தமிழகத்துக்கு 2024ல் சட்டசபை தேர்தல்.. மீண்டும் முதல்வராகும் ஈபிஸ்.. அடித்து கூறிய தமிழ் மகன் உசேன்

Updated: Friday, October 7, 2022, 11:25 [IST]

Subscribe to Oneindia Tamil

கடலூர்: 2024 நாடாளுமன்ற தேர்தலுடன் சட்டசபை தேர்தல் வந்தால் அதிமுக வெற்றி பெற்று எடப்பாடி பழனிச்சாமி மீண்டும் தமிழக முதல்வராக வருவார் என்று அதிமுக அவைத்தலைவர் தமிழ் மகன் உசேன் கூறினார்.

அதிமுகவில் இரட்டை தலைமை இருந்தது. ஓ பன்னீர் செல்வம் ஒருங்கிணைப்பாளராகவும், எடப்பாடி பழனிச்சாமி இணை ஒருங்கிணைப்பாளராகவும் உள்ளார்.

இதற்கிடையே தான் கடந்த ஜூன் மாதம் கட்சியில் ஒற்றை தலைமை விவகாரம் பூதாகரமாக வெடித்தது. இதில் ஓ பன்னீர் செல்வம், எடப்பாடி பழனிச்சாமி இடையே மனஸ்தாபம் ஏற்பட்டது.

இடைக்கால பொதுச்செயலாளராக ஈபிஎஸ்

இதையடுத்து நடந்த பொதுக்குழுவில் எடப்பாடி பழனிச்சாமி இடைக்கால பொதுச்செயலாளராக தேர்வு செய்யப்பட்டார். இதனை எதிர்த்து உச்சநீதிமன்றத்தில் ஓ பன்னீர் செல்வம் தரப்பு வழக்கு தொடர்ந்துள்ளது. இந்த வழக்கு மீது மீண்டும் உச்சநீதிமன்றம் விசாரிக்க உள்ளது. இதற்கு மத்தியில் ஓ பன்னீர் செல்வம்-எடப்பாடி பழனிச்சாமி தரப்பினர் ஒருவரையொருவர் குற்றம்சாட்டி வருகின்றனர்.

தமிழ் மகன் உசேன் தொழுகை

இந்நிலையில் தான் தமிழக முதல்வராக மீண்டும் எடப்பாடி பழனிச்சாமி வர வேண்டி அதிமுக அவைத் தலைவர் தமிழ்மகன் உசேன் கடலுார் பச்சையாங்குப்பம் போலோஷா தைக்கால் தர்காவில் சிறப்பு தொழுகை நடத்தினார். பின்னர் பெண்களுக்கு நலத்திட்ட உதவிகளை அவர் வழங்கினார். அதன்பிறகு கடலூர் மாவட்டம் பண்ருட்டியில் அதிமுக அவைத்தலைவர் தமிழ் மகன் உசேன் பத்திரிகையாளர்களை சந்தித்தார். அப்போது அவர் கூறியதாவது:

நாடாளுமன்ற தேர்தலுடன் சட்டசபை

மிக விரைவில் நாடாளுமன்ற தேர்தல் வரும் சமயத்தில் சட்டசபை தேர்தலும் வரும் என்ற எதிர்பார்ப்பு மக்கள் மத்தியில் உள்ளது. நாடாளுமன்ற தேர்தலுடன் சட்டசபை தேர்தல் வந்தால் மீண்டும் சட்டசபை தேர்தலில் பெருவாரியான வாக்குகள் பெற்று மீண்டும் எடப்பாடி பழனிச்சாமி முதல்வராவார். அதிமுகவின் பொதுச்செயலாளராக எடப்பாடி பழனிச்சாமி தான் இருப்பார்.

விரைவில் முதல்வராகும் ஈபிஎஸ்

இறைவனிடம் கையேந்துங்கள் அவர் இல்லையென்று சொல்லுவது இல்லை என்பது போல் இறைவனிடம் கையேந்த வந்திருக்கிறோம். நிச்சயமாக அதிமுகவின் பொதுச்செயலாளராகவும், தமிழகத்தின் அடுத்த முதல்வராகவும் எடப்பாடி பழனிச்சாமி விரைவில் வருவார் என்ற நம்பிக்கையில் சிறப்பு பிரார்த்தனை செய்துள்ளோம். '' என்றார்.