அதிமுக - பாஜக கூட்டணி ஆட்சியா? அமித் ஷா அப்படி சொல்லவில்லை.. ஷாக் கொடுத்த திண்டுக்கல் சீனிவாசன்!
திண்டுக்கல்: தமிழ்நாட்டில் எடப்பாடி பழனிசாமி தலைமையில் தேசிய ஜனநாயக கூட்டணியில் தேர்தலை சந்திப்போம் என்று மட்டும்தான் மத்திய அமைச்சர் அமித் ஷா சொன்னதாக முன்னாள் அமைச்சர் திண்டுக்கல் சீனிவாசன் தெரிவித்துள்ளார். தேர்தலில் வென்றால் கூட்டணி ஆட்சி அமைக்கப்படும் என்று அமித் ஷா சொல்லவில்லை என்று கூறிய அவர், அரசியல்வாதிகள் மாற்றி மாற்றித்தான் பேசுவோம் என்றும் தெரிவித்தார்.
2026 சட்டமன்றத் தேர்தலில் அதிமுக - பாஜக கூட்டணி உறுதி செய்யப்பட்டுள்ளது. நேற்று முன்தினம் மத்திய அமைச்சர் அமித் ஷா மற்றும் அதிமுக பொதுச்செயலாளர் எடப்பாடி பழனிசாமி சந்தித்து கூட்டணியை உறுதி செய்தனர். அப்போது 1998ல் நடந்த நாடாளுமன்றத் தேர்தலில் வென்றதை போல் மீண்டும் வெற்றி பெற்று தமிழ்நாட்டில் தேசிய ஜனநாயக கூட்டணி ஆட்சி அமைக்கும் என்று அமித் ஷா தெரிவித்தார்.
அதுமட்டுமல்லாமல் தேர்தல் போட்டியிடும் தொகுதி எண்ணிக்கை குறித்து பின்னர் பேசி முடிவெடுக்கப்படும் என்று கூறிய அமித் ஷா, கூட்டணி ஆட்சியாகவே அமையும் என்று தெரிவித்தார். இதன் மூலமாக அதிமுக - பாஜக கூட்டணி தேர்தலில் வென்றால்,. முதலமைச்சராக எடப்பாடி பழனிசாமி செயல்பட்டாலும் துணை முதலமைச்சராக பாஜகவைச் சேர்ந்த ஒருவர் நியமிக்கப்படலாம் என்று பார்க்கப்படுகிறது.
இதனால் பாஜகவினர் தீவிரமாக சட்டமன்றத் தேர்தலில் பணியாற்ற வாய்ப்புகள் இருப்பதாக நம்பப்படுகிறது. இந்த நிலையில் கூட்டணி ஆட்சி தொடர்பாக அதிமுக முன்னாள் அமைச்சரும், பொருளாளருமான திண்டுக்கல் சீனிவாசன் விளக்கம் ஒன்றை கொடுத்துள்ளார். இதுதொடர்பாக செய்தியாளர்களை சந்தித்து திண்டுக்கல் சீனிவாசன் பேசுகையில், சினிமா கிளைமாக்ஸ் போல் அதிமுக - பாஜக கூட்டணி அமைந்துள்ளது.
மத்திய அமைச்சர் அமித் ஷா முன்னிலையில் தேசிய ஜனநாயக கூட்டணியில் அதிமுக இணைந்துள்ளது. வரும் சட்டமன்றத் தேர்தலில் நமது கூட்டணி நிச்சயமாக திமுகவை டெபாசிட் இழக்கம் செய்யும். முன்னதாக சைத்தான் கூட்டணியால் தான் தோற்றோம் என்று கூறினேன். அரசியல்வாதிகள் சூழலுக்கு ஏற்ப மாற்றி மாற்றித்தான் பேசுவோம்.
அதனால் பழசை எல்லாம் துடைத்துவிட வேண்டும். அதேபோல் தமிழ்நாட்டில் எடப்பாடி பழனிசாமி தலைமையிலான தேசிய ஜனநாயக கூட்டணியில் தேர்தலை சந்திப்போம் என்றுதான் அமித் ஷா தெரிவித்தார். அவர் கூட்டணி ஆட்சி என்று சொல்லவில்லை என்றும் விளக்கம் அளித்துள்ளார். இதனால் அதிமுக மற்றும் பாஜக தொண்டர்களிடையே குழப்பம் ஏற்பட்டுள்ளது.
Click it and Unblock the Notifications
Sign in with Google