விஜய் வரவே மாட்டாரா? பொம்மையை வைத்து பிரச்சாரம்.. கடுப்பான தவெக வேட்பாளர்கள்.. பரிதாப நிலை

Updated: Tuesday, April 7, 2026, 8:33 [IST]

Subscribe to Oneindia Tamil

சென்னை: தேர்தலுக்கு இன்னும் 14 நாட்களே பாக்கி. ஏப்ரல் 21-ம் தேதியுடன் பரப்புரை ஓய்ந்தாக வேண்டும். திமுக, அதிமுக என இரு துருவங்களும் 'டூ ஆர் டை' மோடில் இறங்கி சுழன்று கொண்டிருக்க, தமிழக வெற்றிக் கழகத்தின் கூடாரத்தில் மட்டும் ஏகப்பட்ட அப்செட் மூட்கள். "விஜய் வருவார்... மேடை ஏறுவார்... ஆட்டம் மாறும்!" என்று காத்திருந்த வேட்பாளர்களுக்கு, இப்போது மிஞ்சியிருப்பது ஏமாற்றம் மட்டும்தான்.

tamil nadu assembly elections 2026 TVK Vijay

சிலைதான் எங்க 'ஸ்டார்' கேம்பைனர்!

விஜய் நேரிலோ அல்லது ஹெலிகாப்டரிலோ வந்து பிரச்சாரம் செய்வார் என்று எதிர்பார்த்த வேட்பாளர்கள், இப்போது வேறு வழியின்றி நூதனமான ரூட்டை கையில் எடுத்திருக்கிறார்கள்.

பிரச்சார வாகனங்களில் விஜய்யின் உருவச் சிலைகளையும், மார்பளவு சிலைகளையும் (Bust Statues) வைத்துக்கொண்டு ஊர் ஊராகச் சுற்றுகிறார்கள் தவெக வேட்பாளர்கள்.

"அண்ணன் வரலன்னாலும் பரவாயில்லை, அவரோட சிலையாவது கூட இருக்கட்டும்" எனத் தொண்டர்கள் ஒரு பக்கம் உருகினாலும், " விஜய் வந்து வந்து பேசினாத்தான் ஓட்டு விழும், வெறும் பொம்மையை வச்சுக்கிட்டு என்ன பண்றது?" என வேட்பாளர்கள் ரகசியமாகக் குமுறுகிறார்கள். இதற்கே வராதவர் எதிர்காலத்தில் மக்கள் பிரச்சனை என்றால் எப்படி வருவார்? மக்களுக்கு ஏதாவது தேவை என்றால் எப்படி வருவார்? என்று கேள்வி எழுப்புகின்றனர்.

சில தொகுதிகளில், விஜய்யின் சிலைக்கு மாலை அணிவித்து, அதற்குப் பக்கத்தில் நின்று செல்ஃபி எடுக்கும் 'செல்ஃபி பாயிண்ட்' ஆக மட்டுமே தவெக பிரச்சார வாகனங்கள் மாறியிருக்கின்றன.

அறிவாலயம் vs எடப்பாடி: பெர்சனல் அட்டாக்!

விஜய் களத்தில் இல்லாத கேப்பில், திமுக-வும் அதிமுக-வும் நேருக்கு நேர் மோதி விளையாடுகின்றன.

எடப்பாடியின் அனல்: கருணாநிதி குடும்பம், உதயநிதி என தனிநபர் தாக்குதலில் எடப்பாடி பழனிசாமி இறங்கி அடிக்க, அதிமுக தொண்டர்கள் உற்சாகத்தில் இருக்கிறார்கள்.

ஸ்டாலினின் பதிலடி: "ஆட்சி அதிகாரம் கையில் இருக்கும்போதே ஒன்றும் செய்யாதவர், இப்போது எகிறிப் குதித்து என்ன பயன்?" என முதல்வர் ஸ்டாலினும், உதயநிதியும் கொடுக்கிற பதிலடிகள் களத்தை அனல் பறக்க வைக்கின்றன.

இங்கேதான் தவெக வேட்பாளர்கள் சறுக்குகிறார்கள். "எங்களுக்கு எதிரி இவங்கதான்!" என விஜய் மாநாட்டில் சொன்னாரே தவிர, இப்போது அந்த எதிரிகளை எதிர்கொள்ள வேட்பாளர்களைக் களத்தில் 'தனியாக' விட்டுவிட்டாரோ என்கிற சந்தேகம் தவெக-வினரிடையே எழுந்துள்ளது.

நிர்வாகிகளின் ஆதங்கம்:

"பெர்மிஷன் கிடைக்கவில்லை, போலீஸ் கெடுபிடி செய்கிறது என ஏதாவது காரணத்தை சொல்லி ஒவ்வொரு பிரச்சாரத்தையும் தலைவர் ரத்து செய்வது எங்களுக்குப் பின்னடைவு. வேட்புமனுத் தாக்கலின் போது எம்.ஜி.ஆர் சிலைக்கு மாலை அணிவித்ததோடு சரி, அதன்பிறகு தலைவர் இன்னும் பல தொகுதிகளுக்கு எட்டிப்பார்க்கவே இல்லை" என ஓப்பனாகவே பேசத் தொடங்கிவிட்டார்கள் நிர்வாகிகள்.

அரசியல் என்பது 'மாஸ்' காட்டுவது மட்டுமல்ல, 'மண்ணில்' இறங்கி வேலை செய்வதும் கூட. விஜய் தனது பிளானை மாற்றிக் கொண்டு கடைசி ஒரு வாரத்திலாவது அதிரடி காட்டுவாரா? அல்லது இந்த 'சிலை' அரசியல் மட்டுமே தவெக-வின் அடையாளமாக இருக்குமா?

சினிமாவில் 'கட்-அவுட்'களுக்குப் பால் ஊற்றுவது ரசிகர்களுக்குப் பிடிக்கும். ஆனால் தேர்தலில் 'கட்-அவுட்'களுக்கு ஓட்டுப் போடுவது மக்களுக்குப் பிடிக்குமா என்பது தேர்தல் ரிசல்ட் அன்று தெரிந்துவிடும்!