். கணினி அறிவியலின் அடிப்படை தர்க்க அமைப்புகளை (Logic Gates) ஆழமாகக் கற்றான். பின்னர் முதுநிலை ஆராய்ச்சியாளராக IIT மதராசில் சேர்ந்தான். முனைவர் பட்டம் (PhD) பெற்றான். அதே கல்வி நிறுவனத்தில் பேராசிரியராக பணியாற்றி, இறுதியில் ஒருகாலத்தில் தன்னை நிராகரித்த அதே நிறுவனத்தின் இயக்குநராக உயர்ந்தான்.

2011-ஆம் ஆண்டில், உலகம் முழுவதும் நுகர்வோர் பயன்பாட்டு மொபைல் செயலிகளை உருவாக்கிக் கொண்டிருந்த நேரத்தில், இந்தப் பேராசிரியர் இந்தியாவின் ஒரு மறைந்திருந்த தேசியப் பாதுகாப்பு பலவீனத்தைப் பற்றி சிந்தித்தார்.இந்தியாவின் ரேடார்கள், போர் விமானங்கள், வங்கிச் சேவையகங்கள் , பாதுகாப்பு அமைப்புகள் அனைத்தும் வெளிநாடுகளில் வடிவமைக்கப்பட்ட மைக்ரோபிராசஸர்களைச் சார்ந்திருந்தன.

அவரது மனதில் ஒரே ஒரு கேள்வி:

"ஒரு வெளிநாட்டு சிப்பை (Chip) நாம் செய்ய வேண்டியதைச் செய்கிறதா என்று சோதிக்க முடியும். ஆனால், போர்காலத்தில் அது நாம் விரும்பாத வேறு ஏதாவது செயலைச் செய்யாது என்று உறுதியாகச் சொல்ல முடியுமா?"

இதற்குத் தீர்வாக, முழுமையாக இந்தியாவில் வடிவமைக்கப்பட்ட, தொழில்துறை தரமான (Industrial Grade) ஒரு மைக்ரோபிராசஸரை அடிப்படையிலிருந்து உருவாக்கும் திட்டத்தை முன்வைத்தார்.

உலகின் முன்னணி தொழில்நுட்ப நிறுவனங்கள், "பல பில்லியன் டாலர் முதலீடும், மிகப்பெரிய கட்டமைப்பும், ஏராளமான வெளிநாட்டு காப்புரிமைகளும் இல்லாமல் இது சாத்தியமில்லை" என்று கூறின. ஆனால் அவர் அதைப் பொருட்படுத்தவில்லை. சிறிய ஆய்வகங்களில், நீண்ட நேர உழைப்புடன், தனது குழுவுடன் இணைந்து Open Source RISC-V Instruction Set-ஐ பயன்படுத்தினார். ஒவ்வொரு Logic Gate-ஐயும் கைமுறையாக வடிவமைத்து, Silicon Layout-களை உருவாக்கி, கோடிக்கணக்கான Instruction Cycle-களைச் சோதித்து உறுதிப்படுத்தினர்.

2018-ஆம் ஆண்டு ஜூலை மாதம், "Risecreek" என்ற குறியீட்டுப் பெயருடைய வெறும் 16 சதுர மில்லிமீட்டர் அளவுள்ள சிலிக்கான் சிப் ஆய்வகத்திற்குத் திரும்பி வந்தது. அந்தச் சிப்பை இணைத்து மின்சாரத்தை இயக்கியபோது, திரையில் மெல்ல மின்னியபடி Linux Operating System, வரலாற்றில் முதல் முறையாக 100% இந்தியாவில் வடிவமைக்கப்பட்ட சிலிக்கானில் வெற்றிகரமாக இயங்கத் தொடங்கியது.

இன்று, அவரது SHAKTI Processor Architecture, பாதுகாப்புத் தகவல் தொடர்பு அமைப்புகள் முதல், ISRO உடன் இணைந்து உருவாக்கப்பட்ட விண்வெளித் தரக் கட்டுப்பாட்டு அமைப்புகள் வரை பல்வேறு துறைகளில் பயன்பட்டு வருகிறது. ஒரு காலத்தில், தந்தை கிரிக்கெட் மட்டையை கிணற்றுக்குள் எறிந்த அந்தச் சிறுவன்... 1985-இல் IIT-JEE தேர்வில் தோல்வியடைந்த அந்த மாணவன்... IIT இயக்குநருக்கான அதிகாரப்பூர்வ இல்லத்தில் குடியேறாமல், தனது மறைந்த தந்தையின் அரிய சமஸ்கிருத நூலகத்தைப் பாதுகாக்க குடும்ப வீட்டிலேயே வாழத் தேர்ந்தெடுத்த அந்த வயலின் கலைஞர்... அவர்தான் பேராசிரியர் வீழிநாதன் காமகோடி" இவ்வாறு கூறியுள்ளார்.

English summary

IIT Madras Director Kamakoti is no ordinary IIT graduate. He does not hold a passport and had failed the JEE exam; yet, he is now poised to revamp the National Testing Agency (NTA). Strong opposition has arisen following Congress General Secretary Priyanka Gandhi Vadra's description of him as a "cow urine expert."