Gen Z DMK Meetup.. விஜய் ஏற்படுத்திய ‘இன்ஸ்டா’ புயல்! இளைய தலைமுறையை நெருங்கும் திமுக! கைகொடுக்குமா?

Updated: Sunday, May 31, 2026, 17:46 [IST]

Subscribe to Oneindia Tamil

சென்னை: 2026 சட்டப்பேரவைத் தேர்தல் முடிவுகள் தமிழக அரசியலில் மிகப்பெரிய மாற்றத்தை ஏற்படுத்தியுள்ளன. பல ஆண்டுகளாக தமிழக அரசியலை ஆட்சி செய்த திமுக மற்றும் அதிமுக ஆகிய இரு பெரிய கட்சிகளையும் பின்னுக்குத் தள்ளி, தமிழக வெற்றிக் கழகம் தனிப்பெரும் கட்சியாக உருவெடுத்து ஆட்சியை கைப்பற்றியது. இந்த வெற்றிக்கு முக்கிய காரணமாக இளம் தலைமுறையினர், குறிப்பாக 'ஜென் ஜி' என அழைக்கப்படும் புதிய வாக்காளர்கள் கருதப்பட்ட நிலையில், தற்போது அவர்களிடம் மீண்டும் செல்வாக்கை பெறும் முயற்சியில் திமுக களமிறங்கியுள்ளது.

அதன் ஒரு பகுதியாகவே 'Gen Z DMK Meetup' என்ற புதிய முயற்சியை திமுக ஆதரவாளர்கள் தொடங்கியுள்ளனர். சென்னை திமுக தலைமையகமான அண்ணா அறிவாலயத்தில் நடந்த இந்த நிகழ்வு அரசியல் வட்டாரங்களில் மட்டுமல்லாமல், சமூக வலைதளங்களிலும் பேசுபொருளாக மாறியுள்ளது.

கடந்த சட்டப்பேரவைத் தேர்தலில் இளம் வாக்காளர்களின் மனநிலையை சரியாக புரிந்துகொண்ட கட்சியாக தமிழக வெற்றிக் கழகம் பார்க்கப்பட்டது. சமூக வலைதளங்கள், டிஜிட்டல் பிரச்சாரம் போன்ற காரணங்களால் விஜய் தலைமையிலான தவெக இளம் தலைமுறையினரிடம் பெரிய வரவேற்பைப் பெற்றது.

திராவிட கட்சிகள்

இதன் விளைவாக, திமுக மற்றும் அதிமுக போன்ற திராவிட கட்சிகள் இளைஞர்களிடம் இருந்து விலகி விட்டன என்ற விமர்சனங்களும் தேர்தலுக்குப் பிறகு வலுப்பெற்றன. குறிப்பாக சமூக வலைதளங்களில், புதிய தலைமுறையின் அரசியல் விருப்பங்களை பழைய கட்சிகள் புரிந்துகொள்ளவில்லை என்ற கருத்து பரவலாக முன்வைக்கப்பட்டது. இந்த பின்னணியில்தான் திமுக தலைவர் முக ஸ்டாலின், இளம் தலைமுறையினரிடம் கட்சியின் கொள்கைகளையும் செயல்பாடுகளையும் கொண்டு செல்ல வேண்டிய அவசியத்தை வலியுறுத்தினார்.

ஜென் ஜி டிஎம்கே மீட்அப்

அதன்படி, இளைஞர்களை நேரடியாக சந்தித்து உரையாடும் வகையில் புதிய முயற்சிகள் மேற்கொள்ளப்பட்டு வருகின்றன. அதன் முதல் கட்டமாக 'Gen Z DMK Meetup' நிகழ்ச்சி நடத்த திட்டமிடப்பட்டது. ஆரம்பத்தில் இந்த நிகழ்வை கொளத்தூரில் நடத்த ஏற்பாடுகள் செய்யப்பட்டது. ஆனால் சில காரணங்களால் அது நடைபெறவில்லை. பின்னர் சென்னை அண்ணா அறிவாலய வளாகத்தில் உள்ள கலைஞர் அரங்கில் இந்த நிகழ்ச்சி நடைபெற்றது.

Recommended For You

வேரில் வெந்நீர் ஊற்றும் விஜய்.. கொஞ்சம் கொஞ்சமாய் கருகுதே இரட்டை இலை! உஷாராவது எடப்பாடிக்கு நல்லது!

இளம் தலைமுறை

இந்த நிகழ்வில் 500-க்கும் மேற்பட்ட இளைஞர்கள் பங்கேற்றனர். நிகழ்ச்சியின் போது திமுகவின் வரலாறு, கொள்கைகள், சமூகநீதி சார்ந்த அரசியல், கல்வி மற்றும் நலத்திட்டங்கள் குறித்து விளக்கங்கள் அளிக்கப்பட்டன. அதோடு, இளம் தலைமுறையினரிடம் திமுகவை எவ்வாறு கொண்டு சேர்ப்பது என்பது பற்றியும் கலந்துரையாடல்கள் நடைபெற்றன. கட்சியின் மூத்த நிர்வாகிகள் மட்டுமல்லாமல், சமூக வலைதளங்களில் செயல்படும் இளைஞர்களும் இதில் பங்கேற்றதாக தகவல்கள் தெரிவிக்கின்றன.

திமுக

இந்நிலையில் இந்த நிகழ்வை தமிழகம் முழுவதும் விரிவுபடுத்தும் திட்டமும் இருப்பதாக கூறப்படுகிறது. அரசியல் ரீதியாக பார்க்கும்போது, இது சாதாரண நிகழ்வு அல்ல என்று அரசியல் ஆய்வாளர்கள் கருதுகின்றனர். தேர்தல் தோல்விக்குப் பிறகு திமுக மேற்கொள்ளும் முதல் பெரிய முயற்சியாக இது பார்க்கப்படுகிறது. ஏனெனில் கடந்த தேர்தல் முடிவுகள் ஒரு முக்கியமான செய்தியை வெளிப்படுத்தியது.

பாரம்பரிய அரசியல்

அதாவது, இளம் தலைமுறையினர் இனி பாரம்பரிய அரசியல் அடையாளங்களை மட்டும் பார்த்து வாக்களிப்பதில்லை. சமூக வலைதளங்களில் அவர்கள் காணும் தகவல்கள், புதிய அரசியல் முகங்கள், நேரடி தொடர்பு, வேலைவாய்ப்பு மற்றும் எதிர்கால வளர்ச்சி குறித்த வாக்குறுதிகள் ஆகியவை அவர்களின் முடிவுகளை அதிகம் பாதிக்கின்றன. இதனை உணர்ந்தே திமுக தற்போது புதிய தலைமுறையுடன் நேரடி தொடர்பை ஏற்படுத்த முயற்சிக்கிறது என்று கூறப்படுகிறது.

ஜென் ஜி அரசியல்

எனினும், ஒரு நிகழ்ச்சி மட்டும் நடத்துவதால் இளைஞர்களின் ஆதரவை மீண்டும் பெற முடியுமா என்ற கேள்வியும் எழுந்துள்ளது. ஏனெனில் தற்போதைய ஜென் ஜி தலைமுறை அரசியல் கூட்டங்கள் அல்லது பாரம்பரிய பிரச்சாரங்களை விட, சமூக வலைதளங்களில் நடைபெறும் விவாதங்கள் மற்றும் நேரடி செயல்பாடுகளுக்கு அதிக முக்கியத்துவம் கொடுக்கிறது. அதனால், 'Gen Z DMK Meetup' போன்ற நிகழ்வுகள் தொடர்ந்து நடத்தப்பட வேண்டியதுடன், அதில் பங்கேற்கும் இளைஞர்களின் கருத்துகளையும் கட்சி உள்வாங்க வேண்டும்.

இளைஞர்களின் வாக்குகள்

மறுபுறம், இந்த முயற்சியை உண்மையிலேயே சிலர் வரவேற்கின்றனர். தேர்தல் தோல்விக்குப் பிறகு காரணங்களை ஆய்வு செய்து, புதிய தலைமுறையினருடன் உரையாட முயற்சிப்பது ஒரு நேர்மறையான அரசியல் அணுகுமுறை என்று அவர்கள் கருதுகின்றனர். தமிழக அரசியலில் தற்போது இளைஞர்களின் வாக்குகள் மிகப்பெரிய சக்தியாக மாறியுள்ளன. அந்த வாக்குகளை ஈர்க்கும் போட்டியில் அனைத்து கட்சிகளும் களமிறங்கியுள்ளன. அந்த வகையில் திமுகவின் 'Gen Z DMK Meetup' முயற்சி ஒரு தொடக்கமாக இருக்கலாம்.

விஜயின் எழுச்சி

ஆனால் அது வெற்றிபெற வேண்டுமெனில், வெறும் கூட்டங்கள் மற்றும் நிகழ்ச்சிகளை தாண்டி, இளம் தலைமுறையின் எதிர்பார்ப்புகளுக்கு ஏற்ப அரசியல், கொள்கை மற்றும் செயல்திட்டங்களை உருவாக்க வேண்டிய அவசியம் உள்ளது. எனவே, முதல்வர் விஜயின் எழுச்சியால் உருவான அரசியல் தாக்கத்திற்கு பதிலளிக்கும் வகையில் திமுக தொடங்கியுள்ள இந்த புதிய முயற்சி, கட்சியின் எதிர்கால அரசியல் பயணத்தில் முக்கிய பங்காற்றுமா அல்லது ஒரு குறுகியகால நடவடிக்கையாகவே முடிவடையுமா என்பது வரவிருக்கும் காலங்களில் தான் தெரியவரும்.