திமுகவுடன் மோதுவது பங்காளி சண்டை.. நானே திராவிட கட்சிகளில் இருந்து வளர்ந்தவன்.. சீமான் அந்தர் பல்டி!
கோவை: அதிமுக திமுகவுடன் நான் மோதுவது என்பது பங்காளி சண்டைதான். திராவிட கட்சிகளில் இருந்து வளர்ந்து வந்தவன் தான் நான். திராவிட கழகங்களுக்கும் நாம் தமிழருக்கும் இருப்பது சகோதர யுத்தம் என சீமான் 'பல்டி' அடித்திருப்பது பரபரப்பை ஏற்படுத்தியுள்ளது.
2024 நாடாளுமன்றத் தேர்தலை எதிர்கொள்ள அரசியல் கட்சிகள் தீவிரமாக தயாராகி வருகின்றன. 2024 மக்களவை தேர்தலில் தமிழ்நாட்டின் ராமநாதபுரம் தொகுதியில் பிரதமர் மோடி போட்டியிடப் போவதாக ஒரு தகவல் அண்மைக்காலமாக உலவி வருகிறது. தமிழ்நாட்டில் பாஜகவை வளர்க்கும் நோக்கில், தமிழகத்தில் பிரதமர் மோடி போட்டியிட பரிசீலிப்பதாக பரவி வரும் தகவல் அரசியல் அரங்கில் விவாதங்களை ஏற்படுத்தியுள்ளது.
இதற்கிடையே, நாடாளுமன்றத் தேர்தலில் ராமநாதபுரத்தில் பிரதமர் மோடி போட்டியிட்டால், அவரை எதிர்த்து நான் போட்டியிடுவேன். அவர் தமிழ்நாட்டில் போட்டியிடவில்லை என்றால், நான் எம்.பி தேர்தலில் போட்டியிடமாட்டேன் என நாம் தமிழர் கட்சியின் தலைமை ஒருங்கிணைப்பாளர் சீமான் அண்மையில் தெரிவித்திருந்தார்.
இந்த நிலையில், நாடாளுமன்ற தேர்தலில் பிரதமர் மோடி ராமநாதபுரம் தொகுதியில் போட்டியிட்டால், அவரை எதிர்த்து திமுக நேரடியாக களம் கண்டால், நாம் தமிழர் கட்சி போட்டியிடாது. திமுகவுக்கு ஆதரவளிக்கும் என சீமான் தெரிவித்துள்ளார். திமுகவிற்கு ஆதரவளிப்போம் என சீமான் தடாலடியாகத் தெரிவித்துள்ளது பரபரப்பை ஏற்படுத்தியுள்ளது.
கோவையில் செய்தியாளர்களை சந்தித்த நாம் தமிழர் கட்சியின் ஒருங்கிணைப்பாளர் சீமான், "2024ஆம் ஆண்டு மக்களவை தேர்தலில், ராமநாதபுரம் தொகுதியில் பிரதமர் போட்டியிடுவதாக கூறுகின்றனர். அப்படி பிரதமர் மோடி ராமநாதபுரத்தில் போட்டியிடும் பட்சத்தில் திமுக வேட்பாளரை நிறுத்தட்டும். பிரதமர் மோடிக்கு எதிராக திமுக நேரடியாக போட்டியிட்டால் அத்தொகுதியில் நாம் தமிழர் கட்சி போட்டியிடாது. ராமநாதபுரம் தொகுதியில் திமுகவை ஆதரிக்கும்." எனத் தெரிவித்தார்.
மேலும், அதிமுக திமுகவுடன் நான் மோதுவது என்பது பங்காளி சண்டைதான். திராவிட கட்சிகளில் இருந்து வளர்ந்து வந்தவன் தான் நான். திராவிட கழகங்களுக்கும் நாம் தமிழருக்கும் இருப்பது சகோதர யுத்தம். திமுகவை வீழ்த்துவதற்கு எனக்கு அண்ணாமலை எதற்கு? திராவிடத்தை ஒழிக்க வேண்டும் என்பது எனது கனவல்ல, தமிழ் தேசியத்தை வளர்க்க வேண்டும் என்பதுதான் எனது கனவு. நாம் தமிழர் என்பதே சாதி ஒழிப்பு தான் என்றும் சீமான் பேசியுள்ளார்.
நடிகர் விஜயலட்சுமி புகார் மீது சீமான் மீது நடவடிக்கை எடுக்க தமிழக அரசு தீவிரம் காட்டி வருவதாக தகவல்கள் வெளியாகி வரும் நிலையில், நாடாளுமன்றத் தேர்தலில் ராமநாதபுரம் தொகுதியில் திமுகவை நாம் தமிழர் கட்சி ஆதரிக்கும் என்றும், திமுக அதிமுகவுடன் நடப்பது சகோதர யுத்தம் என்றும் சீமான் கூறியுள்ளது பரபரப்பை ஏற்படுத்தியுள்ளது.
கடந்த சில நாட்களாக பாஜக மாநிலத் தலைவர் அண்ணாமலைக்கும், சீமானுக்கும் இடையே கருத்து மோதல் நிலவி வருகிறது. தனித்துப் போட்டியிட்டு தன்னை விட அதிக ஓட்டு வாங்கிக் காட்ட முடியுமா என அண்ணாமலைக்கு சீமான் சவால் விட்ட நிலையில், அவரும் அதை ஏற்றுக்கொள்வதாக கூறியது குறிப்பிடத்தக்கது.
Click it and Unblock the Notifications
Sign in with Google