எய்ட்ஸ் விழிப்புணர்வு: மும்பையின் ரெட் லைட் ஏரியாவில் பாலிவுட் பிரபலங்கள் விசிட்
மும்பை: பிரபல சிகப்பு விளக்கு பகுதியான மும்பையின் காமாதிபுராவில் பாலிவுட் நட்சத்திரங்கள் எய்ட்ஸ் விழிப்புணர்வு நிகழ்ச்சிகளை நடத்தி கவனம் ஈர்த்தனர்.
மும்பையின் காமாதிபுரா பகுதி பழமை வாய்ந்த சிகப்பு விளக்கு பகுதியாகும். இங்கு விபச்சாரம் கொடிகட்டி பறக்கிறது. பாலியல் தொழிலுக்கு பரிசாக, அந்த பெண்களிடையே எய்ட்ஸ் நோய் பரவி வருகிறது. பாதுகாப்பான உடலுறவு மூலமாக, எய்ட்ஸ் நோயை கட்டுப்படுத்துவது குறித்து, பாலிவுட் பிரபலங்கள் விழிப்புணர்வு நிகழ்ச்சி நடத்த திட்டமிட்டனர்.
தினா காய், விக்ரம் சிங், வினய் வஸ்டா, விபின் ஷர்மா, சன்னி ஷா, மரிசா வர்மா ஆகிய பிரபலங்கள் ஒன்றாக சென்று உரியடி , பாடல் போன்றவற்றை அரங்கேற்றினர். தினா காய் மூன்று பாடல்களை பாடி அசத்தினார். எய்ட் பாதிப்பு குறித்து மைக் மூலமும் பிரபலங்கள் பிரச்சாரம் செய்தனர்.
விபச்சாரம் செய்யும் பெண்களோடு, கலந்து பேசினர். அவர்களுடன் கைகுலுக்கி, தழுவி அன்பை வெளிப்படுத்தினர். பாலிவுட் பிரபலங்களை பார்க்க காமாதிபுரா, பகுதிக்கு பொதுமக்களும் திரண்டதால் அங்கு விழாக்கோலம் பூண்டிருந்தது.
இந்த நிகழ்ச்சிகளை தன்னார்வ தொண்டு நிறுவனம் ஒன்று ஏற்பாடு செய்திருந்தது.