SIR பணிகள்.. வீட்டு கதவை தட்ட போகும் அதிகாரிகள்.. ஆதாரை ஆவணமாக காட்டலாமா? பெரிய சிக்கல்!

சென்னை: இந்திய தேர்தல் ஆணையம் (ECI) வாக்காளர் பட்டியல் சிறப்புத் தீவிர திருத்தம் (SIR 2.0) திட்டத்தின் கீழ், வாக்காளர் தகுதியை உறுதிப்படுத்தும் 13 ஆவணங்களை வெளியிட்டுள்ளது. இந்த அறிவிப்பு, 12 மாநிலங்கள் மற்றும் யூனியன் பிரதேசங்களில் நடைபெறவுள்ள வாக்காளர் பட்டியல் புதுப்பித்தலுக்குப் பொருந்தும்.

SIR நடைபெறும் மாநிலங்கள் மற்றும் யூனியன் பிரதேசங்கள்

அந்தமான் & நிக்கோபார் தீவுகள், லட்சத்தீவுகள், சத்தீஸ்கர், கோவா, குஜராத், கேரளா, மத்தியப் பிரதேசம், புதுச்சேரி, ராஜஸ்தான், தமிழ்நாடு, உத்தரப்பிரதேசம் மற்றும் மேற்கு வங்கம் ஆகிய மாநிலங்களில் இந்த பட்டியல் புதுப்பிக்கப்பட்ட உள்ளது.

சிறப்புத் தீவிர திருத்தம் (SIR) என்பது என்ன?

இந்திய தேர்தல் ஆணையத்தால் தொடங்கப்பட்ட SIR, குறிப்பிட்ட பகுதிகளில் வாக்காளர் பட்டியல்களைப் புதுப்பிக்க, வீடு வீடாகச் சென்று சரிபார்த்துத் திருத்தும் ஒரு விரிவான திட்டமாகும். இது வழக்கமான வருடாந்திர அல்லது சுருக்கத் திருத்தங்களிலிருந்து வேறுபட்டது. ஒவ்வொரு தகுதியான குடிமகனும் வாக்காளர் பட்டியலில் சேர்க்கப்படுவதை உறுதிசெய்யும் கால வரையறைக்குட்பட்ட, தீவிரமான செயலாகும்.

மேலும், இறந்தவர்கள் அல்லது இடம் பெயர்ந்தவர்கள் போன்ற இரட்டைப் பதிவுகளை இத்திட்டம் நீக்கும். தற்போதுள்ள வாக்காளர் பட்டியல்கள் காலாவதியாகிவிட்டாலோ, பிழைகள் இருந்தாலோ அல்லது ஏதேனும் ஒரு முக்கிய தேர்தலுக்கு முன்னதாகவோ SIR செயல்முறை தொடங்கும் என்று ECI தெரிவித்துள்ளது.

SIRல் என்ன நடக்கும்?

இந்தச் செயல்முறையின்போது, வாக்குச்சாவடி நிலை அலுவலர்கள் வீடுகளுக்குச் சென்று வாக்காளர் தகவல்களைச் சரிபார்த்து, புதிய விண்ணப்பங்களைப் பெற்று, தவறான பதிவுகளை நீக்குவார்கள். இந்த நடவடிக்கையின் கீழ், பூத் நிலை அலுவலர்கள் (BLOs) வீடு வீடாகச் சென்று, தனித்துவமான கணக்கெடுப்பு படிவங்களைப் (EFs) பயன்படுத்தி தகவல்களைச் சரிபார்ப்பார்கள்.

2002-2004 காலகட்டத்தில் நடத்தப்பட்ட SIR பட்டியலில் ஒரு வாக்காளரின் பெயர் இடம்பெற்றிருந்தால், அவர் கூடுதல் ஆவணங்கள் எதையும் சமர்ப்பிக்கத் தேவையில்லை. ஆனால், அதற்குப் பிறகு சேர்க்கப்பட்ட வாக்காளர்கள் தங்கள் குடியுரிமை மற்றும் வசிப்பிடத்தை உறுதிப்படுத்தும் ஆவணங்களை வழங்க வேண்டும்.

SIR 2.0 வாக்காளர் பட்டியல் திருத்தத்திற்கு ஏற்றுக்கொள்ளப்படும் 13 ஆவணங்கள்:

SIR 2.0 சரிபார்ப்புச் செயல்பாட்டின்போது அடையாளச் சான்று, வயதுச் சான்று அல்லது இருப்பிடச் சான்றாகப் பயன்படுத்தக்கூடிய 13 ஆவணங்களை தேர்தல் ஆணையம் வெளியிட்டுள்ளது.

அவை, மத்திய/மாநில அரசு அல்லது பொதுத்துறை நிறுவனத்திடமிருந்து பெறப்பட்ட அடையாள அட்டை அல்லது ஓய்வூதியப் பண ஆணை

உள்ளூர் அதிகாரி, வங்கி, அஞ்சல் அலுவலகம், LIC அல்லது பொதுத்துறை நிறுவனத்திடமிருந்து ஜூலை 1, 1987க்கு முன் வழங்கப்பட்ட அரசு அடையாள அட்டை, சான்றிதழ் அல்லது ஆவணம், உரிய அதிகாரியால் வழங்கப்பட்ட பிறப்புச் சான்றிதழ்

இந்திய அரசால் வழங்கப்பட்ட பாஸ்போர்ட்

அங்கீகரிக்கப்பட்ட வாரியம் அல்லது பல்கலைக்கழகத்தின் மெட்ரிகுலேஷன் அல்லது கல்விச் சான்றிதழ்,

மாநில அதிகாரியால் வழங்கப்பட்ட நிரந்தர வதிவிடச் சான்றிதழ்,

அங்கீகரிக்கப்பட்ட நிறுவனத்தால் வழங்கப்பட்ட வன உரிமைச் சான்றிதழ், உரிய அதிகாரியால் வழங்கப்பட்ட OBC/SC/ST அல்லது சாதிச் சான்றிதழ்,

பொருந்தும் இடங்களில் தேசிய குடிமக்கள் பதிவேட்டில் (NRC) இருந்து எடுக்கப்பட்ட பதிவு,

மாநில அல்லது உள்ளூர் அதிகாரிகளால் தயாரிக்கப்பட்ட குடும்பப் பதிவு,

அரசால் வழங்கப்பட்ட நிலம்

வீட்டு ஒதுக்கீட்டுச் சான்றிதழ்,

ஆதார் அட்டை (அடையாளச் சான்றாக மட்டுமே, குடியுரிமைக்கு அல்ல)

ஆதார் மட்டும் போதுமான ஆதாரமாகாது

குடியுரிமை அல்லது வயதை நிரூபிக்க ஆதார் அட்டை மட்டும் போதுமானதல்ல என்று இந்திய தேர்தல் ஆணையம் தெளிவுபடுத்தியுள்ளது. SIR 2.0-க்கு ஆதார் அட்டையைச் சமர்ப்பிக்கும் வாக்காளர்கள், தேவைப்பட்டால் சரிபார்ப்புக்கு வேறு தகுதியான ஆவணத்தையும் இணைக்க வேண்டும்.

யார் இந்த ஆவணங்களைச் சமர்ப்பிக்க வேண்டும்?

முந்தைய SIR வாக்காளர் பட்டியலில் தங்கள் விவரங்கள் அல்லது குடும்ப உறுப்பினர்களின் விவரங்கள் இணைக்கப்படாத அல்லது கண்டறிய முடியாத வாக்காளர்கள், இந்த ஆவணங்களைச் சமர்ப்பிப்பது கட்டாயமாகும். ஏற்கனவே விவரங்கள் இணைக்கப்பட்டுள்ள வாக்காளர்கள், புதிய கணக்கெடுப்புப் படிவங்களை மட்டும் பூர்த்தி செய்து, தேவையான தகவல்களைப் புதுப்பிக்கலாம்.

English summary

SIR Documents: Special Intensive Revision may not allow Aadhaar as the only proof of document