நேரம் வந்துருச்சு.. இனி வேடிக்கை பார்த்தால்.. அதிமுகவை காப்பாற்றவே முடியாது.. சீனுக்குள் வந்த சசிகலா
சென்னை: அனைவரும் ஒன்றிணைய வேண்டிய காலம் வந்துவிட்டதாக அஇபுதமமுக பொதுச்செயலாளர் சசிகலா தெரிவித்துள்ளார். இனியும் பார்த்து கொண்டிருந்தால் அதிமுகவை காப்பாற்றுவது மிகவும் கடினமாகிவிடும் என்று கூறிய சசிகலா, பிரிந்து சென்றவர்கள், விலக்கப்பட்டவர்கள், ஒதுங்கி நிற்பவர்கள் என்று அனைவரும் ஒன்றிணையும் காலம் எப்போது என்றும் கேள்வி எழுப்பியுள்ளார்.
தமிழ்நாட்டில் தவெகவின் எழுச்சியால் அதிமுக 3வது இடத்திற்கு தள்ளப்பட்டுள்ளது. அண்மையில் நடந்த இடைத்தேர்தலிலும் 3வது இடத்திற்கு தள்ளப்பட்டு படுதோல்வியை சந்தித்தது. இதனால் அதிமுகவில் இருந்து பிரிந்து சென்றவர்கள், விலக்கப்பட்டவர்கள் ஒன்றிணைய வேண்டும் என்ற குரல் அதிகரித்துள்ளன. குறிப்பாக சசிகலா, டிடிவி தினகரன் மீண்டும் அதிமுகவுக்குள் கொண்டு வரப்பட வேண்டும் என்ற குரல் எழுந்துள்ளது.
இந்த நிலையில் அஇபுதமமுக பொதுச்செயலாளர் சசிகலா தனது எக்ஸ் பக்கத்தில், அதிமுக தோற்றுவித்து தற்போது 54ஆண்டுகளை நிறைவு செய்து, 55வது ஆண்டில் அடியெடுத்து வைக்கிறது. இதனை கொண்டாடி மகிழும் கோடான கோடி தொண்டர்களுக்கு எனது மனமார்ந்த வாழ்த்துகளை தெரிவித்துக் கொள்கிறேன்.
1972ஆம் ஆண்டு எம்ஜிஆரால் ஏழைகளுக்காகவே உருவாக்கப்பட்ட இயக்கம் தான் அதிமுக. இந்த இயக்கத்தை தனது இறுதி மூச்சுவரை காப்பாற்றியவர் எம்ஜிஆர். அவரின் மறைவிற்கு பிறகு ஜெயலலிதா இந்த இயக்கத்தை கட்டி காப்பாற்றினார்கள். இந்தியாவிலேயே 3வது பெரிய கட்சியாக உருவாக்கினார்கள். இதில் எனது பங்கும் அடங்கியிருப்பதை யாராலும் மறுக்க முடியாது.
நான் நேசித்த நம் இருபெரும் தலைவர்கள் தான், நான் இந்த இயக்கத்தை சுவாசிக்க காரணமாக அமைந்தவர்கள். ஜெயலலிதா மறைவிற்கு பிறகு இந்த இயக்கம் பல்வேறு சறுக்கல்களையும், தோல்விகளையும் தான் இன்று வரை சந்தித்து கொண்டு இருக்கிறது. இதற்கு ஒரு சிலரின் சுயநலம் மற்றும் அவர்கள் எடுத்த தவறான முடிவுகள் தான் காரணமாக அமைந்துவிட்டது.
இந்த இயக்கத்தின் பலனை அனுபவித்த ஒரு சிலர் மட்டும் ஏதாவது ஆதாயம் தேடி இயக்கத்தை விட்டு சென்று இருக்கலாம். ஆனால், அதே சமயம் எம்ஜிஆர், ஜெயலலிதா வழியில் வந்த தொண்டர்கள் இன்றைக்கும் நம்பிக்கையோடும், உறுதியோடும் தொடர்ந்து பயணித்து கொண்டிருக்கிறார்கள். தொண்டர்கள் அனைவருக்கும் இருக்கும் ஒரே எண்ணம் என்னவென்றால், இந்த இயக்கம் என்றைக்கு ஒன்றுபடும்.
பிரிந்து சென்றவர்கள், விலக்கப்பட்டவர்கள், ஒதுங்கி நிற்பவர்கள் என அனைவரும் ஒன்றிணையும் காலம் எப்போது? என்று ஒவ்வொரு நாளும் எதிர்பார்த்து காத்து கொண்டிருக்கிறார்கள். எனவே, இது நாள் வரை "நடந்தவை நடந்தவையாகவே இருக்கட்டும், இனி நடப்பவை நல்லவையாக இருக்கட்டும்" என்று சொன்ன அறிஞர் அண்ணாவின் கொள்கைகளை மனதில் வைத்து தொண்டர்களின் எண்ணங்கள் ஈடேறிட அனைவரும் ஒன்றிணைய வேண்டிய காலம் வந்துவிட்டது.
இதற்கு மேலும், வேடிக்கை பார்த்து கொண்டிருந்தால் இந்த இயக்கத்தை காப்பாற்றுவது மிகவும் கடினமாகிவிடும். "இன்னும் நூற்றாண்டுகள் ஆனாலும் இந்த இயக்கம் மக்களுக்காகவே இயங்கும்" என்று எந்த நம்பிக்கையில் ஜெயலலிதா சூளுரைத்தாரோ, அந்த நம்பிக்கை என்றைக்கும் வீண் போய்விடக்கூடாது என்பதை மிகவும் வலியுறுத்தி கேட்டுகொள்கிறேன்.
இந்த இயக்கம்,ஒன்றுபட்ட, வலிமைமிக்க, பேரியக்கமாக மீண்டும் மலர வேண்டும் எனவும், மீண்டும் அம்மாவின் ஆட்சியை தமிழகத்தில் கொண்டு வர வேண்டும் எனவும், தமிழக மக்களுக்கு மீண்டும் ஒரு பொற்கால ஆட்சியாக அது அமையட்டும் எனவும் இந்நாளில் எல்லாம் வல்ல ஆண்டவனை வேண்டுகிறேன் என்று பதிவிட்டுள்ளார்.
Click it and Unblock the Notifications
Sign in with Google
