சாதனை வாக்குப்பதிவு.. மே 4 தமிழ்நாடு வெல்லும்.. தேர்தல் முடிந்ததுமே முதல்வர் ஸ்டாலின் சொன்ன வார்த்தை

சென்னை: "ஜனநாயகத் திருவிழா: சாதனை வாக்குப்பதிவு; பாராட்டுக்குரிய மக்களின் பொறுப்புணர்வு! எப்போதும் போல பெரிய அசம்பாவிதங்கள் ஏதுமின்றி அமைதியான முறையில் நடந்து முடிந்துள்ளது தமிழ்நாடு தேர்தல். தமிழ்நாடு வாக்களித்துவிட்டது, மே 4 தமிழ்நாடு வெல்லும்!" என தமிழக முதலமைச்சர் ஸ்டாலின் பதிவிட்டுள்ளார்.

தமிழ்நாடு முழுவதும் உள்ள 234 தொகுதிகளிலும் ஒரே கட்டமாக தேர்தல் இன்று நடைபெற்றது. காலை முதலே மக்கள் ஆர்வத்துடன் வாக்களிக்க வந்த நிலையில் 85 சதவீத வாக்குகள் பதிவாகியுள்ளன. இந்த சட்டசபை தேர்தலில் சுமார் 4.87 கோடி தமிழக மக்கள் தங்கள் வாக்குரிமையை பயன்படுத்தியுள்ளனர். தமிழகத்தில் இதுவரை நடைபெற்ற சட்டசபை தேர்தல்களில் முதல் முறையாக 85.10% வாக்குகள் பதிவாகி வரலாற்று சாதனை படைக்கப்பட்டுள்ளது.

இந்நிலையில், சாதனை வாக்குப்பதிவு குறித்து தமிழக முதல்வர் ஸ்டாலின் பதிவிட்டுள்ளார். முதலமைச்சர் ஸ்டாலின் எக்ஸ் தளத்தில் வெளியிட்டுள்ள பதிவில், "#TNElections2026 ஜனநாயகத் திருவிழா: சாதனை வாக்குப்பதிவு; பாராட்டுக்குரிய மக்களின் பொறுப்புணர்வு!

🗳️ எப்போதும் போல பெரிய அசம்பாவிதங்கள் ஏதுமின்றி அமைதியான முறையில் நடந்து முடிந்துள்ளது தமிழ்நாடு தேர்தல்.

🗳️ 84.69% என்ற சாதனை அளவில் வாக்களித்து, ஜனநாயகத்தைப் பாதுகாத்திடும் கடமையைத் தமிழ்நாட்டு வாக்காளப் பெருமக்கள் சரிவர ஆற்றியுள்ளது மகிழ்ச்சியளிக்கிறது.

🗳️ சுட்டெரிக்கும் வெயிலையும் பொருட்படுத்தாமல் பலர் நீண்ட தூரம் பயணித்து வந்து வாக்களித்து விட்டு, இன்றிரவே மீண்டும் கிளம்பி, அவரவர் பணியாற்றும் ஊர்களுக்குச் செல்கின்றனர்.

🗳️ "ஒரு வாக்குதானே" என எண்ணாமல், "ஒரு தலைமுறைக்கான தேர்தல் இது" என்ற நினைப்பே இந்த உந்துதலுக்குக் காரணமாக இருக்க முடியும். அத்தகைய பொறுப்புள்ள குடிமக்கள் அனைவருக்கும் எனது பாராட்டுகள்.

🗳️ தமிழ்நாடு வாக்களித்து விட்டது, மே 4 தமிழ்நாடு வெல்லும்! #வெல்வோம்_ஒன்றாக!" எனத் தெரிவித்துள்ளார்.

தமிழ்நாட்டில் இன்று ஒரே கட்டமாக 234 தொகுதிகளுக்கும் சட்டசபை தேர்தல் நடைபெற்றது. தமிழ்நாட்டில் மொத்தமாக 5,73,43,291 வாக்காளர்கள் உள்ளனர். வாக்குப் பதிவு முடிவடைந்த நிலையில் வாக்குச்சாவடிகளில் மின்னணு வாக்குப் பதிவு இயந்திரங்கள் சீல் வைக்கப்பட்டு, வாக்கு எண்ணும் மையங்களுக்கு கொண்டு செல்லப்பட்டு வருகின்றன.

English summary

“Festival of Democracy: Record Voter Turnout; The People’s Sense of Responsibility Deserves Praise! As always, the Tamil Nadu election has concluded peacefully and without any major untoward incidents. Tamil Nadu has cast its vote; On May 4th, Tamil Nadu will triumph!” posted Tamil Nadu Chief Minister Stalin.