இதுதான் 3 ஃபைல்களா? இதுக்குத்தான் இவ்வளவு பில்டப்பா சி.எம்? பழைய மாவை அரைத்த விஜய்!
சென்னை: சட்டசபையில் கடந்த வாரம், "என் மேஜையில் எதிர்க்கட்சி தொடர்பான மூன்று முக்கியக் கோப்புகள் இருக்கின்றன, அவற்றை விரைவில் திறப்பேன்" என்று பேசி பெரும் எதிர்பார்ப்பை உருவாக்கினார் முதல்வர் விஜய். ஆளுங்கட்சி தரப்பிலிருந்து ஏதோ அதிரடியான புதிய ஆவணங்களோ அல்லது மாநில லஞ்ச ஒழிப்புத்துறையின் புதிய புலனாய்வு முடிவுகளோ வெளிவரப் போகின்றன என்றே அரசியல் பார்வையாளர்களும் பொதுமக்களும் எதிர்பார்த்தனர்.
ஆனால், சட்டசபையில் அவர் பேசிய விவரங்களைப் பார்க்கும்போது, அதில் புதிதாக எந்தத் தகவலும் இடம்பெறவில்லை என்கிற விமர்சனம் எழுந்துள்ளது. அரை நூற்றாண்டுக்கு முந்தைய சர்காரியா கமிஷன் அறிக்கையையும், ஏற்கனவே ஊடகங்களில் வெளியான மத்திய அமலாக்கத்துறையின் பழைய குறிப்புகளையுமே அவர் வாசித்துக் காட்டியுள்ளார்.
அரசியல் களத்தில் எழுந்த எதிர்பார்ப்பும் நிதர்சனமும்
பொதுவாக ஓர் அரசு வசம் இருக்கும் லஞ்ச ஒழிப்புத்துறை போன்ற புலனாய்வு அமைப்புகள், முந்தைய ஆட்சியில் நடந்ததாகக் கூறப்படும் முறைகேடுகள் குறித்து ஆவணங்களைத் திரட்டி, முதல்வரின் பார்வைக்கு வைப்பது வழக்கம். முதல்வர் விஜய் "என் டேபிளில் 3 ஃபைல்கள் உள்ளன" எனக் குறிப்பிட்டபோது, அத்தகைய புதிய கோப்புகள் குறித்துதான் பேசப்போகிறார் என்ற பிம்பம் உருவானது.
ஆனால், அவையில் அவர் குறிப்பிட்ட உதாரணங்கள் இரண்டுமே பல ஆண்டுகளாகப் பொதுவெளியில் புழக்கத்தில் இருக்கும் பழைய ஆவணங்கள்தான்:
1. 50 ஆண்டு கால சர்காரியா அறிக்கை: 1970-களில் வீராணம் குடிநீர் திட்டம் தொடர்பாக சத்யநாராயணா பிரதர்ஸ் நிறுவனத்திடம் இரண்டரை சதவீத கமிஷன் பெறப்பட்டதாகக் கூறப்படும் விவரம் 1976-ல் அமைக்கப்பட்ட சர்காரியா கமிஷன் அறிக்கையில் இருப்பது. இது பல பத்தாண்டுகளாகத் தமிழக அரசியல் மேடைகளில் எதிரொலிக்கும் பழைய வரலாறு.
2. அமலாக்கத்துறை குற்றச்சாட்டுகள்: ஒப்பந்தங்களில் 7.5 சதவீதம் முதல் 10 சதவீதம் வரை முறைகேடு நடந்ததாக அமலாக்கத்துறை குறிப்பிட்டதாக அவர் சுட்டிக்காட்டியதும், ஏற்கனவே மத்திய புலனாய்வு அமைப்புகளால் நீதிமன்றங்களிலும் ஊடகங்களிலும் வெளிவந்த பழைய விவரங்களின் தொகுப்புதான்.
சொந்த அரசின் விசாரணை முடிவுகள் எங்கே?
ஒரு புதிய அரசு பொறுப்பேற்று ஊழல் குற்றச்சாட்டுகளை முன்வைக்கும்போது, மாநில அரசின் அதிகார வரம்பிற்குட்பட்ட ஊழல் தடுப்பு மற்றும் லஞ்ச ஒழிப்புத்துறை நடத்திய தற்போதைய விசாரணைகள், புதிய வழக்கு ஆவணங்கள் அல்லது புதிய ஆதாரங்கள்தான் முக்கியத்துவம் வாய்ந்தவையாகக் கருதப்படும்.
மாறாக, மத்திய அரசால் ஐம்பது ஆண்டுகளுக்கு முன்பு அமைக்கப்பட்ட சர்காரியா கமிஷன் குறிப்புகளையும், மத்திய அமலாக்கத்துறை ஏற்கனவே வெளியிட்ட அறிக்கைகளையும் மட்டுமே சட்டப்பேரவையில் மேற்கோள் காட்டியிருப்பது, எதிர்க்கட்சிகள் மீதான வழக்கமான அரசியல் விவாதத்தைத் தாண்டி எந்தவொரு புதிய திருப்பத்தையும் ஏற்படுத்தவில்லை.
விவாதப் பொருளாக மாறிய 'சாம்பிள்' பேச்சு
"அந்த மூன்று கோப்புகளைப் பிரிப்பதற்கு முன்னால் ஒரு சாம்பிள் பார்ப்போம்" என்று முதல்வர் விஜய் குறிப்பிட்டிருந்தாலும், அந்த மாதிரியே புதிய விவரங்கள் இல்லாத பழைய அறிக்கைகளாக அமைந்தது அரசியல் பார்வையாளர்களை யோசிக்க வைத்துள்ளது. உண்மையில் புதிய ஆதாரங்கள் அடங்கிய கோப்புகள் இன்னும் திறக்கப்படவில்லையா அல்லது பழைய விவகாரங்களையே மீண்டும் சட்டசபையில் பேசி விவாதத்தை உயிர்ப்புடன் வைத்திருக்க ஆளுங்கட்சி முயற்சிக்கிறதா அல்லது அப்படி அவரிடம் ஒரு ரிப்போர்ட்டே இல்லையா? என்ற கேள்விகள் எழுகின்றன.
மத்திய அமைப்புகளின் பழைய தகவல்களைத் தாண்டி, மாநில அரசின் சொந்தப் புலனாய்வு அமைப்புகள் கண்டுபிடித்த உண்மை ஆவணங்களை ஆளுங்கட்சி எப்போது முன்வைக்கும் என்பதைப் பொறுத்தே இந்த அரசியல் மோதலின் அடுத்தகட்ட நகர்வு அமையும்.
Click it and Unblock the Notifications
Sign in with Google
