மதுரவாயல் தொகுதியில் திமுக சார்பில் போட்டியிடப்போவது யார்? முட்டி மோதும் மூவர்

சென்னை: சென்னை மதுரவாயல் சட்டமன்ற தொகுதியை பொறுத்தவரை திமுக சிட்டிங் எம்.எல்.ஏ காரப்பாக்கம் கணபதி மீண்டும் களமிறங்க விரும்புகிறார். அதேபோல் அப்பகுதியின் ஒன்றிய கழக செயலாளராக உள்ள அ. ம. துரை வீரமணி என்பவரும் காய் நகர்த்தி வருகிறாராம்.
அதேநேரம் கடந்த முறை மக்கள் நீதி மய்யம் சார்பில் போட்டியிட்ட தற்போதைய தி.மு.க-வின் ஐடி விங் மாநில நிர்வாகி பத்மபிரியாவும் சீட் எதிர்பார்க்கிறார்..

ஒரு காலத்தில் சென்னையின் புறநகர் பகுதியாக இருந்த மதுரவாயல் பகுதி இன்று, சென்னையின் ஒரு அங்கமாகவே மாறி உள்ளது. சென்னை மாநகராட்சியின் நுழைவு வாயிலாக உள்ள மதுரவாயல் சட்டமன்றத் தொகுதியில் அயப்பாக்கம், நொளம்பூர், கரம்பாக்கம், வானகரம், ராமாபுரம், வளசரவாக்கம், போரூர், நெற்குன்றம் மற்றும் மொகப்பேர் மற்றும் அம்பத்தூரின் சில வார்டுகள் உள்ளன.

அதேபோல் கோயம்பேடு, போரூர், அம்பத்தூர் தொழிற்பேட்டை ஆகியவையும் மதுரவாயல் தொகுதியாக உள்ளது. ஒட்டுமொத்தமாக பார்த்தால், மிகப்பெரிய தொழில் வளமும், அசுரத்தனமான ரியல் எஸ்டேட் வளர்ச்சியும் உள்ள தொகுதியாக மதுரவாயல் தொகுதி இருக்கிறது.

மதுரவாயல் தொகுதியை பொறுத்தவரை கடந்த 2021ம் ஆண்டு நடந்த தேர்தலில் அதிமுகவில் அமைச்சராக இருந்த பெஞ்சமினை தோற்கடித்து திமுகவின் காரப்பாக்கம் கணபதி வெற்றி பெற்றார். சிட்டிங் எம்.எல்.ஏ என்ற அடிப்படையில் காரப்பாக்கம் கணபதி மீண்டும் களமிறங்க விரும்புகிறார்.

அதேபோல் அப்பகுதியின் ஒன்றிய செயலாளராக உள்ள அ. ம. துரை வீரமணி என்பவரும் காய் நகர்த்தி வருகிறாராம். இவர் 2021 ஆம் ஆண்டு மதுரவாயல் பகுதியில் எதிர்க்கட்சி தலைவராக இருந்த போது ஸ்டாலின் பங்கேற்ற கிராம சபை கூட்டத்தை நடத்தியிருந்தார். அப்போது ஸ்டாலினே பாராட்டி இருந்தார். பாரம்பரியமான திமுக குடும்பத்தை சேர்ந்த இவரின் தந்தை மொழிப்போர் தியாகி என்பது குறிப்பிடத்தக்கது.

அதேநேரம் கடந்த முறை மக்கள் நீதி மய்யம் சார்பில் 33 ஆயிரம் வாக்குகள் பெற்ற தி.மு.க-வின் ஐடி விங் மாநில நிர்வாகி பத்மபிரியாவும் சீட் எதிர்பார்க்கிறார். அவர் மீண்டும் போட்டியிட முயற்சிப்பதாக வெளிப்படையாகவே கூறியிருக்கிறார்.

மக்கள் நீதி மய்யத்திற்கு எத்தனை சீட் கிடைக்கும் என்பது உறுதியாக தெரியவில்லை. எனினும், கோவை தெற்கு, மதுரவாயல், வேளச்சேரி ஆகிய தொகுதிகளை பெற வேண்டும் என்று காய்நகர்த்தி வருகிறது. அதேபோல் திமுகவின் கூட்டணி கட்சியான மார்க்சிஸ்ட் கம்யூனிஸ்ட் கட்சியும் மதுரவாயல் தொகுதியை கேட்க ஆயத்தமாகி வருகிறதாம்.

மதுரவாயல் தொகுதியை திமுக கூட்டணி கட்சிக்கு விட்டுத்தரப் போகிறதா அல்லது தானே களம் காண போகிறதா என்பது ஒரு புறம் இருந்தாலும் மதுரவாயல் தொகுதியில் போட்டியிட இந்த மூன்று பேர் இடையேயும் கடுமையான போட்டி இருப்பதாக கூறப்படுகிறது. இந்த முறை யாருக்கு சீட் கிடைக்கும் என்பதை பொறுத்திருந்து தான் பார்க்க வேண்டும்.

English summary

Who will contest on behalf of DMK in the Maduravoyal constituency? There is a fight between three candidates - Karapakkam Ganapathy, Padma Priya and durai Veeramani.