அதிமுக பெயரையே தவிர்க்கும் விஜய்?.. தவெக வியூகத்தால் அதிருப்தியில் தொண்டர்கள்!

சென்னை: தமிழக அரசியலில் புதிய சக்தியாக உருவெடுத்துள்ள தமிழக வெற்றிக் கழகத்தின் தலைவர் மற்றும் முதலமைச்சர் விஜய், தனது அரசியல் உரைகளில் அதிமுகவை நேரடியாக குறிப்பிடாமல் விமர்சித்து வருவது, அக்கட்சித் தொண்டர்கள் மத்தியில் அதிருப்தியை ஏற்படுத்தியுள்ளதாக கூறப்படுகிறது.

மூன்று ஆண்டுகளுக்கு முன்பு அரசியல் கட்சியை தொடங்கிய விஜய், தனது முதல் சட்டமன்றத் தேர்தலிலேயே ஆட்சியைப் பிடித்து அரசியல் வட்டாரங்களில் பெரும் கவனம் பெற்றார். எம்.ஜி.ஆருக்குப் பிறகு முதல் முறையாக புதிய கட்சி ஒன்று ஆட்சியை அமைத்ததாக தவெக ஆதரவாளர்கள் கூறி வருகின்றனர்.

சட்டமன்றத் தேர்தல் பிரசார காலம் முதலே, தமிழக அரசியலில் உண்மையான போட்டி தவெக மற்றும் திமுக இடையே மட்டுமே உள்ளது என்று விஜய் தொடர்ந்து வலியுறுத்தி வந்தார். தேர்தல் முடிவுகளும் அந்த அரசியல் போட்டியை உறுதிப்படுத்தியதாக அவரது ஆதரவாளர்கள் கருதுகின்றனர்.

அதிமுக - தீர்ந்துபோன சக்தி

குறிப்பாக, முன்னாள் ஆளுங்கட்சியான அதிமுகவை தனது உரைகளில் நேரடியாக குறிப்பிடுவதை விஜய் பெரும்பாலும் தவிர்த்து வருகிறார். அதற்கு பதிலாக, "தீர்ந்து போன சக்தி" அல்லது "மற்றவர்கள்" போன்ற வார்த்தைகளை பயன்படுத்துவதாக அரசியல் பார்வையாளர்கள் சுட்டிக்காட்டுகின்றனர்.

ஜெயலலிதா மறைவுக்குப் பிறகு அதிமுக பல்வேறு சவால்களை எதிர்கொண்டு வரும் நிலையில், அக்கட்சியின் பெயரையே பயன்படுத்தாமல் தவெக தன்னை திமுகவின் பிரதான மாற்றாக முன்னிறுத்தி வருவது, அதிமுக தொண்டர்கள் மத்தியில் ஏமாற்றத்தை உருவாக்கியுள்ளதாக தகவல்கள் தெரிவிக்கின்றன.

இதற்கிடையில், அதிமுகவைச் சேர்ந்த சில முன்னாள் சட்டமன்ற உறுப்பினர்கள் மற்றும் நிர்வாகிகள் தவெகவில் இணைந்திருப்பதும் அரசியல் ரீதியாக கவனிக்கப்படும் நிகழ்வாக உள்ளது. குறிப்பாக, அதிமுகவில் இருந்து விலகிய சில முக்கிய நிர்வாகிகள் தவெக பக்கம் சென்றிருப்பது, அக்கட்சியின் அடித்தளத்தில் தாக்கத்தை ஏற்படுத்தியுள்ளதாக கூறப்படுகிறது.

எம்ஜிஆர், ஜெ.வை பாராட்டும் விஜய்

அதேநேரத்தில், தனது அரசியல் மேடைகளில் எம்.ஜி.ஆர் மற்றும் ஜெயலலிதா ஆகியோரின் பங்களிப்புகளை விஜய் பாராட்டிப் பேசி வருகிறார். இதன் மூலம் அதிமுகவின் பாரம்பரிய வாக்காளர்கள் மற்றும் தொண்டர்களின் ஆதரவை ஈர்க்கும் முயற்சியில் தவெக ஈடுபட்டுள்ளதாக அரசியல் விமர்சகர்கள் கருதுகின்றனர்.

தமிழகத்தில் விரைவில் இடைத்தேர்தல் மற்றும் உள்ளாட்சித் தேர்தல்கள் நடைபெற உள்ள சூழலில், ஆளுங்கட்சியாக இருக்கும் தவெகவுக்கு அந்த தேர்தல்களில் வெற்றி பெறுவது முக்கியமான அரசியல் சவாலாக பார்க்கப்படுகிறது. அதற்கான பணிகளை கட்சி தற்போது தீவிரப்படுத்தி வருவதாக கூறப்படுகிறது.

English summary

Vijay: Chief Minister Vijay's continued decision to avoid directly mentioning AIADMK in his political speeches has sparked discussion among political observers and party cadres. The strategy is being viewed as an attempt to position TVK as the primary alternative to the DMK in Tamil Nadu politics.