சென்னையில் மழை.. பணிகள் துரிதமாக நடக்கிறதா?. பேரிடர் கட்டுப்பாட்டு அறையில் முதல்வர் ஸ்டாலின் விசிட்

Published: Friday, December 31, 2021, 0:42 [IST]

Subscribe to Oneindia Tamil

சென்னை: சென்னையில் கடந்த மாதம் பெய்த கனமழை பாதிப்பின் சுவடே இன்னும் அழியாத நிலையில் சென்னைவாசிகளை விடாது கருப்பு என்பதுபோல் மழை துரத்தி வருகிறது. சென்னையின் நகர், புறநகர் பகுதிகளில் 8 மணி நேரத்துக்கும் மேலாக கனமழை வெளுத்தெடுத்தது.

மழையில் சிக்கி திண்டாடும் சென்னை

இதனால் சென்னை மீண்டும் வெள்ளத்தில் மிதக்க தொடங்கியுள்ளது. சென்னை சாலைகள் முழுவதும் தண்ணீர் தேங்கியுள்ளது. தாழ்வான இடங்களில் தண்ணீர் குளம்போல் தேங்கியுள்ளது. குடியிருப்பு பகுதிகளை வெள்ளம் சூழ்ந்துள்ளது. சில பகுதிகளில் வீடுகளின் உள்ளே வெள்ளநீர் புகுந்தது. வெள்ளம் சூழ்ந்து விட்டதால் பல்வேறு சுரங்கப்பாதைகள் மூடப்பட்டுள்ளன.

நிலைமை மோசம்

சென்னையில் பல இடங்களில் சாலைகளில் தண்ணீர் தேங்கியுள்ளதால் ஒட்டுமொத்த சென்னையிலும் போக்குவரத்து நெரிசல் ஏற்பட்டது. முக்கிய சாலைகளில் பல கி.மீ தூரத்துக்கு வாகனங்கள் அணிவகுத்து நின்றன. சென்னை மக்கள் இரவு நேரங்களில் வெளியே செல்ல வேண்டாம் என்று அமைச்சர் கே.கே.எஸ்.எஸ்.ஆர் சொல்லும் அளவுக்கு சென்னையின் நிலைமை மோசமாக உள்ளது.

முதல்வர் ஸ்டாலின் திடீர் ஆய்வு

சென்னையில் சாலைகளில், குடியிருப்பு பகுதிகளில் தேங்கிய மழைநீரை மாநகராட்சி ஊழியர்கள் அகற்றி வருகின்றனர். இந்த நிலையில் சென்னை மாநகராட்சி ரிப்பன் மாளிகையில் பேரிடர் கட்டுப்பாட்டு மையத்தில் முதல்வர் மு.க.ஸ்டாலின் திடீரென ஆய்வு மேற்கொண்டார். சென்னையில் மழை, வெள்ள பாதிப்பு நிலவரம், மழைநீரை அகற்றும் பணி குறித்து அதிகாரிகளிடம் முதல்வர் ஸ்டாலின் கேட்டறிந்தார்.

பணிகளை முடுக்கி விட்டார்

பேரிடர் கட்டுப்பாட்டு மையத்தில் மக்கள் அளித்த புகார்கள், அவற்றின் மீது எடுக்கப்பட்ட நடவடிக்கை குறித்தும் அதிகாரிகளிடம் முதல்வர் கேட்டறிந்தார். மேலும், மழை பாதிப்பு ஏற்பட்ட பகுதிகளில் மழைநீர் அகற்றுதல் உள்ளிட்ட பணிகளை விரைவாக முடுக்கி விடும்படியும் அதிகாரிகளுக்கு அவர் உத்தரவிட்டார்.
சென்னையில் மழை பாதிப்பு தொடர்பாக எடுக்கப்பட்டு வரும் நடவடிக்கை குறித்து சென்னை மாநகர ஆணையர் ககன்தீப் சிங் உள்ளிட்ட அதிகாரிகள் எடுத்துக் கூறினார்கள்.

Published On December 31, 2021