அய்யோ கேப்டன் இல்லாம.. கடலூர் பிரசாரத்தில் திடீரென தலையிலடித்து கதறி கதறி அழுத பிரேமலதா!

கடலூர்: லோக்சபா தேர்தல் பிரசாரத்தின் போது கணவர் விஜயகாந்த் மறைவை சுட்டிக்காட்டி தேமுதிக பொதுச்செயலாளர் பிரேமலதா தலையில் அடித்துக் கொண்டே கண்ணீர் விட்டு கதறி அழுதது அக்கட்சியினரை உருக வைத்தது.

லோக்சபா தேர்தலில் அதிமுக கூட்டணியில் இடம் பெற்றுள்ளது தேமுதிக. மொத்தம் 5 லோக்சபா தொகுதிகளில் தேமுதிக போட்டியிடுகிறது. மேலும் ஒரு ராஜ்யசபா சீட் தருவதாக அதிமுக வாக்குறுதி அளித்துள்ளது.

தேமுதிக பொதுச்செயலாளர் பிரேமலதா விஜயகாந்த், அதிமுக கூட்டணி வேட்பாளர்களை தீவிரமாக ஆதரித்து பிரசாரம் செய்து வருகிறார். கடலூரில் நேற்று பிரசாரம் செய்த பிரேமலதா கண்ணீரும் கம்பலையுமாக பேசியது தேமுதிகவினரை உருக வைத்தது.

கடலூர் பிரசாரத்தில் பிரேமலதா விஜயகாந்த் பேசியதாவது: எங்க கல்யாணம், கேப்டன் விஜயகாந்துடன் நான் திருமணம் செய்து முதலில் வந்த ஊர் பண்ருட்டிதான். ஆனால் என் துரதிருஷ்டம், நான் இன்னைக்கு கேப்டன் இல்லாமல் வந்திருக்கிறேனே.. கேப்டன் கூடயே... என்னைக்கும் வந்த நானு இன்னைக்கு கேப்டன் இல்லாம முதல் முறையாக உங்க கிட்ட வந்துருக்கேனே.. ஏன் கடவுள் இப்படி செஞ்சாரோ? யாருக்கும் எந்த தண்டனையும் நாங்க கொடுக்கலையே.. தெரியலையே எனக்கு..

கேப்டன் கூடவேதான் நான் வருவேன். எல்லா இடத்துக்கும் கேப்டன் கூடவேதான் வருவேன்.. நான் இப்ப தலைவர் இல்லாம உங்களை பார்க்க வந்திருக்கேனே.. எனக்கு ரொம்ப மனசு வலிக்குதே... என் அன்பு தொண்டர்களே! இந்த புகழ் எல்லாம் நம்ம கேப்டனுக்குதான். நம்ம தலைவருக்குதான்.. அவர் சம்பாதித்ததுதான் நீங்க எல்லாருமே.. உங்க எல்லாரையும் கையெடுத்து கும்பிட்டு கேட்டுக்கிறேன்... நான் எவ்வளவோ மனசுக்குள் துக்கத்தை கட்டுப்படுத்தினாலும் என்னால முடியலையே..

நான் கேப்டன் கூட இங்க வந்த நாட்கள்தான் என் மைண்ட்ல வருது.. தலைவர் இல்லாமல் இன்னைக்கு நான் உங்களைப் பார்க்க எனக்கு கஷ்டமா இருக்கே. தலைவர் நம்ம கூட இல்லையேனு யாரும் நினைக்காதீங்க.. தலைவர் அங்கே (வானத்தை பார்த்து) நம்ம கூட தெய்வமா அங்க இருக்கிறார்.. தலைவர் நம்ம கூடத்தான் இருக்கார்.. எங்கேயும் போகலை.. உங்க எல்லாருக்கும் தலைவர் சார்பாக நன்றியை தெரிவிக்கிறேன். இவ்வாறு பிரேமலதா விஜயகாந்த் பேசினார். பிரேமலதா விஜயகாந்தின் இந்த கண்ணீரும் கம்பலையுமான பேச்சால் தேமுதிகவினர் உருக்கமாகிப் போகினர்.

English summary

DMDK leader Premalatha Vijayakanth Crying in Cuddalore Election Campaign.