இன்று புதுச்சேரி.. அடுத்து தமிழ்நாடுதான்... விரைவில் பார்ப்பீர்கள் - ராகுல் பேச்சுக்கு அண்ணாமலை பதிலடி

புதுச்சேரியைப் போன்று தமிழ்நாட்டிலும் ஆட்சியைக் கைப்பற்றுவோம் என்று ராகுல்காந்தியின் பேச்சுக்கு பாஜக மாநில தலைவர் அண்ணாமலை பதிலடி அளித்துள்ளார்.

Updated: Thursday, February 3, 2022, 9:28 [IST]

Subscribe to Oneindia Tamil

சென்னை: விரைவில் தமிழ்நாட்டிலும் பாஜக ஆட்சிக்கட்டிலில் அமரும் என்று பாஜக தலைவர்அண்ணாமலை தனது ட்விட்டர் பக்கத்தில் பதிவிட்டுள்ளார். தமிழ்நாட்டு மக்கள் பாஜக மற்றும் பிரதமர் மோடியின் பக்கம் நிற்பதாகவும் அண்ணாமலை தெரிவித்துள்ளார்.

குடியரசுத் தலைவரின் உரைக்கு நன்றி தெரிவிக்கும் தீர்மானம் லோக்சபாவில்நேற்று நடைபெற்றது. இதில் பேசிய ராகுல் காந்தி, குடியரசுத் தலைவர் உரை நாட்டின் தலைமைக்கான உரையாக இல்லாமல் அரசு அதிகாரிகள் கொடுத்த தகவலாக இருப்பதாக குறிப்பிட்டார்.

வாழ்நாளில் ஒரு போதும் தமிழ்நாட்டில் உங்களால் ஆதிக்கம் செலுத்த முடியாது எனவும், தமிழ்நாட்டிலிருந்து கற்றுக் கொள்ள வேண்டும் எனவும் ராகுல் காந்தி ஆவேசமாக பேசினார். தமிழகம் பற்றி அதிகம் பேசியது குறித்து செய்தியாளர்கள் கேள்வி எழுப்பியதற்கு நானும் தமிழன்தான் என்றும் தெரிவித்தார் ராகுல்காந்தி.

ராகுல் காந்தி ஆவேசம்

லோக்சபாவில் பேசிய ராகுல் காந்தி, இந்தியா ஒரு ராஜ்ஜியம் கிடையாது, நீங்கள் ராஜாவும் இல்லை. இதை மறந்துவிடாதீர்கள். இந்த விவகாரத்தில் மொத்த இந்தியாவும் தமிழகத்திடம் இருந்து கற்றுக்கொள்ள வேண்டும். உங்களது வாழ்நாளில் ஒரு போதும் தமிழக மக்களை உங்களால் ஆள முடியாது. அது உங்களால் முடியவே முடியாது என்று தெரிவித்தார். அனைத்து மாநில மக்களுக்கும் சமஉரிமை வழங்கப்பட வேண்டும். தமிழ் மக்கள், தமிழ் மொழி, தமிழ் கலாசாரம் ஆகியவை தனித்துவம் வாய்ந்தவை, அவற்றுக்கு மத்திய அரசு மதிப்பு அளித்து சம உரிமை வழங்க வேண்டும் என்று ஆவேசமாக பேசியிருந்தார் ராகுல்காந்தி. அதற்கு பதிலடி தரும் வகையில் அண்ணாமலை தனது ட்விட்டர் பக்கத்தில் பதிவிட்டுள்ளார்.

அண்ணாமலை ட்வீட்

ராகுல்காந்தியின் பேச்சுக்கு பாஜகவினர் எதிர்ப்பு தெரிவித்து வருகின்றனர். பாஜக மாநில தலைவர் அண்ணாமலை தனது ட்விட்டர் பதிவில், வரலாற்றை ஒருபோதும் மறக்க வேண்டாம் என்றும், இலங்கை தமிழர்கள் அனுபவித்த கொடுமைகளுக்கும், ஜல்லிக்கட்டு தடை செய்யப்பட்டதற்கும் காங்கிரஸ் கட்சியே காரணம் எனவும் அவர் குற்றம்சாட்டியுள்ளார்.

ஐசியுவில் காங்கிரஸ்

திமுக கொடுக்கும் ஆக்சிஜன் உதவியோடு தமிழ்நாட்டில் காங்கிரஸ் கட்சி ஐசியுவில் இருப்பதாகவும் அண்ணாமலை கிண்டலடித்துள்ளார். புதுச்சேரியில் பாஜக ஆட்சியைக் கைப்பற்றியுள்ளதை சுட்டிக்காட்டிய அவர், பிரதமர் மோடியின் உன்னத நோக்கத்தை புதுச்சேரி மக்கள் ஏற்றுக்கொண்டு விட்டதாக தெரிவித்துள்ளார்.

அடுத்து தமிழ்நாடுதான்

தமிழ்நாட்டு மக்களும் பாஜக மற்றும் பிரதமர் மோடியின் பக்கம் நிற்பதாகவும், விரைவில் தமிழ்நாட்டிலும் பாஜக ஆட்சிக்கட்டிலில் அமரும் எனவும் அண்ணாமலை பதிவிட்டுள்ளார். ஏற்கனவே குஷ்பு புதுச்சேரியில் பாஜக ஆட்சி நடப்பதாக பதிவிட்டிருந்தார். அண்ணாமலையும் புதுச்சேரியில் பாஜக ஆட்சி நடப்பதாக தெரிவித்துள்ளார்.