இஸ்லாமியர்களுக்கு இட ஒதுகீட்டை 7% ஆக்குங்க.. மதவாத சக்திகளை தோற்கடிக்கனும்.. தமிழ்நாடு தவ்ஹீத் ஜமாஅத் தீர்மானம்!

சென்னை: ஈரோட்டில் நடந்த தமிழ்நாடு தவ்ஹீத் ஜமாஅத் கட்சியின் மாநில பொதுக்கூட்டத்தில், இஸ்லாமியர்களுக்கு 7 சதவீதம் இடஒதுக்கீட்டை உயர்த்த வேண்டும், மதவாத சக்திகளையும், அவர்களுடன் கூட்டணி வைத்துள்ளவர்களையும் மக்கள் தோற்கடிக்க வேண்டும் என தீர்மானம் நிறைவேற்றப்பட்டுள்ளது. பிளவுபடுத்தும் சக்திகள் தமிழ்நாட்டில் காலூன்ற முயற்சிப்பதாகவும் பாஜகவை மறைமுகாக விமர்சித்தும் தீர்மானம் நிறைவேற்றப்பட்டது.

ஈரோட்டில் நேற்று தமிழ்நாடு தவ்ஹீத் ஜமாஅத் (TNTJ) கட்சியின் 25வது மாநில பொதுக்குழு கூட்டம் நடைபெற்றது. இந்தக் கூட்டத்தில் கட்சியின் தலைவர் சம்சுல்லுஹா ரஹ்மானி உள்பட கட்சியின் பொதுகுழு உறுப்பினர்கள் பங்கேற்றனர். தமிழகத்தில் விரைவில் சட்டமன்ற தேர்தல் நடைபெற உள்ள நிலையில், பல்வேறு முக்கிய தீர்மானங்கள் நிறைவேற்றப்பட்டன.

அதாவது, எதிர்வரும் சட்டமன்றத் தேர்தலில் மதவாத சக்திகளையும், அவர்களுடன் கூட்டணி அமைத்தவர்களையும் மக்கள் தோற்கடிக்க வேண்டும் என தீர்மானம் நிறைவேற்றப்பட்டது. பிளவுபடுத்தும் சக்திகள் தமிழ்நாட்டில் காலூன்ற முயற்சிப்பதாகவும் பாஜகவை மறைமுகமாக விமர்சித்தும் தீர்மானம் நிறைவேற்றப்பட்டது.

அமைதி மற்றும் மத நல்லிணக்கத்தின் புகலிடமான தமிழ்நாடு தொடர வேண்டும் எனவும் தீர்மானத்தில் நிறைவேற்றப்பட்டது. மேலும், இஸ்லாமியர்களுக்கான இடஒதுக்கீட்டை 3.5%லிருந்து 7% ஆக உயர்த்த வேண்டும். முதல் கட்டமாக 5% ஆக அதிகரிக்கவும், தற்போதைய 3.5% ஒதுக்கீட்டின் பலன்கள் குறித்து வெள்ளை அறிக்கை வெளியிடவும் தீர்மானம் நிறைவேற்றப்பட்டது.

அதேபோல, வரும் சட்டமன்ற தேர்தலில் அரசியல் கட்சிகள் அதிக எண்ணிக்கையில் இஸ்லாமிய வேட்பாளர்களை நிறுத்த வேண்டும் எனவும் தமிழ்நாடு தவ்ஹீத் ஜமாஅத் கோரியுள்ளது. தற்போது தமிழகத்தில் மொத்தம் உள்ள 234 சட்டமன்ற உறுப்பினர்களில் ஏழு இஸ்லாமிய எம்.எல்.ஏ.க்கள் (வெறும் 3%) மட்டுமே உள்ளனர் என்பது குறிப்பிடத்தக்கது. விரைவில் சட்டமன்ற தேர்தல் நடைபெற உள்ள சூழலில் முக்கியமான கோரிக்கைகளை முன்வைத்து இந்த கோரிக்கைகளை நிறைவேற்றியுள்ளது.

English summary

At the Tamil Nadu Thowheed Jamaath (TNTJ) state conference held in Erode, a resolution was passed urging people to defeat communal forces and those allied with them. The resolution also warned that divisive elements are attempting to gain a foothold in Tamil Nadu, in an indirect criticism of the BJP.