ஏன் திடீரென விஜய் கட்சிக்கு இவ்வளவு ஓட்டுக்கள் கிடைத்தன?
சென்னை: தமிழக சட்டமன்றத் தேர்தல் 2026-ன் வாக்கு எண்ணிக்கை முடிவுகள், தமிழகத்தின் 50 ஆண்டு கால திராவிடக் கட்சிகளின் ஆதிக்கத்தைத் தகர்த்து ஒரு புதிய அரசியல் சகாப்தத்தை உருவாக்கியுள்ளன. நடிகர் விஜய்யின் தமிழக வெற்றிக் கழகம் (TVK) 108 தொகுதிகளில் வெற்றி பெற்று மாபெரும் தனிப்பெரும் சக்தியாக உருவெடுத்துள்ளது.
இந்தத் தேர்தல் முடிவுகள் குறித்து அரசியல் விமர்சகர்கள் மற்றும் சமூக ஆய்வாளர்கள், "இது வெறும் ஆட்சிக்கு எதிரான அதிருப்தி (Anti-incumbency) அல்ல, மாறாக நீண்ட கால அரசியல் சலிப்பிற்கு மக்கள் அளித்த மாற்று" எனத் தெரிவிக்கின்றனர். இந்த வரலாற்றுத் திருப்பத்தின் பின்னணி என்ன? ஏன் மக்கள் புதிய தலைவரை நோக்கி நகர்ந்துள்ளனர்? விரிவாகப் பார்ப்போம்.
மாற்று அரசியலுக்கான 15 சதவீத வாக்காளர்கள்
எந்தவொரு தேர்தல் களத்திலும் சுமார் 10 முதல் 15 சதவீதம் வரையிலான வாக்காளர்கள், பாரம்பரிய கட்சிகளுக்கு மாற்று அரசியலைத் தேடுபவர்களாக இருப்பார்கள். கடந்த பல தேர்தல்களில் இந்த வாக்குகள் சிதறிப் போயின அல்லது சிறிய கட்சிகளுக்குச் சென்றன. ஆனால் 2026 சட்டமன்றத் தேர்தலில், இந்த மாற்று வாக்காளர்கள் அனைவரும் ஒன்று திரண்டு தமிழக வெற்றிக் கழகத்திற்குத் தங்களது வாக்குகளை மொத்தமாக அளித்துள்ளனர்.
மரபு சார்ந்த அரசியலைத் தவிர்த்த விஜய்
விஜய் இந்தத் தேர்தலில் வழக்கமான மரபு சார்ந்த அரசியல் யுக்திகளைக் கையாளவில்லை.
- அவர் தமிழகம் முழுவதும் தீவிரமான தேர்தல் பிரச்சாரத்திற்குச் செல்லவில்லை.
- சுவரொட்டி (Poster) அரசியலைத் தவிர்த்துவிட்டு, இன்ஸ்டாகிராம் மூலம் நேரடி மக்கள் தொடர்பை மட்டுமே நம்பினார்.
- மற்ற கட்சிகளைப் போல தீவிரமான வாக்குறுதிகளை அள்ளி வீசாமல், மக்கள் எதிர்கொள்ளும் அடிப்படைப் பிரச்சனைகளை மட்டுமே மையப்படுத்தினார்.
திராவிடக் கட்சிகள் மீதான சலிப்பு
ஆளுங்கட்சியான திமுக மற்றும் எதிர்க்கட்சியான அதிமுக ஆகிய இரு கட்சிகளும் மாறி மாறி ஆட்சி செய்ததன் விளைவாக, கனிம வளக் கொள்ளை, மணல் கொள்ளை மற்றும் அனைத்து நிலைகளிலும் பரவியுள்ள ஊழல் ஆகியவற்றை மக்கள் நீண்ட காலமாகப் பார்த்துச் சலிப்படைந்துள்ளனர்.
மாற்றுக்கான தேடல்: மக்கள் ஒரு புதிய 'ப்ளேயர்' (Player) வருகையை எதிர்பார்த்துக் காத்திருந்தனர். முந்தைய தலைமுறையில் சீமான் மற்றும் விஜயகாந்த் போன்றவர்கள் ஒரு மாற்று சக்தியாக வர முயன்றாலும், அவர்களால் தமிழகத்தின் அனைத்துப் பகுதி மக்களையும், குறிப்பாக அனைத்து வயது முதியவர்களையும் ஈர்க்க முடியவில்லை. விஜய் சினிமாவில் மாஸ் ஹீரோ என்பதால் தங்களது ரியல் வாழ்க்கையில் ஹீரோவை தேடிய மக்கள் விஜய் கட்சிக்கு ஓட்டுக்களை குத்தியுள்ளனர். எனவேதான், அவர்கள் வேட்பாளர்களை பற்றி பார்க்கவில்லை. விஜய்க்காக ஓட்டுப் போட்டுள்ளனர்.
விஜய்யின் பரவலான ஈர்ப்பு: விஜய் சிறுவர் முதல் முதியவர் வரை அனைத்துத் தரப்பு மக்களிடமும் ஒரு குடும்ப நாயகனாக அறியப்படுகிறார். எனவே, அவர் மாற்றத்தைத் தருவார் என்ற நம்பிக்கையே இந்த மாபெரும் வெற்றிக்கு வித்திட்டது.
அரசியல் விமர்சகர்களின் கூற்றுப்படி, இந்தத் தேர்தல் முடிவு ஆளுங்கட்சிக்கு எதிரான அலை (Anti-incumbency) அல்ல. ஆளுங்கட்சி பல்வேறு நலத் திட்டங்களைச் செயல்படுத்தி இருந்தாலும், மக்கள் அந்தத் திட்டங்களை விட நேர்மையான மற்றும் வெளிப்படையான நிர்வாகத்தையே விரும்புகின்றனர். இது முழுக்க முழுக்க 'விஜய் ஆதரவு அலை' (Pro-Vijay Wave) என்று தெளிவாகிறது.
தமிழக அரசியலின் புதிய விடியல்
தமிழ்நாடு என்பது எப்போதும் மாற்றத்தை விரும்பும் மாநிலம். 2026 சட்டமன்றத் தேர்தல் முடிவுகள், தமிழ்நாட்டின் அரசியல் திசையை மாற்றி, புதிய தலைமுறைக்கான பாதையை அமைத்துக் கொடுத்துள்ளன.
Click it and Unblock the Notifications
Sign in with Google